Psalms 81

Israe ge sogaibesena

Yegecgareng yearu. Gatingic yeneac musiwiac kpema heibesonga. Asafango yegec yofi heiec.

1Anutu ye kucnina. Ngeni dendzerenggema yegec heimima Yakoboac Anutu sogac sogaigoc arohoma oheha memibisia. 2Ngeni tambaring nga gita amma kurere kpema udumeng gombunga meficgema yegec heibisia. 3Afo gboria mau nga nasotoanina afo dzongiau trampet fifigec arohobeso.

4Anutungo Israeac singyoac ngemmeec. Yakoboac Anutungo yoac ifi deseringemmeec. 5Anutu yengenaoc Aigita bangecfu kemma dzikac kpema firang anec, imohai dederecgeyoac imoc Yosefeac areng yemmeec.

Ni ubaudumeng nga yoac warac mi negengkefai, imoc naso imohai negenai.

6Negemba yofi deec, “Ni fuanginaunac ebic mesima maringinaunac uaac sakac ebira meickeba 7ngeni ebicnginagoc kecma kpacnugec ebicfunac mesingunuai. Ni hoennu gbururunggac manau sufuma yoacnginaac turunga merengngemmema Meriba doku imohai faitobannu faingunuyai.”Selac

8“O ngicngacfocna, ngeni kedzac faigec goroyoac edengunuba. O Israe habu, ngeni neac yoac negembisia. 9Ngeni anutu furia mong mi mekecbisia nga bangecareng goa yeneac anutu fafoc mi heimibisia.

10Ni ngeneacKEBU nga Anutungina. Nennoc Aigita bangecfunac mengunuma hayai. Ngeni enacngina anggegec mewakengunubade.”

11“Ngicngacfocna ngeneng ine ubaudumennaac kedzac mong mi kpegec, kpac yombong. Israe areng ngeni wanuma neac yoac mi tofohogec. 12Imocac wangunuba ngeni ubaseringinagoc kecma ngenang negen negeng modacgec.

13O ngicngacfocna, ngeni neac yoac modacma kedzac kpebau, imocac yombong anende. Nga Israe ngeneng neac sing modacbau, imocac homac anende. 14Ngeni ifi ambau neng ngabafocngina bic memayunuma marinango singngina hedzickebai.”

15“Ifi amba ngicngacKEBU ubango ukudae, yeneng yeac kicfu hama fafoc heimibau. Yeni kopocsicnginaac turunga ebicgoc kecdae, imoc nasoya nasoya feengkecbac. 16Ifi kefu Israe areng, ni wit yaka gombunga ngemmeba nebau nga ni hoc peperandziac kukundzau meficgema ngemmeba nebau.”

Copyright information for `DED