Psalms 15

Anutuac womonnu

Dawidingo yegec yofi heiec.

OKEBU, geac kporucwomongga kpetiacfu merang naric tarude? Nga merang tikiga kpetiacfu naric kefude?

Ngic mong ye faka angammemeau kopocsic mong mi meficgeude nga mong ye faka gombunga angkecma hereaunac yoac fora ereu deude, yeng ihai naric kefude. Ngic mong ye nedzarangango ngadeyoac mi deude nga ogea mi memanganeude nga mong ye ogofora yeac wegenac kecandae, yeni game kpekpeuu naric mi faiyunuude, yeng ihai naric kefude. Ngic mong ye ngic mangana, yeneac modzea tiande nga ngicngacKEBU eweheiheigoc hoanggeandae, yeneac ewengina heiude. Nga mong ye dedeseriyoac modaru imocngo ebic homac meficgemiudeu imoc sifu modarude nga ye imoc negenu wiac engena mi anude, ngic imocngo Kebuac tiki kpetiacfu naric kefude. Ngic goa yeneng ngic mong yearu turung angkecdae amma kpougecde, imohai yeng profit dema dzo monggoc torokpema mi meude. Amma ngicngac goa kopocsicngina kpac kecdae, yeng yeni yoacfu memayunuudeac moneng naric mi meude, ngic ifia yeng Kebuac tiki kpetiacfu naric kefude.

Ngic mong ye faka imoc angkecde, ye wiac mongngo meu goroc goroc naric mi anude.

Copyright information for `DED