Psalms 66

Dendzerenggegec

Yegecgareng yearu. Yegec nga mitiyegec.

Bangecfu wiac sasawa, ngeni Anutu dendzerenggema yaiyo kpema yegec heima yeac kpac kuneng heiwayong memima ye oyang boyang memima yofi debisia, “Geng wiac angannec, imoc wiac engena yombong, imocac kerectegec andimbe. Ge kucga monggoc, imocac ngabafocga geac bageu kecma ngonducnegecde.

Bangec sasawango geac kicfu ngocducnema numugemma yaiyo kpema yegec heigendae. Yeni geac kpac kuneng heiwayong memima yegec heidae.”Selac

Ngeni hama Anutungo ua meec, imoc hembisia. Ye bangecngicngac nenanggoc kecma ua bibiagoc meude. Yeng kondung heimerenu bangec kerenga anu ngicngac yeni haningo doku imoc ferecgegec. Ye faka imoc meecac amma nenang sogac sogaigoc kefing. Ye nasoya nasoya kuhagocngo wiac sasawa garenggema kiwango bangec monnunac ngicngac sasawa yenemma kefude. Yoackpekpe yeni sebingina mi meembisia.Selac

Ngiha ngiha ngeni Anutunina kenehema
Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)
enac udumengnginango ye oyang boyang ammigec ngicngac yeni negendacbisia.
Yeng garennunuu gbori kecdae, yenigoc kecni ye haninina garenggeu mong mi tiposockenide.

10 O Anutu, imoc yofiac, ngic yeni siriwa isingeandae, geng ifi isoc faitobannu fainunuma isinnununec. 11 Ge uficfu fainununa kemeni ge ebic kuneng witininau faina imoc tofohokefing. 12 Geng negemmana ngic yeneng orucninau tima kenggec. Neni gerec manau kehema dokuu kemema kening, fora. Nga geng yaguc menunuma amabangec tumiatoau fainununa wiac monggac mi obohonide.

13 Ni womonggau hama sese ohogemma wiac ambadeac dedeseri deai, imoc ambade. 14 Ni ebicfu kecma wiac ambadeac enacbibicnango yoac deserima deai nga yoac enacnango deai, imocac 15 ramaburumaka kerehagoc sese negemma gembade. Nga rama ngiwa sese dema ohoma hosuc heima burumaka nga noning ngiwa gemba sese ambeso.Selac

16 Ngicngac Anutu eweheiheigoc hoanggeandae, ngeni hama yoacna negembisia. Yeng nearu ua meec, imoc edengunuba. 17 Enacbibicnango ye kunengngoc kpacba nedzarannango ye bic afeheec.

18 Ni ngicngac ogofocna memanganeyunubadeac negen negeng herenau arenggebai dede Kebungo neac kedzac mi kpebac. 19 Amma forangoc, Anutungo negennemma nunumunaac yoac negensima kefec. 20 Ye nunumuna mi ngadehema yoac nigoc dzegeec, imoc mi waec, imocac Anutu kenehebesonga.

Copyright information for `DED