Luke 1

1Ae, apan nega Tiopilas, gaun nega inagap waian. God waenapan nimakanup ugup ugup taiwandini no oise seapen men waenapan arugataet tayao wareyao tanau amuiwanumun. 2Ok ame seanewa, mu Iesu den tanan erewa gapan mu iwanumune den yaviwanumune amba no oise waiwanumune nagirewa, inamup nu anutoni ame seane, da ugup ya seane. 3Ap menan, Iesu guturewa ere ibariwa gapan, ameme ne ae yao anu kakayasepen men anu guran taingina. Ap menan, ayop nega Tiopilas, kakaewa ameme, nop oit ame se genat anuna. 4Iwa, nop oit ame gapan, ge asigip tagep, ame nop anenen anuana, ame nop tavewa di, menan ok mame sivin.

Apan Dion dup iamuini apanewa yanapen tani oisewa

5Wam da, apan Erot at Diudia ayop muga ta wandeni wamewa gapan, ap mepe Diu pirisi apan da yaua Sekaraya wanden. Me dugup Abaidia apanewa. Me waenewa, yaua Ilisabet, mu dere pirisi nave taine dugupewa naewa. 6Apan Sekaraya waenewa Ilisabet dere mu kakaevet ta amuiwanumune iwa mu God iup mega iravi ayamase tainewa. 7Mu dere otu uon irak mutane, iwa Ilisabet orup da ya wara wara mini. Mu en nononga otu uon wanumoin en aeta guramon.

8Wam da, Sekaraya dugup mega nagirewa nao semon taiwanumune, menan me pirisi nao muga God men tainewa ame taiwandin. 9Menan, dugup mega guegue muga gapan, apan Sekaraya om enun wane God Paewa unuk ae tutu dena omaewa iu iriwandapen dien. 10Ame oma tutu dena iu God Paewa gwanap irapen wam airasewa ame taueni menan waenapan iragi tauan God Paewa sin panane gwanap, iamen, God inap mup taiwanumun.

11Wam ame gapan, Sekaraya God Paewa gwanap wandeni, oma tutu dena iu irine watarewa mainewa nutup gapan God anea mega da ap mepe ase venase yoniwandin. 12Apan Sekaraya anea use yaveni, me imua puk wan tap ase anu guren. 13Go anea anega wadien, “Sekaraya, tap ya ta. God inap mup waingiana anu gimagiwandin. Menan waenaga Ilisabet iman orup apan bat geneta, ame ge yaua Dion diai. 14Me yanepi ge aton anui amba imuga potaga tarep wareta, amba den waenapan aruga daramumu wata! 15Iwa orup ame God yamap bawarewa tata kaum wain go kaimake dena kaumewa upi ya nata. Orup ame inewa potap wandeni wamewa gapan God Guewa Woup Seniwa imu pose no dotoueta.

16Me at Isurero nagire aruga Ayop muga God inap imumu wat entan mumeta. 17Watageta apane Elaidia aro amun mega ap umap Dion wa taiwandata. Waenapan wadiamopi gapan mame waiwa entane otu waiwa munan sia onamoin. Amba God tandayasine nagirewa entane kakaewa nagire ewap amoin. Ap anega tapi gapan waenapan iragi bongam bongam ta Ayop sia tauapen menan amasewa ta wanumoin.”

18Amba Apan Sekaraya anea singui wayaven, “Otuna oisewa wadianegiana tavewa di wandepi ne anenen ta amba asigip tain? Ne waenana dere aeta guranen.” 19Anea gare anega wan, “Ne Gebero, God namup yonina apanewa, ame God watu enanegen, nop oit kakaewa mame wadiagepen ongen. 20Wapena anu. Nop nega evi amba tavewa di tauepi noa ya anu tumaseana menan nok borasep wanigai, otuga yanepi amba nop sia wai.” Anea ap anega wan.

21Koni ap gapan, waenapan iragi Sekaraya menan pa garip amat wanumon anu bambam taiwanumun, iwa di menan Sekaraya pa gwanap nononga wandia. 22Wanumone, Sekaraya pa garip ma taue oneniwa, nop wapen tani umap uon no borasen. Ap menan waenapan anega anun pa gwanap paua da utupa yaven. Me nop wawa umap uon menan naniwa gapan guegue ta ewamuiwandin. 23Me God nave taitameni amba pa mega aen

24Mame ewap, Sekaraya waenewa Ilisabet bagup tani. Ap menan, siragam nani yamunaet pa mainan bore wanden. 25Ap gapan Ilisabet mek anega wan, “God bagu sisi nenan anu ago neneni iwa ne orup ya seana menan umam nega waenapan yamamup wat musen.”

Iesu Keriso yanepi oisewa taue aen

26Ilisabet bagup tani siragam mega nani yamu daitonawa gapan God anea mega Gebero watu enen at Galili pa yaua Nasaret tauen. 27Ap mepe waenoro ini denawa, yaua Meri, iniwandin. Apan Diosep, watageta apane Devit naewa, ganganasen. 28Anea ame waenoro inap taue anega wan, “Nonup inagap wandep. God ge inagap wandia amba wat aipakam gimaginiwa.”

29Go Meri nop ame anuni bagua aguren, iwa anea nop wani ase anu bambamase anega anuni, gaun ma tavewa dim da. 30Anea sia wadien, “Meri, baguga ya arep, iwa God garaet mega inagap tauen. 31Nop ma ae anu! Ge iman bagup tai orup apan barewa amba yaua Iesu diai. 32Otuga Ayop bawarewa tata, yaua dawa God Paina Iragena Otua diaine. Amba God, omae baewa apan Devit ayop tani umap, God Iesu ware apan Devit watat mega gagap barep ayop ta wandeta. 33Menan Iesu, apan Diekap naewa megawa, ayop mugawa wande aiwandata amba Iesu toemu mega no ya utu taeta.”

34Gare Meri anea ase anega dieni, “Ne waenoro wanik anginawa, inak arita mame inanap anenen venaseta?” 35Anea gare anega wan, “God Guewa Woup Seniwa inagap taueta, God amun mega to umageta. Ap gapan digumin tai amba otuga yanepiwa God Otua, posewa woup seni apanewa diain. 36Wapena anu. Ge asigigap dugup gega waenewa Ilisabet, aeta ton go me bagup tan. Waenapan otu uon iragaet diane go endi me bagup tan wandini siragam mega nani yamunaet yamu daiton. 37Iwa God inap kaimake den uon, me aroe amunu den, dim dim wapi venaseta.” 38Meri anuni sia wan, “Umap. Ne Ayop ayamat mega taina waenewa, menan ge anenen dianegeana inanap di venaseta.” Meri ap wani amba anea ae ve aen.

Meri Ilisabet inewa daio aen

39Wam ame gapan Meri menawaet yon wandeni boge tunup arige, at Diudia gapan, pa da ap mepe aen. 40Ame taueni, apan Sekaraya pa mega unugeni amba Ilisabet gaune tan. 41Ilisabet Meri gaun mega anuni gapan Ilisabet orup potapewa vitagen doragen tan anun. Ap tani Ilisabet imu pose iragi God Guewa Woup Seniwa bararaen.

42Menan Ilisabet Meri inap kaimakaet anega wan, “God wat aipakam mega inanup viseni gapan wat aipakam aigapewa ge waraan. Amba orup barewa den wat aipakameta!” 43Den Meri inap anega wani, “Ne kakae uon go Ayop nega inewa yawanegepen tauaana menan ne aton anuivin. 44Ame menan ne gaun gega anuna gapan otuna bagunape atonu den vitagen doragen tan. 45God genan ta wadiageni tavewa tauepi ge anu tumaseana menan wat aipakam gimagen.”

Meri wak mega gapan God wa atonaseniwa

46Boge Meri God menan anega wan,

“Imuna gapan God wa taragasivin.
47God wat inakam nimanegeniwa menan inap atonua anuivin.
48Iwa, ne me nao mega waenewa, ne umap uon,
go me anu nimanegen.
Wam endiwa mame use aeniwa gapan,
waenapan iragi anega dianegain,
‘Ge God wat aipakam gimageni waenewa.’
49Iwa God aro amun apanewa aigap iragenawa,
inanap ugup ugup tani menan.
Tavewa di, me yaua woup am sen.
50Naewa naewa yan aiwandata,
iravi God inap anu gure wa taragase ta amuiwanumampina,
menan mu bagu sisi muga anuiwandata.
51Me amun mega waenapan wa ewamon.
Apan apan muk ingane wat wane taine nagirewa,
me gut marimeta.
52Amba den piup namu yoyo taine nagirewa yaumu aoma waren,
go kayakayawan taine nagirewa yaumu ao waren.
53Enup aramuine nagirewa wan dim dim kakaewa munen,
amba puraput dena nagirewa mondi up oimon amon.
54Me nao nagire mega, ian Isurero ago munen.
Me imu ya oaraen go wat agoat nimanen.
55Ap menan nu, omayan baewa Eibaraam,
ge naewa naewa mega wande aeniwa den,
nunan bagu sisi anu wa agiat nimaneni,
endi mame tauen.”
56Menan Meri Ilisabet tane ap mepe iniwanumune siragam yampo uon tani amba entane pa mega sia aen.

Dup iamuini apanewa, yaua Dion, yanen

57Ilisabet orup bare bare wamewa taueni me orup apan baraen. 58Pa nagire, dugup mega den, yaneni oisewa anune tautanan aton tan, iwa Ayop Ilisabet menan anu gureni gapan, inak kakaewa ame ta waneni menan.

59Orup ame ae yane wandeni, wam nani yamu yampoa uon tani, orup apan ame mu waran etua tum tap God dugup mega entanepen menan amon. Mu orup ame wagup mamewa yaua Sekaraya diat wane. 60Go inewa anega wadiamon, “Uon, orup ma yaua Dion diapen.” 61Waenapan yonan anega wane, “Ame anenen? Ge dugup gega gapan wagup da ap anega uon.”

62Sekaraya no borasen wandeni menan waenapan paua ta ewasene, dim wagup da wadiamopen menan tane. 63Menan orup yaua sea sea onaewa menan wan. Mu wat wanane amba kem kem yaviwanumune. Apan Sekaraya ok anega sen, “Me yaua Dion.” Seni waenapan ok mega yawane no i kap wan. 64Ok seni boge Sekaraya noa borat wandeni nop wan. Meriwa itani wani bem wan boge nop ere God wa atonasen.

65Pa nagire ap yawane menan tap gop anu gurane seke tan. Ap gapan ian Diudia, tunupa wanumuine nagirewa, inak mame oisewa anune menan nopewa panan wane. 66Amba waenapan inak mame oisewa anunewa, anu waramat tan manega waiwanumun, “Orup ma kai warepi anenen taiwandata?” iwa mu anune Ayop God aro amun mega orup inap wandia.

Apan Sekaraya wak gapan God wa atonasiwandin

67Boge God Guewa Woup Seniwa, Sekaraya potap taue aro amun waneni gapan wam eviwa noa namu anega wan,

68“Nu Isurero nagirewa ayop nuga God wa atonasivin.
Inanup taue vetanen.
69Watageta apanewa Devit, me God nave tainiwa,
dugup mega gamup wat inakam nimanini apanewa,
da inanup watu enen.
70Watageta God no oise waiwanumune,
imu pose woup am seni nagirewa,
dim evi tapi oisewa anega wan,
71‘Anavi nuga amba anu koeam nimanine nagirewa,
aro amun muga gapan vetaneta.’
72Anega taiwandapina,
nu omayan baewa wataget munan bagu sisi anuni menan,
wa agiat mumeni ame imu ya oaraen.
73God nu omayan baewa Eibaraam inap anega wa agiasen,
74‘Anavi ega aro amun muga gapan vetaepenawa,
ame gapan e nao nega tai, ap gapan tap da ya anune.’
75Ame gapan, nu wam wam pot pot imunu woup am sep,
ge kakae guragut God namup yonat,
inat wainet nuga gapan tainampen.
76Sekaraya God nop mega ame wani sia orup Dion anega dien,

Otunawa, God ge God Paina Iragenawa,
nop mega waingawa, otua diageta.
God waenapan megawa koewa muga anu ae vepen,
inak ewakewa munapen neginewa wadiamuingai.
Ap taingawa gapan Ayop nuga neginewa namu waringapina,
me amba taueta.
78God nugawa bagu sisi nunan anuiwan,
kaimakaet ya dianeta.
Menan wam ganat mega ewa enuini mini,
God om enuni apanewa, inanup taueta.
79Ap wamewa gapan waenapan sisipu inine nagirewa,
amba bop tawa taine nagirewa ganat nuneta.
Amba baigan negine gapan tam naune aeta.”
80Orup mega Dion Guewa aro waniwandini gapan kai ware doriwandin. Isurero nagirewa ere wadidiamopen men at kaimewa gapan iniwandin eni amba aroga tauen.

Copyright information for `DGZ