Romans 9

God Diu nagirewa anu om enumon

Bagu sisi nega baware wam wam bumagana tuk wapen taiwan ya bigariwan. Ne Keriso megawa, tave di waivin ebo ya waivin. Nek imuna nega den tave di waiwan, God Guewa Woup Seniwa imuna kwayup taini menan ne aopan ya waivin. Bagu sisi nega iwa mega ame Diu nagirewa, nu denip daitonawa, go mu Keriso tandayasine menan, munan baita da ya anuivin. Mu God wanene mega ya tautanapen menan anuivin, garewa ne apan koerage dianegepo amba ap menan ne Keriso den intum ya tapo ame ne aton di anupo. God mu om enumon otu waiwa diamon, amba me oya oya mega to ewamon, kakae guragut mega munat wa agiat mumen. Nop mega namua Mosis iup seni den munen. God inap wa taragasepen guegue wa ewamon. Watageta God anu tumat ta kakayasene nagirewa, mu Diu nagirewa omae baewa. Keriso den, Diu denip daitonawa entanen amba nu inak nunapen menan piup gapan tauen. Ap menan God yaua ao warat, me waenapan iravi Ayop mugawa, kaewa kaewa yaibobot wande aiwandata, ame umap!

God Diu nagire waenapan mega tapen menan wa agiat mumeni agi ameme uon ya tat waivin iwa denimu gapan mu Diu nagirewa di go upi Diu iragena da uon iwa God agi megawa ya anu tumasen. Ap umap sia Diu nagirewa upi apan Eibaraam naewa iragena da uon. Iwa God Eibaraam anega wadien, “Otuga eviwa Aisik gamup naewa ame gapan batnagingain, go otua namu yaneni, Isimero, gamup ame uon.” God anega wan. Nop ame gueguewa mam, Eibaraam otu waiwa mek anuni gapan seni, God otu waiwa ya diamon. Go Eibaraam otu waiwa da da God wa agiaseni gamup seni God otu waiwa diamon. God Eibaraam orup wanat wa agiaseni manega wan, “En daiton uon tap amba sia ongain ap wamewa gapan waenaga Sera orup apan baraeta.” Anega wan.

10 Guegue da sia mam. Eibaraam otua ame nu omayan baewa Aisik, me waenewa Rebeka, dere inane amba waen bagup tan orup apan dere naturup sen. 11 Orup dere di go God mek anuni gapan orup daiton namu om enuni noa ya topakisepen menan inewa anega wadien, “Tasewa yone gwaniwa agoe tata, menan me gauarap wandeta.” God anega wani wamewa orup dere ame, mu inamu potap wanumune, da ya yanen, da kakaewa o koewa da ya tan. Menan God orup daiton ame wam eviwa menan namu om enun. Orup ame dim dim mek tapi menan om ya enun, go God mek anuni gapan om enun. 13 Nop tase gwani menan ok anega sean,

Ne Diekap menan anu guran go me tasewa, Iso, ne anu koeamen.
14 God ap anega wani menan nu anenen wait? Me Iso anu koeamet wani menan God koerage diait? Ae, koerage uon. 15 Iwa me Mosis anega wadien,

Ne waenapan munan baguna anupena di anuin,
munan bagu sisi anupena di anuin.
16 Ap menan nuk anuton taitoni gapan ya venasiwan go God bagu sisi inanup anuini gapan venasiwan. 17 Watagaet God, Idip ayopewa, Pero dieni ok anega sean,

Ne iwa dim men at mame ayope bat gimagen?
Ge gamugap waenapan ne aro nega yawain,
at gapan at at iragi ne epara nega yao anuin,
God anega Pero dien.
18 Ap menan God mek anuni gapan waenapan upi bagu sisi inamup anuiwan upi nop mega ya anupen men me wani gapan mu imumu gware wan.

God inanup bagu sisi ge ugu gangan anuiwan

19 God mek anun taini menan e da da anega wadianegai, “Iwa dimen sia enu yawanen waiwan? God mek anuni di tata, da wataneta?” 20 Wane ne gare anega wadiain, “E aro da di go, anen amba God inap nipep waiwanin?” Unup taine nagirewa unup muga yone anega ya diamota, “Iwa dimen manega tanegean, ne tanda?” 21 Unup taini apanewa motok nanip wandepi gapan semu wadume barip gapan megenat danamepen unupewa tap, semu dawa pot poraet danamepen unupewa tap, mek anut mega di taiwan, iwa motok megawa di.

22 God guegue unup taine nagire ap mini sia. Koerage taine nagirewa mu koewa muga menan, God amun aro mega amba ugu gangan mega, dere ewanepen menan mu gut koeam mumepi wanene tamopen anun, go gare me yaentuk mantuk wande en. 23 Amba yamunewa ame bagu sisi nunan anuiwan amba me oya oya mega baware ewanepen menan anun, nu koerage tainton nagirewa go at mega kakaewa kimaniwa anepen menan wat tamanam nimanen. 24 Menan nu waenapan megawa, Diu nagire nugenat uon go Diu uoni nagirewa nimakamup den, nunan wan tauaton. 25 God Diu uoni nagirewa munan wani apan Osea ok anega sen,

Namu mu waenapan negawa uon go evi mu den waenapan nega amba diamoin.
Namu munan ya anu gurina nagirewa go endi munan den anu gurivin.
26 Wataget ok anega seane, E waenapan negawa uon,
waenapan ap anega waiwanumune,
go endi God wande bobot apanewa otun wai diamuiwan.
Osea ok ap anega sen.
27 Den apan Aisaya at Isurero nagire munan anega wan,

Mu arugataet puiman gerase umap wanum am,
go God otu dere megenat wat inakam mumeta.
28 Iwa Ayop nuga God piup nagirewa koewa muga garewa,
menawaet kaimake den munapen taiwan.
29 God evi tapi noa Aisaya namu anu anega wan,

Ayop nuga baware iragena God naewa nuga upi kwayup ya tanepo,
nu pa Sodom ge Gomora gut koeam mumeni mini gut koeam nimanepo.
Aisaya ap anega wan.

At Isurero nagirewa Iesu oit mega ya anu tumasen

30 Endi nu anen wait? Diu uoni nagirewa God kakae diamopen menan yop ya ta anun go God inap anu tumasene menan God mu kakae diamon. 31 Go Diu nagirewa, God iup mega mu inamup taueni menan, iup ame gamup God kakae diamopen menan yop taiwanumun go inak ame ya tautanane. 32 Iwa dimen ya tautanane? Iwa mu tat muga kakaewa gapan, God kakaewa nagirewa diamot anune, go anu tumat neginewa tandayasen. Ap menan God agim bawarewa ae baraeni, negina wandeni menan sintanamon geamon. 33 God nop mega gapan agim ame menan ok manega sean,

Wapena anun, ne pa sewa Ierusalem gapan,
agim da waenapan sintanamopen men barain.
Inap tauepi sintanamota.
Go orup da me inap anu tumat taiwandapinawa,
gare tap gop da ya anuin.
Copyright information for `DGZ