1 Corinthians 12

Yaubada 'ina eguyai yaluyaluwada manudi

Gosegwao, nuwanuwagu be Yaubada 'ina eguyai yaluyaluwada manudi yali'ami be wada mwalatoni. Manuna lowa sena guguyoi 'ena wamiyami ta mali 'ebe bwagobwagoyao 'ediya watagwatagwalemi, taudi nigeya sawesawenaya be siona, ta sikabokaboemi. Ta esi gete tuga 'abo yaisigedi 'omi Yaubada Yaluyaluwana 'emiya 'imiyami, geya'abo Yesu walo'alo'aegile, ta esi wada 'awa'Inapwane, manuna nigeya 'ebweu yaita sawesawenaya be Yesu 'i'awa'Inapwane 'abo nigeya Yaluyaluwa Tabuna 'ena 'imiyami.

Yaluyaluwa Tabuna nina 'ebweuna namo, ta esi 'ina eguyai 'edaya dumadumana be dumadumana. 'Ida 'Inapwana nina wate 'ebweuna namo, ta esi 'ina paisewa taguiguinuwedi dumadumana be dumadumana, ta 'aledi 'ebweuna namo tuga, nate Yaubada, manuna tauna yage maibo'adi 'adi guinuwao 'igieapwesedi.

Ta Yaluyaluwa Tabuna 'ina eguyai 'ebweuna 'ebweuna 'edaya nate maibo'ada 'ada lema manuna, ta esi dumadumadi, manuna tomota 'ebweuna 'ana egueguyai mwalatoi, be 'ebweuna sinasinapu, be 'ebweuna emisa, be 'ebweuna gile'oasa, 10 be 'ebweuna yage 'ebe nuwaowana 'ana guinuwa, be 'ebweuna loguguya, be 'ebweuna mali yaluyaluwao 'adi 'inana 'aene bobo'ana nai to'umalina, be 'ebweuna wate mali 'enana sawesawenaya be 'ediyega 'ioona, be 'ebweuna wate 'enana nidi 'ana gibui. 11 Egueguyai getedi yaluyaluwa Tabuna tauna 'iesinuwa, ga 'ieguyai 'ebweuna 'ebweuna 'edaya, ta 'i'ebwa'eda be nadigega tada guinuwa'esa.

Oona 'ebweuna ta welawela'anao yaudi

12 'Abo'ada 'atuwa oo 'ebweuna manuna tamwalatonina 'aene oo 'ebweuna, ta welawela'anao yaudi. Oo nina nate Keliso ta welawela'anao nidi 'abo'ada. 13 Manuna maibo'ada ni'atu tabapitaiso, yaluyaluwa 'ebweuna 'enega, ga ni'atu taeboda 'ebweuna. 'Abo'ama me Yudia be 'omi mali senao 'ediyega, be tomiya mwau be tomiya bobo'ana, ta ni'atu maibo'ada taeboda 'ebweuna Yaluyaluwa Tabuna nina 'edaya 'imiyami 'enega.

14 Ona'ai'aila, oo welawela'anao nigeya 'ebweuna ta esi yaudi ta dumadumadi. 15 'Enega 'abo 'ae 'igwae, “'Abo'agu nigeya oo 'ina boda 'ena yamiyami, manuna 'abo'agu nigeya nima,” 'ina ona nina getei nigeya ona 'ai'aila.

16 Wate nadigega 'abo tena 'igwae, “'Abo'agu nigeya oo 'ina boda, manuna 'abo'agu tena, ta nigeya mata,” tena 'ina ona getei nigeya ona 'ai'aila, 17 manuna 'abo mata daisinamo, nigeya kapekapeyana be 'ida nono, ta wate 'abo tena daisinamo nigeya kapekapeyana be maina 'imui, 18 ta Yaubada gete nadigega 'inuwena ga welawela'ao maibo'adi 'idi guinuwa 'i'ebwa'edi.

19 Manuna 'abo welawela'a 'ebweuna namo, nate nigeya oo maibo'ana. 20 'Enega oo 'ebweuna namo 'ibubuna ta esi welawela'anao yaudi.

21 'Enega nigeya sawesawenaya be mata 'ioona nima 'enaya, be 'igwae, “Geya nuwagu 'oyo.” Ta wate nigeya sawesawenaya be deba 'ioona 'ae 'enaya, be 'igwae, “Geya nuwagu 'oyo.” 22 Ta 'aidi wate ooda welawela'anao 'adi 'ita 'atuwa nenetadi, ta esi 'idi paisewa sinabwana ooda 'ana lema manuna. 23 'Aina wate welawela'adao, geya'abo tatuputupudi nai manudi taomayamaya, ta esi ta'ita'i'isidi be ta'aubwasadi, 24 ta nigeya welawela'adao maibo'adi 'adi 'ita'i'ita nadigega. Manuna Yaubada ooda 'imweluluina be 'aene welawela'anao nidi taudi nigeya 'adi tupumo tada 'ita'i'isi 'ai'ailidi.

25 Be 'enega geya'abo weyala 'iapweapwesa ooda welawela'anao 'ediyega. Ta esi maibo'adi sida eleleleya be maibo'adi sida elemalema 'ida guinuwao 'ediyega, 26 manuna 'abo welawela'ada 'ebweuna 'iuuya ooda wate maibo'ana si'elouya. Wate 'abo welawela'ada 'ebweuna ma ina gwausowala ooda wate maibo'ana sigwausowala. 27 'Enega 'ebweuna 'ebweuna 'abo'ada Keliso welawela'anao, 28 manuna 'ida guinuwao ekalesiya solanaya dumadumadi be dumadumadi, Yaubada 'ieguyaiyedi 'edaya, nugana taudi Keliso 'ana tosimanao, be muliyega Yaubada 'ina ona 'ana tologuguyao, muliyega toe'itao, be yage 'ebe nuwaowana 'adi toguinuwao, be togile'oasao, be tolemao, be toanuganao, be taudi mali 'enanao 'adi toonao.

29 Manuna nigeya sawesawenaya be maibo'ada paisewa 'ebweuna tuga 'ena taetoguinuwa Keliso manuna, nai taetosimana, nai taloguguya, nai tae'ita, nai yage 'ebe nuwaowana tagieapwesedi, 30 nai togile'oasa, nai mali 'enana 'enega taona, nai mali 'enana be mali 'enana tagibui. 31 Guinuwa getedi maibo'adi Yaubada 'ieguyaiyena 'edaya, 'enega 'ilobwenemi be wada nuwanuwa egueguyai bobo'adi manudi, be wate 'eda bobo'ai'ailina yada e'itami, nate oboboma.

Copyright information for `DOB