Psalms 30

Kebu ye gombunga

Dawidingo womong desi desinasoac mitiyegec yofi heiec.

KEBU ge keme kemeaunac tainuna ereduaac afegubade. Geng ngabafocna kpae heiyemmena yeneng neac amma ubangerec mi meficgebisia.

OKEBU, Anutuna, ni gearu memeficac kiacma numuba geng mengerenunec. OKEBU, ge homec amaunac menunec. Nga tennu keme kemeac arennu tacbareng geng menuma kekecna homecfu kemegecde, yeneac arennunac mesinunec.

O,KEBUAC ngicngac kpetiac, ngeni ye dengerema yegec heibisia. Ngeni yeac kpara kpetiac heiwayong memibisia. Ye ngabaya naso wegenanec mekefude nga fakaya gombunga imoc kekecninau sasawa fekefudengoc. Ge tofocnac kiacade nga asoac sogac sogai meficgenade. Ni naric kecma wiac monggac mi obohoai, imohai yofi deai, “Ni seria nanduaeac wiac mongngo nuu goroc goroc naric mi ambade.” Nga ge kicga nearu sufuna ine kengecngo memanuec. OKEBU, gennoc faka gombunga anemma tatacnau fainuna tiki seria isoc seria yombong nanai. OKEBU, ni kpacguma kpesi kpesi amba negennennadeac yofi numugenai,

KEBU, ni homema homecamau kemebadeu wiac mong naric mi gembac. Bangecac sendungngo ge naric mi dengereguude nga ge yoac modac modac Kebu, imoc naric mi dekperagiude. 10 OKEBU, geng negennemma ubamangang anenna, oKEBU, ge meficnuna.”

11 Geng ubaebicna heimerenna yegec fededuae nga songgonggac wamba heikefai, ge imoc meickema sogac sogaiac wamba heinenna kemeec. 12 Ge ifi anna ni waicke monggoc mi kecbade. Herenango yegec heima eweheiheigoc afegubade, oKEBU, Anutuna, ni nasoya nasoya ge eriendzong megembade.

Copyright information for `DED