Psalms 132

Dawidi nga Siong meisingyuruec

Hombannu kekenggac yegec.

1OKEBU, Dawidingo ebicfu engkefec, imoc negenna feu yeac negenna ngereebeso. 2KEBU, Yakoboac Anutu Kuctoa mingina, ge yomoc negensibesena, yeng geac yoac deserima yofi deec, 3“Ni amana manau mi embade me fefenau naric mi febade, 4ni kicna gauac kpetarimima gau naric mi febade 5kecmaKEBU geac amatatac nga Kuctoa mingina Yakobogoc kecande, geac amagerec meficgebade.”

6Negenggec, neni Efrata bangecfu Anutuac dzadzahac katapaac siduc negemma Yara manennu imoc meficgeing. 7“HagecKEBUAC amau kenni, nenang yeac hanitatahau fafoc heimima numumini.

8OKEBU, ge yacma kucgaac katapagoc tacnegeng amagau hana. 9Womong garenga, ngeni dindingac kekec heigec kemebeso nga ngicngacfora kpetiac kecandae, ngeneng desogai amma arohobisia.”

10Ge kingang ngicga Dawidiac gombunggac amma ngicga kerecngo nadzicminec, ye mi ngadehebesena. 11KEBUNGO yoac deserima Dawidi yoac edeec, imoc naric mi meickeude. Ye yofi deec, “Ni geac bangecyombongga yeneac arennunac medacga mong meisinggema ye ngictautatacgau faiba tacbeso. 12Neac dzadzahac nga dedekperagiyoacna kpouyemmeba geac medacfocga yeneng imoc modacgecdeu yeneac medacfocngina ifingoc geac ngictau tatacfu nasoya nasoya takecgecde.”

13KEBUNGO Siong meisinggema ihai kefudeac ammide. 14Ye yofi deec, “Ni ama yomocac negensongo negengkecba imocngo nasoya nasoya neac tacnegeng ama seria anu imohai tacyac ambade.

15Nga imohai wiac sasawa fede, imoc homac yombong kenehebade. Yeac ngicngac makpekpea semeng gumecyunuba negebec anggecde. 16Ni womong garengfora ebicfunac yungecyunubade, faka imoc ngakpi isoc heiyemmeba kemeu kecgec ngicngacfora kpetiac kecandae, yeni sogac sogaiac yegec heigecde.

17Ni imohai Dawidiac arennununac ngic mong faima yeac kuc heigboriba besaiude. Ni ngicna kerecdokungo nadzicmiba kefu yeac kifa mong mengeremiai. Nga yeac ngabafora yeni ine game heiyemmeba kemeude. Ni ngictauac ira pirac pirac heimiba kemeu imocngo ye mekperagiude.”

Kopocsic waemema kecbesonga

Hombannu kekenggac yegec. Dawidingo yegec yofi heiec.

18
Copyright information for `DED