1 Corinthians 1

Lokagutoki

'Abo'agu Yaubada 'iesinuwegu be 'aene Yesu Keliso tetelina 'ana tosimana, 'omi me Kolinita toekalesiyao 'imi leta gete tasidai Sositeni 'ilemegu ga ya'etoladinawa, manuna 'omi ni'atu Yesu Keliso 'igie'esasemi ga 'ina boda esiesinuwadi 'ediya waluguma ga wamiyami, taudi wate Yesu Keliso 'ana esanega ma'emiyao wa'awa'awanoi, taudi sena maibo'ana 'ediyega ma'edao 'ida 'Inapwana 'ebweuna tuga, tauna Keliso. Ta 'ida 'Inapwana nina Yesu Keliso be Tamada Yaubada 'idi 'atenuwa'ole'ole 'emiya 'enega wada miya gwausowala.

Ona'ai'aila, Yaubada 'i'atenuwa 'ole'oleyemi ga yage yauna bobo'adi 'i'ebwa'emi, nadigega 'imi ona bobo'adi be 'imi mwalatoi bobo'adi Yesu Keliso 'enega. 'Enega tuta yauyauna manumi yalokagutoki Yaubada 'enaya. Ta wate yalokalokagutokiyena manuna Keliso nina wa'awa'ai'ailena ga tetelina waemisena, ta wate Yaubada 'ina 'ebwaya bobo'adi maibo'adi 'emiya simiyami, tuta gete wayamwayamwa 'ida 'Inapwana Yesu Keliso 'ina apwesa limanama manuna. Manuna tauna 'igiegie pa'alimi be 'ana laba 'asiyata nina 'iila limanama.

Ona'ai'aila Yaubada ma 'ana emisa sinabwana, manuna 'ibwauyemi ga natuna, tauna 'ida 'Inapwana Yesu Keliso, ma'emi waegosigosiyana.

Geya'abo weyala siapweapwesa toekalesiyao 'ediya

10 Tasigwao, gete 'igu loguguya 'emiya 'ida 'Inapwana Yesu Keliso 'ana esanega be 'aene wanuwanuwa leleleya be waona leleleya, ta esi geya'abo waegewagewana nai waweyaweyalimi. 11 Manuna 'aidi Kiloe 'ina bodao ni'atu sieonegu 'imi egewagewana manudi. 12 Manuna 'aimi wagwae, “'Abo'ama Paulo 'ina boda,” ta 'aimi wagwae, “'Abo'ama Apolosa 'ina boda,” ta 'aimi wagwae, “'Abo'ama Pita 'ina boda,” ta 'aimi wagwae, “'Abo'ama Keliso 'ina boda.”

13 Geya'abo Keliso 'enega taweyaweyalida, manuna taunamo manumi sigiekelosena ga 'ana esanega wabapitaiso, ta nigeya 'agu esanega. 14 'Igu lokagutoki Yaubada 'enaya gete, manuna nigeya yaumi yagiegie bapitaisoemi. Nate namo Kilisipo be Geyo. 15 'Enega geya'abo waonaona be wagwaegwae, “'Abo'ama Paulo 'ina boda, manuna Paulo 'igiebapitaisoema.” 16 Ona'ai'aila, taudi wate Sitipana 'ina susu yagiebapitaisoedi. Nai taudi namo. 17 Manuna 'igu guinuwa Keliso 'i'ebwa'egu tetela bobo'ana 'ana loguguya namo manuna, ta nigeya giebapitaiso. Ta wate loguguya nina nigeya 'igu sinasinapuyega, 'abona nai Keliso 'ina mwawasa kelose 'enaya tetelina yagienenetei.

Keliso 'ina mwawasa kelose 'enaya

18 Ona'ai'aila, kelose tetelina taudi yaluyaluwadi mwawamwawasidi si'awa kabokaboei, ta esi 'abo'ada taemisena 'aene Yaubada 'ina waiwai tetela nina 'ena 'imiyami, ga 'enega 'i'etoseyeda. 19 Gete manuna Buki Tabu 'ena 'isimana, 'igwae,

“Taudi tomwalatoiyao be tosinasinapuyao 'idi nuwanuwa yaguitoyasedi be yaloesawalidi.”

20 'Enega mwa'adega taudi tosinasinapuyao? nai taudi toe'itao? nai taudi tologuguyao gete tuga bale'uya simiyami? Ona'ai'aila, ni'atu Yaubada 'idi sinasinapuyao 'i'awa yage besobesoedi. 21 Manuna sinasinapu bale'u geya'abo sa'i 'enega Yaubada tamwalamwalatoni.

Ta esi Yaubada 'ina nuwanuwa, ta 'ina tetela 'ana loguguya namo 'enega, 'ana toemisao 'abo'ada 'i'etoseyeda. Tetela nina me bale'u sieyage besobesoena,
22 manuna me Yudia nuwanuwadi 'ebweu we'iwe'iyaya sida 'ita, ta taudi nigeya me Yudia sinasinapu si'ebe'ebesa, 23 ta 'abo'ada esiya tetela nina taloguloguguyae, Keliso 'ina mwawasa kelose 'enaya namo manuna, ga 'enega me Yudia siguitoyasena, ta wate mali bodao tetela nina si'awa yage besobesoena. 24 Ta esi 'abo'ada Yaubada 'ana toemisao 'iesinuweda, boda Yudia be mali boda 'ediyega, ga Keliso 'enega Yaubada 'ina waiwai ta 'ina sinasinapu 'i'ebwa'eda. 25 Manuna to'ase Yaubada 'ina guinuwa nenetana nai gidalina, tomota 'abo'ada 'ida waiwai sinabwadi 'iewaiwai sinedi.

26 Ta tasigwao wanuwa'i'isi 'aene taudi Yaubada 'iesinuwedi 'emiyega yaudi nigeya bale'u 'ana tomwalatoiyao, nai 'ana toewaiwaiyao, nai 'ana 'inapwanao, 27 ta esiya yaudi uwauwadi 'iesinuwedi, ga uwauwadi nidi bale'u 'ana tosinasinapuyao sigie omayamayaedi, ta wate bale'u 'ana tonenetao Yaubada 'iesinuwediya, ga taudi wate toewaiwaiyao siewaiwai sinedi. 28 Ta wate me bale'u Yaubada 'ina guinuwao si'awa yage besobesoedi, ta sa'i Yaubada 'ina guinuwao 'ediyega 'idi yage maibo'ana 'i'ausepaledi. 29 'Enega nigeya 'ebweu wate tomota sawesawenaya be 'ionalaga Yaubada matanaya. 30 Manuna Yaubada tauna 'ina guinuwega Yesu Keliso ma'eda tae'ebweu, 'enega Yaubada 'ina sinasinapu Yesu nina 'isa'u balenaya 'edaya, manuna Yesu tauna 'italiyaena manuda, ga 'enega 'igie'esaseda, ta 'igiepaepaluyeda.

31 Buki Tabu 'ina simana yage gete manuna 'igwae,

“'Abo yaita nuwanuwana be 'ilotuputupu, 'ida 'Inapwana namo 'ida tupu.”

Copyright information for `DOB