Hebrews 3

Apan Mosis bawarewa go Iesu bawarewa iragen

1Dugup daitona potaya woup sen, nu e den God nao mega tapen menan nunan wani nagirewa. Iesu kakaewa mega menan anun, God Iesu Keriso nu inanup watu eneni nu anu tumat nuga Pirisi Aigap Iragena me di anuinampen. 2God om enuni gapan Iesu nao tat mega God menan i oni botakain taiwandin, watageta apane Mosis me den ap anega God navewa waenapan inamup taiwandin. 3Go Iesu me nao tat mega viripewa aigap tainampen amba Mosis gauarap. Guegue ame mam, pa tuini apanewa me viripewa aigap go pa mega ame tuni viripewa gauarap. 4Tave di, pa ugup ugup orup da da tune go God wani gapan wan dim dim iravi wan venat mutane.

5Menan Mosis God nao mega apanewa di. Ame gapan me God navewa i oni botakain taiwandin. Ame God no oise evi wapi namu anu amba waenapan wadiam wandin. 6Go Keriso me God otu iragena menan i oni botakain God pa mega amase taiwandini. Amba nu God pa mega ame, me otu waiwa di, menan nu kin kin tat amba anu dao nuga God inapaet, ap tata nu God otu tasine di waninait.

Anu tumat uoni tantanamua

7Menan, Guewa Woup Seni ap mini anega wan,

Endi, God nop mega anunewa,
8imuya potaya gware ya wap,
e isimurae waiawa umamup ya tane, mu at kaimewa gapan,
God nop mega tandayasene amba God irewa yawapen tane.
9Ap mepe mu mondi pusina warupan irana yawapen tane.
En apane dere (40) gapan ne kwayup tamuingina,
go ap mu ya anun amba tandayat nimanegene.
10Iwa ap menan mu inamup ne ugu gangan tan
amba munan ne anega wan, mu imumu potamu pot poraet pua aewan,
amba ne negin nega ya asik taiwanum.
11Menan ne ugu gangan nega kaimakaet diamona mam,
“Mu ne wagat nega potap ya unumoin.”
God ap anega wan.

12Gwanin wainawa, yambuni anun, e imuya potaya anut koewa gapan gego anun God ae ya ve aisene. 13Go pot poraet gare gare wawa isiwanian, ap gapan koewa ega menan imuya potaya gware ya wap. Ame pot poraet di taiwanian iwa wam endi arok mame di wandini menan. 14Erewa gapan nu Iesu anu tumasintoni mini nu nao nuga daitonawa apanewa Iesu den anu tumat nuga wat kaimagamet aninanet wam verisiwa taueta.

15God nop mega menan ok anega sean,

Endi, God nop mega anunewa e imuya potaya gware ya wap,
isimurae waiawa nop mega tandayasene mini ya tane.
Ap anega wan.
16Ian ambe God nop mega anun amba tandayasene? Ian ame at Idip gapan apan Mosis naumo aeni nagirewa. 17Amba God ian ambe ugu gangan en apane dere gwanap inamup tan? Ian ame koewa tane menan at kaimewa gapan borit wane nagirewa. 18Amba God ian ambe inamup agi kaimakaet anega diamon ‘Mu ne wagat nega potap ya unumoin?’ Ian ame mu God nop mega tandayasene nagirewa. 19Menan nu anutoni ame God ya anu tumasene menan God agi wani arewa gapan ya unumone.

Copyright information for `DGZ