Psalms 51

Anutu ge kopocsicna wana

Yegecgareng yearu. Dawidingo Batsebagoc serofaka anu profetengic Natangngo yearu kemma dzigeneu Dawidingo yegec yofi heiec.

O Anutu, geng yoac dedzege amma imoc modackecnecac neac ubaga manganeu. Geac wosoefac imoc efea kpac, imocac neng singyoac kpema kopocsic meficgeai, imoc dzuacdacna kpac ambeso. Ni ngicngac ogofocna faka mangana ayemmeai. Ge dzuacnuna kongaha ambesare. Ge kopocsicna medzuacna kongac kpebesare.

Ni singyoac kpeai, imoc negengkecduae nga kopocsicna imoc nasosoc hensiduae. Gearusac kopocsic meficgema kicgau faka mangana yombong anai. Ifi anu geng yoac denec imoc fora fingectegerude ge ngic hania isinggema yoacngina desinec, imoc dindingac.

Foracngoc, nengganango kopocsicgoc kecma ni kpenannuma menuu kopocsicnagoc fingerai. Nga herenau yoac forasac febeso, ge imocac negenna ngereeude. Ge imocac here sufu sufunau negen negentegec kpounenna.

Ge babacmeac mema dzuacnuna kongac kpeba dzuacnuna hoeng kongaha feracyunuma kongac ambesare. Ge negemmana ni sogac sogai nga ubangerec negembesare. Geng sicna kpedzamenec nga ge negemmana yeni monggoc sogaibisia. Ge kopocsicna imohacnac kicga mesufubesena amma ni ngic ogofocna memanganeyunudarai, imoc dzuacdacna kpac ambeso.

10 O Anutu, ge herena kongaha gboria meficgenemma asu gboria nga dindingac meficgema herena manau fainenna. 11 Geac hoannunac mi ukununa amma kpetiac Asuga nearunac mi meickena. 12 Ge ebicfunac mesinunecac sogac sogai monggoc mengere nemma enactofoc tofoho nga ogomeficac asu nemma nanggenuna. 13 Ge ifi anna ni singyoackpekpengic geac sing kpouyemmeba kopocsicgoc yeneng ubangina dzigeneu gearu monggoc hagecde.

14 O Anutu, memengerecnaac Anutu, ni ngic kopocsiha kpacfu eng kpehomebaiac imohacnac mesinuna. Ge ifi anna ni nedzarannango imocac sogac sogai yegec kunengngoc heigemma geng ebicfunac mesinunec, imoc edeyunubade. 15 O Kebu, ni enacnango dengeregubadeac enacbibicna mesina.

16 Ni sesegerec megemba ge imocac songo mi negennade nga sese dema hosuc ohogemba ge imocac negenna ifingoc mi ngereebac. 17 O Anutu, ni ine asuna ebicngo kipac kipactanggea gemba imocngo sesena anude. O Anutu, ubamangangngo ngichereu ebic meficgema kipatanggeu ge imoc hemma naric mi wanade.

18 Ge Sionggac songo negemma gombunga ammima Yerusarenggac hocodatoa monggoc heimengere anna. 19 Ge ifi anna sese gombunga nga dindingac megenni imocac negenna ngereeu sese ohogemma seseyang hafoangoc ohogennide. Neni sese dema burumaka ngiwa aratagau faiyunuma ohogennide.

Copyright information for `DED