Psalms 118

Kebu ge meficnununa

1O,KEBU ye gombunga, yeng yoac dedzege amma imoc modackecde, faka imoc nasoya nasoya feengkefude, imocac ubangerec memibesonga. 2Israe habu ngeneng yofi debisia, “Yeng yoac dedzege amma imoc modackecde, faka imoc nasoya nasoya feengkefude.” 3Aronggac ama areng ngeneng yofi debisia, “Yeng yoac dedzege amma imoc modackecde, faka imoc nasoya nasoya feengkefude.” 4NgicngacKEBU eweheiheigoc hoanggeandae, ngeneng yofi debisia, “Yeng yoac dedzege amma imoc modackecde, faka imoc nasoya nasoya feengkefude.”

5Ni ebic kuneng memaKEBU kpacbaKEBUNGO kpakpacnaac turunga meremma ebicfunac yungecnuec. 6KEBU ye nigoc kefu ni naric mi kengecnuude. Ngic yeneng wiac mong naric mi anenggecde. 7KEBU ye memeficna amma nigoc wegenac kecdeac ni firang amma ngic ubango ukunudae yenemma nambade.

8NenangKEBUAC hoannu kemma sufuma kecni ngereede. Ngic negensingyununi memefihagoc yombong mi ande. 9KEBUAC hoannu kemma sufuma kecni ngereede. Ngictau medacfocngina negensingyununi memefihagoc mi ande.

10Bangec monnunac ngicngac Kebu mi negendae, yeni sasawango oronnudacgec niKEBUAC kpacfu firang amma kporacyunuba kpac anggec. 11Yeni noboc noboc oronnuma kecgec, fora. Nga ni sifuKEBUAC kpacfu firang amma kporacyunuba kpac anggec. 12Yeni sangobide isoc noboc noboc oronnugec kate dzema borang tima bic bokoande, ifi isoc anggec. NiKEBUAC kpacfu firang amma kporacyunuba kpac anggec. 13Yeneng kucgoc kpefacnugec manubesonga anec, fora. NgaKEBUNGO ine meficnuec.

14KEBU ye neac kuc nga yegecna. Yennoc neac memengerecna.

15Ngicngac dindingac yeneng firang amma kporucbedzonginau sogac sogaiac yegec heigec yegecngina negembisia. “KEBUAC marifoingo faka bibiagoc amma firang andac. 16KEBUNGO marifoia miaru sawau yacde.KEBUAC marifoiango faka bibiagoc amma firang andac.”

17Ni naric mi homebade. Ni ine gbori kecmaKEBUNGO uaya mekefec, imoc dekperagibade. 18KEBUNGO kopocsicnaac amma kpemeting ebirangoc anenec, fora. Nga homecac mariu mong mi fainuec. 19Ngeni dindingac kekec womongamaac nagutoa witinenggec ni imohai emmaKEBU ubangerec memibade.

20KEBUAC nagu yomoc nga ngicngac dindingac yeneng imohai enggecde. 21Ge yoacna turunga merennenna memengerecna amma meficnunec. Imocac geac ubangerec megembade. 22Amameme ngic yeneng hoc mong mangana dema ukugec. Nga hoc imocngo amaac hoc wotung amma seria nanude. 23KEBUNGO faka meu imocngo nenang kicfu wiac bibiagoc ande. 24KEBUNGO uamemenaso yomocnoc meu nenang naso yofinenggac sogaima ubangerec negenni. 25OKEBU, neni kpacsambic amma yofi dedimbe, “Ge ebicfunac mesinununa. OKEBU, neni naric kecnideac gombunga anemmena.”

26NgicKEBUAC kpacfu erahade, ye kenehagoc. NeniKEBUAC amau namma kenecngunukecdimbe.

27KEBU ye Anutu. Yeng kperagi nemmeu imocngo mekperaginunuec amma mekperaginunuude. Ngeni ic maria sabayagoc maringinau mema arennu hakecma hombanggac sese mehagec, imoc witicngo arata baihau dedeckebisia.

28Ge Anutuna. Ni eriendzong megembade. Ge Anutuna, imocac afegubade. 29KEBU ye gombunga, yeng yoac dedzege amma imoc modackecde, faka imoc nasoya nasoya feengkefude, imocac ubangerec memibesonga.

Copyright information for `DED