Psalms 88

1OKEBU, Anutuna, ge neac ebicfu mesi mesingic. Ni hadzing tofocnac geac arohoma kiackecba 2geng nunumunaac kedzac kpena nga kiacnango gearu hau negenna.

3Ubaonganango ebic wakeyombonggeu kekecnango homec ama bic mewegenede. 4Yeni neac yofi negendae, “Ye ngic bic homegec, yeni isoc ande.” Ni ngic kucngina kpac, yeni isoc anduae. 5Ngic wayunuma homec yeneac botucfu faiyunuandae, yeni isoc feduae. Yeni ngic kpebucyunuma kicsereu faiyunugec fedae, ifi isoc anduae. Ge ninigec meficgema neac monggoc naric mi negenna fede, ni ifi isoc anduae. Ge ngic marigaunac meicyunuma monggoc mi garengyununa kpac angandae, ni ifi isoc anduae.

6Ge teng mana keme kemeau kicsere menuma kundung dzic manau fainunec. 7Geac herebungo neac witiu emma mepetannuma kondungsiri isoc semenuna kucna kpac anec.Selac

8Geng ifi anenna ogofocna yeni imoc hemma ngadenuma neac ebic hemma kengectoa amma kpidohoma nandae. Ni witicfu ifi kecduaeac naric mi worabade. 9Ni ubahodunggoc kecba kicna kundung kpebeso ande. OKEBU, ni wenacsoc kpacguma marina gearu sinekecduae. 10Ni homebeso anduae nga ge ngic homemea yenearu kucfaka bibiagoc mi menade, kpac. Homegec yeneng onga amma naric mi yacgecde nga yeni eriendzong naric mi megenggecde.Selac

11Geng yoac dedzege amma imoc modackecnec, ngic kicsereu yeneng yoac imoc mi dekperagiandae nga ge yoac modac modac Anutu, imoc homec amau naric mi deyadigecde. 12Kundung manau geac kucfaka bibiagoc naric mi negenggecde. Nga geng meficyunuma ebicfunac mesiyunuannec, imocngo ninigec amau naric mi fingectegerude.

13OKEBU, ni sifu asoac anu memeficac kiacgemma arohoma gearu nunumuna faiba haude. 14OKEBU, ge ni wanuma kicmesuga nearu mesufunec, imocac hania mi negentegecduae.

15Ni sebigborinaungoc kpendzenggoc kecma homecfu heima kefai. Ge kengec efea kpac meficgenenna kpidohoma ubaebicgoc amma memeficna kpac kecduae. 16Geac herebungo semenuu kengec efea kpac gearunac meficgema kengecnuu manganema kpac anai. 17Geac kengectoa imoc asoacnac kemma marai doku tunggbaung isoc yadima oronnuma noboc nobocnac hama semenukefu 18geng negemmana songo ogona nga arengfocna yeni sasawango wanuma ngadenugec kundungngo tosoyombonna ande.

Copyright information for `DED