Luke 7

Iesu ita yamewa ago megawa wat inakamen

Iesu nop ameme wan uon tani ewap, me pa Kaponiam aen. Ap mepe, at Rom ita yame apanewa iniwandin. Nao mega taini da menan anuiniwa vek wa guren, konintu bop tapen taiwandin. Amba ita yame apanewa ame Iesu oit mega anuni menan Diu dimae waine nagire upi watu enamon amon, Iesu wap one vek apanewa wat inakamepen menan.

Sep amone Iesu ine tauanewa noek noek wan, anega diane, “Ita yamewa ame apan kakaewa menan onak ta warit. Iwa me nu Diu nagirewa nunan anu gureni menan, amba nu opata waine paewa da tun nunen.” Boge, Iesu ao yon wande den tanam aen. Onam wanumune ita yamewa pa mega di maniwandini gapan ita yamewa evene wai upi, Iesu diapen menan, sia watu enamon amba Iesu inap tauan oit wan, “Ayop negawa, gek anu bambam da ya ta, ne wan menan pa nega tauapan taingi, go ya taua iwa ne koerage. Endi ap menan nek inaga onge onge go ne kakae uon. Nop gega amunu den megenat wawa nao nega tainiwa inakaeta. Iwa ne, ayop nega den, apan upinewa epara muga gauarap waingina apanewa amba den ita nagire gauaranap nona wariwanum. Da ak diapena di aeta. Da onak diapena di oneta. Da nao ma ta diapena di tata. Ap menan ge wawa, ne nao nega tainiwa di inakaeta.”

Iesu nop ame anuni, me noa ase ginin wan, to entaneni boge waenapan aruga evip onamone nagirewa anega diamoni, “Ne wapena anun, anu tumat nimanegeni apane ma miniwa da at Isurero gapan ya yawan.”

10 Sep nagirewa ame ewagai sia amon pa tauane, nao apanewa ame inakae wanden yawane.

Iesu waen kwapura da otua boeni wat inakamen

11 Ap ewap, Iesu ge wadiamot megawa, amba waenapan aruga den, pa yaua Nein dot amon. 12 Iesu pa Nein tonane noa maniwandini gapan, pa nagirewa bop apane da watat gapan baraen, wat ororom warupan onam wanumun. Bop apane ame waen kwapura da otua daiton iragenawa ame boen. Pa nagirewa arugataet waen ame tautanan amon. 13 Boge, ap gapan Iesu waen kwapura ame yaveni menan bumagewa tuk wan bagu sisi arita anun, menan anega dien, “Irip ya wa.”

14 Amba Iesu aeni otua boen eragia wa panam baraene ame naniwa gapan ase inasen gapan wat amone nagire ae yonan. Boge Iesu anega wan, “Apan tamaru, ne diagiangin, ao yon wanik!” 15 Iesu ap wani boge apan bonigawa ao yon wande nip endave nop erewa wan. Menan Iesu orup ame ware inewa wanen. 16 Waenapan iravi tap baware anun God wa atonasen, amba anega wane, “Nop waini apane baware da nimakanup tauen. Nu wat inakam nimanepen men tauen.”

17 Ap menan, Iesu oit mega at Diudia amba piup ikukuk wande aeni iragi ukum ume tau aen.

Dion sep mega Iesu ine tauan

18 Dion, dup iamuini apanewa, wadiamot megawa Iesu inak aru mame taiwandini no oisewa Dion wadian. Ap anuni gapan, Dion apan dere venamu wan tauane. 19 Amo, Ayop Iesu wayawapen men namu anega wan wadiamon, “Nu amat taitoni Keriso ge me di go gare apan da ugup tauapen amase tait?” Sep apane dere nop mame anune boge Iesu wayawapen amon.

20 Iesu inap tauane anega wayawan, “Dion, dup iamuini apanewa, watu enanen. Nu amat taitoni Keriso ge me di go gare apan da ugup tauapen amase tait? Ap wayawagepen men onanton.” 21 Wam ameme gapan, sep apane dere, Iesu vek ugup ugup nagirewa wat inakam mumen airampu waenapan potamupe up oimon tau amone, yawan. Yame borat mutane nagirewa aruga watap mumeni yame i pak wan yangut sia taiwanumun. 22 Mu ap yawane menan, Iesu anega wadiamon, “Ewagai sia aisen, anenen yao anuiwaniana Dion wadian. Yame borat mutane nagirewa sia yangut taiwanum, pusiwa wabeberugaseni nagirewa ap sia amuiwanum. Vek bo'o nagirewa sia inak musiwanum, darine borat mutane sia anuiwanum. Bop tane nagirewa sia inak mutane yon wanumuiwanum. God oit mega kakaewa kayakayawan taine nagirewa wadidiamuivin. 23 Waenapan ne ya tandayat nimanegepiwa aton anuiwanumain,” Iesu ap anega wadiamon.

24 Boge Dion sep mega dere entan amone. Ap ewapewa, Iesu Dion oisewa ap mepe wanumune nagirewa anega wadiamon, “Dion yawapen menan at kaimewa pua aiseana dim da yawat anuyan? Apan da i guine aro uoni yawapen aisean go? 25 Ame uon wandepi e dim da yawapen menan aisean? Apan da wanup ganganataet eneni yawapen menan aisean go? Anun, wanup kakaewa enine ge kwan puraput nagirewa ame ayop yau taneni pa mega gapan ininewa, go at kaimewa gapan pua da uon. 26 Go endi e dim da yawapen men pua aisean? God nop mega waini apanewa da yawapen aisean go? E, me ap me. Wapena anun. Tave di Dion apan ap me di go me aigap iragenawa. 27 Me menan wataget God Dion oisewa wani ok anega seane,

Wapena anun.
Ne oit nega wapi apanewa namu watu enain,
negin genan wareta.”
28 Iesu sia anega wan, “Menan ne wadiaepena anun, waenapan iragi yanane yaumakamup Dion megenat aigap. Go kiman gueguewa iup ewakewa gapan ame, evi amba God toemu mega gapan orup da God nave otu kamontu iragena tapi watat aigapewa wareta, go Dion me gauarap wandeta iwa Dion iup namua gapan taueni apanewa.”

29 Iesu ame waiwandini waenapan amba moni bongamine nagirewa den darine entap anun amba iragi umap wan anega wane, “God nop mega tavewa di.” Iwa mu namua God anu tumat tane gapan, Dion inap amone dup iane. 30 Go Parisi ge iup wadidiamuine nagire, God munan anuini tandayasene iwa Dion dup iamopen men ya amon.

Iesu den wanumuine nagire gueguewa

31 Iesu sia wadiamon, “Endi piup mame gapan iniana nagire guegue ega anen wapena amba om ineta? E inak ega anenen? 32 E orup otu pa pa namboya kae taine umap. Mu gare isewa mawa anega noyam pot poraet waiwanum, ‘Nu sinao tuivin go e tarep ya taiwanin. Nu urai angingin waivin go irip ya waiwanin.’

33 Tavewa ame mam, Dion waenapan dup iamuini apane yoneni God men taba virip viwandin kaum wain da ya nan. Ap tani menan e noyam anega wayan, ‘Airampu da potap wandia.’ 34 Go ne Kimani Vitana Apanewa tauana taba kaum wain den naingin menan anega noyam wayan, ‘Ase kem kem yawan! Me taba paututuma naiwan amba kaum wain pot pot naini menan bumbawam taiwan. Amba den moni bongamini ge inak koewa taine nagirewa evenan tan.’ Menan e noyam pot poraet waiana nagirewa. 35 E ap anega waiwanin go God nop mega tavewa di wandia. God dim da da me waenapan gamumup ta oniwandini ame God anuini taine nagirewa mu wa ewamoin.”

Waen koeragewa Iesu pusiwa bigi guren

36 Wam da, Parisi apane da Iesu den mum gine tabaewa napen men vene wan onen. Iesu pa mega taueni taba napen menan ae wanden.

37 Pa sewa ame gapan, koewa taini waenewa da wanden. Iesu Parisi apane pa mega gapan taba naiwandin oisewa anuni menan me kaum pokari da gwat gapan kaitane kaum tutu dena ame damage ware tauen. 38 Iesu aup parata ine taba naiwandini gapan waen ame Iesu pusip ae yone irip waiwandin. Irip waiwandini yame doge vise Iesu pusip enun. Amba waen ame i gume nononga gapan Iesu pusiwa muse darakamen. Pusiwa ua ton amba kaum tutu dena aigap wa damagen.

39 Ap gapan, apan Parisi, Iesu onat wani apanewa, waen tani yaveni mek ingane anega wan, “Apan ma God watu enep nop oit mega waini apane wandepo waen mame wakaiseni me koewa taini waenewa anupo.” 40 Iesu nop megawa anuni menan, gare anega wadien, “Apan nega Saimon, nop wadiagepena anu.” Saimon gare wan, “Wadianet negawa, anenen anuingi? Wadianek.”

41 Iesu maibe gapan sia wan, “Apan dere moni amase taini apanewa da inap amo mup wane amba moni ase ma totnagen. Moni amase taini apanewa moni baware 500 totnagen apan daiton wanen amba dawa moni otu koentu apane dere apan da aonagaet (50) totnak wanen. 42 Garewa sia wanapen wamewa taueni. Go apan dere ame moni totnagene, moni amase taini apanewa ise sia wanapen menan umap uon. Ap menan moni amase taini apanewa puakewa mugawa ase musen, moni sia ya wanapen menan diamon. Ap menan orup ansena moni amase taini apanewa inap aton aigap anuta?”

43 Iesu singui wani Saimon gare wadien, “Apan ap moni puakewa mega baware inape anu ae veni me aton aigap anuta.” Saimon wani Iesu gare wadien, “E, tave di waiagi.” 44 Wani boge Iesu waen inap entane Saimon sia anega wadien, “Waen ma yavingi. Ne pa gega tauana pusina bigi warapen kaumewa ya nenaan. Go waen mame, me yame doge gapan pusina puakame amba i gume gapan mut darakamen. 45 Ne tauana gaunana ta ua ya tonegean go waen mam ayamat nega baware tan pusina ua toiwandin en wandia. 46 Amba den Diu gutut nuga menan ya anuan, ame ganip kaumewa ianap ya geman. Go waen mam kaum tutu dena pusinap gemen. 47 Ap menan wapena anu. Ne waen mam koewa mega aruga ise wat mutana menan me gare ne inanap baigan arita tan. Go waenapan koewa muga aruga uon God anu ae veni mu gare otu da megenat God menan anuiwanumun.”

48 Iesu nop ame wani waen inap sia wadien, “Ne koewa gega gaset ise wat mutan.” 49 Iesu ap wani menan waenapan upi den tauan ap mepe taba naiwanumune mugenat anega wawa mutan, “Ma apan ansena da tauen, amba waenapan koewa muga ise mutat waiwan?” 50 Go Iesu waen inap sia wadien, “Anu tumat nimanegeana menan inak ewakewa wariagi. Yaema baigan gapan ak.”

Copyright information for `DGZ