Hebrews 1

God Otua Mamewa ewanen

God watagaet negin ugup ugup amba wam ugup ugup gapan isimuran wainua God no oise waiwanumune nagirewa gamumup nop namu inamup wan. Go wam verisiwa mame gapan me otua gamup nop dianiwan. Me otua gamup piup kiman tan, me otua om enuni amba wan dim dim iragi yon borapen menan dien.

Otua me ganat God oya oya megawa di amba God ire yaoyao mega gine daiton. Me nop mega aroewa gapan wan dim dim iragi wat kaimagamen. Me koewa nuga garewa wat museni amba kiman sia dot ae God Aro Iragena Apanewa mainewa nutup gapan ae wanden.

Anea bawarewa go God Otua baware iragen

Menan me otua anea aigamupewa wandia, amba me yaua den paina ao waren, anea muga gauarap. Ame menan God anea mega menan manega da ya wadiamon,

Ge ne otunawa, endi ne mamaga entan nimanegia.
Amba nop ma den anea menan anega ya wan,

Ne mamewa tain amba me ne otunawa tata.
Amba sia, wam ame God urae magi megawa wat enen piup taueni, me anega wan,

God anea mega iragi me wa taragasep.
Amba anea munan me sia anega wan,

Anea mega taik mini entan mumen,
amba nao nagire megawa oma meravewa mini entan mumen.
Go otua inap me anega wan,

O, God ge toemu gegawa usenagaet wande aiwandata,
amba waenapan inak tamanawa gapan kwayup tamuingan.
Ge inak tamanawa menan anu guraan,
amba koewa tandayasianawa, menan ne paina bat gimagen.
Ap menan om enugena gapan aton aigap genan,
go ge evenak waiga upinewa ap anega uon.
10 Otua menan sia anega wan,

O Ayop, ge ere mangan, piup danewa mega ta baraean,
amba kiman gwanewa uruga naniga gapan tan.
11 Mu uon an tain, go ge wanik agingai,
Mu wanup mini iragi tom tam wain.
12 Ge mu wanup mini ae paitai,
mu wanup mini entan wantan taingai.
go ge uap di wanigai, inak gega uon ya tata.
13 Endi God anea inamup da map anega ya wan,

Nanina nutup gapan ae wanige amba ne anavi gega tambupen,
gauaragap wanumoin.
God ap anega wan.
14 Menan anea nao muga dim da? Mu nao muga ame God watu enamop amba da da Keriso anu tumat sepen menan wat agoat muminewa.

Copyright information for `DGZ