1 Corinthians 14

Mali 'enana 'adi toonao manudi

'Enega 'ilobweneda be tatoo waiwai be tada eobooboboma 'ai'aila, ta wate tada toowaiwai be Yaubada Yaluyaluwana 'ina egueguyai 'edaya tada lobadi, ta esi egueguyai 'ebweuna bobo'ana wawasae, nate loguguya Yaubada 'ina ona manuna.

Ta 'ebweu wate egueguyai nina tomota 'ediya, nate mali 'enanao 'adi tala manudi. 'Abo mali 'enana 'ediyega taonaona, nate sa'i Yaubada namo 'enaya taonaona, ta nigeya tomota 'ediya, 'enega ona nidi 'adi mwalatoi tomota 'ediya kwanikwanina, be gete Yaluyaluwa Tabuna 'ina waiwaiyega mwalatoi kwaikwaiyina taonaonaedi, 'enega tomota nigeya sida nuwasabwalena. Ta 'eguma taloguguya tomota 'ediya, be 'ida ona 'enega sinuwa sabwalena, nate 'adi lema, 'atepatu be gwausowala manudi. Ta 'abo yaita mali 'enana 'enega 'ionaona, nate taunamo tuga 'ilemelemei, ta esiya 'abo tologuguyao sioona toekalesiyao 'enadiyega nate maibo'adi 'adi lema.

'Abo'agu nuwanuwagu be maibo'ami mali 'enana 'ediyega wada onaona. Ta wate nuwanuwagu sinabwana be wada loguguya, manuna tologuguyao 'idi guinuwa yage sinabwana, ta ona mali 'enanao 'ediyega nigeya yage sinabwana, ta esi 'abo 'ebweu togibui 'imiyami be ona nidi tauna 'igibunidi, nate yage bobo'ana toekalesiyao 'adi lema manuna.

'Enega gosegwao wada nuwa'i'isi 'abo yawawai 'emiya, be mali 'enana 'enega yaonaona 'emiya, nai geya'abo lema 'enega walobaloba. Ta esi 'abo yawawai 'emiya be lotoona auwauna nai mwalatoi nai loguguya nai e'ita ya'ebwa'emi, gete 'ebe lema 'emiya.

Nadigega 'abo sinaa nai pate tomota siunu besobesodi, nigeya sawesawenaya be siwali bobo'ana.

Ta wate 'abo yaita yoguli 'imu'emu'e besobeso, gwane 'ana mwalatoi nigeya sana tamwalamwalatoni, nai losaiya manuna, nai to yage 'ana bwau manuna.

'Abo'ada wate nadigega, 'abo nigeya taonaona palupalu 'iabe geya'abo wate tomota 'ida ona nidi sinuwanuwa sabwalenidi, manuna 'ida ona nidi 'atuwa galala besobeso.

10 Ta ona'ai'aila, bale'uya 'enana yau wawasae simiyami, ga sena 'ebweuna 'ebweuna toni'asao taudi 'enadi simwalamwalatonidi.

11 'Enega 'abo mali senao 'enadi nigeya yamwalamwalatoni, 'abo'agu 'atuwa 'owaga yaemwagemwage, 'enega nigeya sawesaweguya be 'enadi yamwalatonidi. Ta taudi wate nigeya sawesawediya be 'igu ona simwalatoni.

12 Kagutoki gosegwao, ni'atu nuwanuwami be Yaubada Yaluyaluwana 'ina egueguyai 'emiya wada 'ewadi, 'enega 'ilobwenemi be wada too be 'ami egueguyai nidi 'ediyega toekalesiya wada giewaiwaiyedi.

13 'Enega 'abo yaita 'emiyega mali 'enana 'ediyega 'ionaona, 'ilobwenena be 'ida sidasida Yaubada 'enaya be mwalatoi 'ida loba, be 'enega 'ina ona 'ida gibui.

14 Manuna 'abo mali 'enana 'enega yasidasida, 'enana nina 'ana mwalatoi nigeya yamwalamwalatoni, manuna yaluyaluwagu namo 'isidasida, ta esi 'igu onao nidi nigeya yamwalamwalatonidi, to'ase manudi yaonaona. 15 Ta 'ilobwenegu be ma igu mwalatoi be wate yaluyaluwaguyega yada sidasida, ta yada wali tuputupu Yaubada 'enaya yaluyaluwaguyega ta wate ma igu mwalatoi. 16 'Abo yaita 'oyo yaluyaluwayo namo 'enega 'ulotuputupu, mali 'enanega, ta nigeya 'umwalamwalatoni, be gosemwao wate nigeya sinuwanuwa sabwalena, 'enega taudi geya'abo siloeimeni. 17 Lotuputupu nina bobo'ana, ta esi gosedao nigeya 'ida lemedi.

18 'Enega yalokagutoki Yaubada 'enaya manuna mali 'enana 'ediyega yaonaona wawasae, 19 ta esi tapwalolo 'enaya, nuwanuwagu be ona nina yamwalatonina 'enega yada simana kukupana tuga, be tomota yada e'itadi. Ta geya nuwagu be mali 'enanao 'ediyega tapwalolo 'enaya yaonaona wawasae, manuna ona nidi tomota nigeya simwalamwalatoni.

20 Gosegwao, geya'abo 'imi nuwanuwa gogama nadigega, ta esi wada nuwanuwa tai sinabwadi nadigega. Ta geya'abo guinuwa to'umalina manudi wanuwanuwa be 'aene wamwalatonidi.

21 Manuna Buki Tabu solanaya Yaubada 'ina loina 'ebweuna 'imiyami, 'igwae,

“ ‘'Owagao ma'etamo simamai be mali 'enanao 'ediyega 'igu bodao 'ediya 'igu ona sida simanedi, ta esi geya'abo sa'i 'igu onao nidi simulimuliyedi,’ Yaubada 'ina ona gete nadigega.”

22 Manuna mali 'enanao nidi dumadumadi 'ediyega taonaona, nate we'iwe'iyaya nigeya taudi toemisao manudi ta esiya taudi nigeya siemiemisa manudi. Ta Yaubada 'ina ona 'ana etosimana nate lema toemisao dimo manudi. 23 'Enega 'abo'ada toekalesiyao 'abo tapwalolo manuna tadeli egogonama be mali 'enanao 'ediyega taonaona, be 'aidi taudi nigeya Yesu 'ana toemisao silulugu be 'enada kwanikwanidi sinonodi, nai sida nuwanuwa 'aene taekabaleya, aga? 24 Ta 'eguma maibo'ada Yaubada 'ina ona taguguyae be 'aidi taudi nigeya Yesu 'ana toemisao siluguma be guguya nidi 'enadiyega sinonodi, sida sinuwa'ebuni be si'awa'ai'aila, 25 be 'enega 'idi yalakwaiya manudi sida nuwamwau ma idi omayamaya, ta Yaubada matanaya sida be'u sanamwa'uta be 'enaya sida bwagobwago be si'awa'ai'aile, be 'enega sida gwae, “Ona'ai'aila, Yaubada ma'emi wamiyami.”

Lotapwalolo 'ana 'eda

26 Gosegwao, 'abo tapwalolo manuna walulugu, 'ebweu tai wali 'ida alalagasi, 'ebweuna 'ida e'ita, 'ebweuna lotoona auwauna 'ida simana apwese, be 'ebweuna mali 'enana 'enega 'ida ona, be 'ebweuna ona nina 'ida gibuni, be 'enega guinuwa nidi 'ediyega boda sida lemedi. 27 Ta 'abo mali 'enanao 'adi toonao simiyami, bobo'ana 'abo site luwa nai site toi, 'ebweuna 'ebweuna 'ediyega sioona. Ta wate togibuiyao sida miyami be ona nidi sida gibunidi.

28 Ta 'abo 'enana nidi nigeya 'adi togibunimo, geya'abo 'ebweu yaita mali 'enana 'enega 'ionaona apwesa lotapwalolo 'ana tutaya, ta esi taunamo 'enaya ta wate Yaubada 'enaya 'ida ona.

29 Ta wate tologuguyao 'eluwa nai 'etoi sida ona, be 'enega maibo'ami 'idi ona nidi wada nonodi, be manudi wada nuwanuwa. 30 Ta 'abo 'ebweuna tai tapwalolo solanaya 'imiyami be mwalatoi auwauna 'iloba, 'ida toolo be yage nina 'ida simana apwese, be tologuguya nina 'ida 'alaenono. 31 Ta maibo'ami sawesawemiya be 'ebweuna 'ebweuna nuwanuwa bobo'ana 'ediyega wada loguguyae, be wada giepa'alimi. 32 Ta tologuguyao yaluyaluwadi taudimo siloiloinedi, 33 manuna Yaubada 'iloiloina palupaluyeda ta nigeya 'ikwanikwaniyeda, 'enega ma ida gwausowala tada lotapwalolo.

34 Ta iine 'omi, 'ilobwenemi be tapwalolo 'enaya wa'alaenono tuga be ona wanonodi. Manuna Buki Tabu 'enaya Mosese 'ina loina iine manudi gete nadigega, ta wate nadigega loina toekalesiyao manudi sena maibo'ana 'ediya. 35 Ta 'abo iine nuwanuwadi be to'ase sida mwalatoni, sawesawediya be 'idi anuwaya mwanediyao sida enaidedi be taudi sie'itadi. Manuna 'abo iine siona tapwalolo 'enaya, 'ebe omayamaya 'edaya. 36 Ta geya'abo wanuwanuwatu'e 'aene taumimo 'emiya Yaubada 'ina ona 'iapweapwesa, nai taumimo 'emiya 'imiyami.

37 Ta wate 'abo yaita 'inuwena 'aene tauna Yaubada Yaluyaluwana 'enaya ga 'ina mwalatoi 'i'ebwa'ena, nugana 'ida gimimwalatoni 'aene 'igu ona leta gete 'enaya yaetunenawa, nate Yaubada 'ina loina 'emiya. 38 Ta 'abo yaita ona nidi geya nuwana, tuwa tuga 'ina emwagemwage nina 'enaya 'ida miyami. 39 'Enega gosegwao, 'ilobwenemi be watoo waiwai be Yaubada 'ina ona wada simana apwese, ta mali 'enana 'adi onao manudi geya'abo wa'eto'etobode tapwalolo 'enaya. 40 Ta wate yage maibo'adi palupaludi ta bobo'adi 'imi tapwalolo 'ediya wada guinuwedi.

Copyright information for `DOB