a(Sesememe 18:5)
b(Dedeseri 30:12)
c(Dedeseri 30:14)
d(Yesaia 28:16)
e(Yoele 2:32)
f(Yesaia 52:7)
g(Yesaia 53:1)
h(Mitiyegec 19:4)
i(Dedeseri 32:21)
j(Yesaia 65:1)
k(Yesaia 65:2)

Romans 10

Tosofocna, Anutungo arengfocna kopocsicac ebicfunac mesiyunuu komoc kpegecde, imocac heresongonango negengyombonggema ye numumianduae. Amma ni yeneac hepuc amma yofi deduae, yeni Anutuac kingang kpegecdeac ngombongemema seseri angkecdae. Nga ye dafi kingang kpemibesonga, imocac negen negentegec ine mi feyemmede. Amma yeni yenaocngoc sing dindingac meficgegecdeac arenggema uaya mekecdae. Nga Anutungo sing mong bic meficgema ngicngac dindingac deyemmeande, sing imoc ine mi negendae. Ifi amma yeni Anutuarunac kekec dindingac fede, imocac bageau kecgecdeac waandae. Kristongo dedeseriyoac hafoangoc modacdaru dedeseriyoacac ua wisic wisickea anec. Imocac amma ngicngac ye negensinggeandae, yeni sasawango dindingac kekec meficgegecde.

Mosengo dedeseriyoacac sing dindingac kekec imocac yofi ohoec fede,

“Ngic mong ye dedeseriyoac modacdarude, yeng sing imohai kekehagoc amma kefude.” a 
Nga Anutungo negen negensinninaac amma dindingac denemmeude, sing imocngo yofi dede,

“Ge geanggaoc ubaheregango yofi mi kpesiemebesena, merang kurumennu enude?” b 
Imoc Kristo kurumennunac memaudeac negemma dede.
Me yofi, “Merang hofeu kemeude?” Imoc Kristo homecfunac meereudeac negende. Ifi mong mi negembisia.

Imocac geac yoac yofi dedea fede,

“Anutuac yoac imoc hoanggau nga enacgau amma heregau fede.” c 
Nga negen negensinggac yoac imocnoc dekperagingemmekecdimbe.
Imoc yofiac, ge enacbibicgango, Yesu ye Kebu, imoc dekperaginade nga Anutungo Yesu homecfunac megboriec, imoc negensinggenadeu Anutungo kopocsicgaac ebicfunac mesiguu komoc kpenade. 10 Nenang ubahereninango ye negensinggeni yeng dindingac denemmeude. Nga enacbibicninango ye dekperagini yeng kopocsicninaac ebicfunac mesinunuu komoc kpenide. 11 Mitikibingo imocac yofi dede,

“Mongngo ye negensinggeudeu, ye gamekpekpeu mi enude.” d 
12 Anu yudaareng nga grikareng siricngira mong mong mi ande. Kebu ye sasawa nenanggac Kebunina. Nga ngicngac yeac kpac kpacandae, yeni ubangerecgoc keneha hania hania naric yemmeude. 13 Nga

“Ngicngac yenengKEBUAC kpac kpacgec Anutungo yeni sasawa kopocsicnginaac ebicfunac mesiyunuu komoc kpegecde.” e 
14 Nenang mong sueni yeng Anutuac yoac dekperagiyemmeude. Nga Anutuac yoac dekperagiu negemma naric negensinggegecde. Negensinggema yeni Kebuac kpara kpacma komoc kpegecde. Imocac yofi oho ohoya fede,

“Ngic yeni siduc gombung mehakecgec ngicngac yeneng yeneac hani udumeng ubangerehagoc negenggecde.” f 
16 Anu ngicngac yenearunac homacngo siduc gombung imoc ine mi tofohogec. Yesaiango yofi dede,

“Kebu ge negenna, yoac dekperagiyemmeing, imoc yeni mi negensinggegec.” g 
17 Nga Kristoac yoac dekperagiyemmeni yeni yoara negengandae. Amma yoac imoc negemma negensinggegecde.

18 Anu Israe yeni yoara kedzacnginango mi negenggec me? Ifi kpac, yeni bic negenggec. Yofi oho ohoya fede,

“Ubaudumengngina imoc bangecfu kengkecde. Yeni yoacnginango bangectoa bangec yomocac noboc noboc wisic wisickeau kendarude.” h 
19 Ifiac amma monggoc deba, Israe ngicngac yeni yoara ubaherenginango negentegecgec me? Mosengo Anutuac enac mema imocac yofi deec,

“Ni faka angemmeba ngeni ngicngac areng mong bangec mocguac areng mi andae, yeneac keracmangang anggecde. Nga areng mong negen negentegecngina kpac, ngeni yeneac herebu negenggecde.” i 
20 Yesaiango kengeha kpac imocac torokpema bangeha bangeha ngicngac, yeneac yoac yofi deec,

“Ngicngac yeneng ni mi hofocnuma eng meficnugec. Nga neac dekpesia kpac kecgec, yenearu fingecyemmeai.” j 
21 Amma Israe areng yeneac ine yofi deec,

“Ngicngac areng mong yoacna mi tofohoandae nga yoac kpekpe kecdae, yeneng hagecdeac asoacfunac kemma tofocnac marina sineyemmekecduae.” k 
Copyright information for `DED