Psalms 138

Wi yombong kecde

Dawidingo mitiyegec yofi heiec.

OKEBU, ni heregoc ubangerec megemma anutu hania hania kecdae, yeneac kicfu geac dedengerec yegec heigembade. Ni womongga kpetiacfubigeng ngonducnebade. Geng yoac dedzege amma imoc modacnade amma ge yoac modac modac Kebu, imocac kpac kunenggaac ubangerec dekecbade. Ge kpac kunenggagoc nga geng yoacga deserima denec, ge wiac imoc miacna enu imocngo wiac sasawa feraheude. Ni kpacguai naso imohai geng turunga merennenna kengeha kpac amma serima kecbadeac anennec.

OKEBU, bangecac ngictau sasawa yeneng geac enacgaunac yoac negenggecac dengeregubisia. KEBUAC kuc nga kibikperagitoa, imoc wiac engena. Yeni imocacKEBUAC sing fekende, imocac yegec heigecde.

KEBUNGO wi yombong kecde, fora, amma ye sifu ngictehec nenang nenenggareng anemmekefude. Ngicngac goa yenanggac nengenggec engena angande, yeng herenginau kecma fakangina negenude.

Ni ebic witiau kecduae, fora. Nga geng sifu kekecna onggonggekecnec. Ngabafocna yeneng herebu anenggec geng mariga sinema marifoigango ebicfunac mesinunade. KEBUNGO efaima neac kekecareng uayagoc faima imoc sasawa nearu mesidarude.

OKEBU, geng yoac dedzege amma imoc modackecnade, fakaga imocngo nasoya nasoya feengkefude. Ge marikibiga mi ngadehema wana.

Copyright information for `DED