1 Corinthians 15

Keliso 'ina toololimana manuna

Gosegwao, tetela nina ni'atu yasimanena 'emiya, wanuwa'i'isi 'aene lowa 'atemi watagwalena tetela nina 'enaya, ga 'igiepa'alimi be 'enega 'ami 'etoseyana 'ena waloba, 'abo tetela nina wagiyai'i'isi. Ta 'abo nigeya wada giyai'i'isina, 'imi emisao nidi yage besobeso.

Tetela gete 'alena ya'ita lobena 'enega yasimanena 'emiya 'aene Keliso 'ida to'umalinao manudi 'imwawasa, nadigega Buki Tabu 'ina simana, ga sisa'u 'ali'aliyena ta 'asiyata 'etonina 'enaya 'itoolo limana, nadigega wate Buki Tabu 'isimana.

'Itoolo limana ga Pita 'i'itena ta wate 'ana tosimanao site tuwelo si'itena. 'Ebweu tuta 'enaya gosedao wate site paibi analedi si'itena. Boda nidi 'ediyega yaudi gete tuga simiyami, ta 'aidi sikwaiya.

Yemesa wate 'i'itena, ga wate Keliso 'ana tosimanao maibo'adi si'itena. Ga 'ebe losalowa 'abo'agu wate ya'itena, ta esi 'abo'agu 'igu tubuwa 'ebe nuwaowana, nigeya nadigega taudi 'idi tuta silobena ga situbuwa. Ta wate 'abo'agu tai to'umaligu. Manuna Yaubada 'ana toemisao yagie'elouyaedi 'enega Keliso 'ana tosimanao maibo'adi sibobo'ana sinegu. 10 Ta esi Yaubada 'i'atenuwa 'ole'oleyegu ga 'ilemegu. 'Enega nigeya 'ilemalema daidaitegu, manuna ni'atu yaemisa 'ai'ailena ga tosimanao maibo'adi 'idi paisewa yapilisinena, nigeya taugu 'igu waiwaiyega, ta Yaubada esiya 'ina oboboma 'eguya 'enega.

11 'Enega tosimanao nidi 'emiya ni'atu siloguguya, ta 'abo'agu wate ni'atu 'emiya yaloguguya, ga ni'atu Keliso waemisena.

Toolo limana manuna

12 'Ima loguguya 'emiya 'asimanena 'aene Keliso mwawasega 'itoolo limana, ga waemisena. Ta to'ase manuna ga 'aimi waona 'aene tomota nigeya sawesawediya be mwawasega sitoolo limana?

13 Manuna 'abo tomota geya'abo mwawasega sitootoolo limana, Keliso wate mwawasega geya'abo 'itootoolo limana, 14 'enega 'ima loguguya nidi tuga yage besobeso, manuna Keliso waemisa yogenena. 15 Ta wate 'abo'ama Yaubada 'ana tosimanao 'akaboemi 'ima onao nidi 'ediyega, manuna 'agwae, “Yaubada Keliso mwawasega 'igietoolo limena,” ta sa'i tomwawasa nidi nigeya sida toolo limana. 16 'Enega Keliso wate geya'abo 'itootoolo limana. 17 Ga Keliso nina wate waemisa yogenena, ga 'enega 'imi to'umalinao 'etamo tuga 'emiya simiyami. 18 Ta nai wate 'ana mwalatoi 'aene gosedao nidi taudi lowa Keliso siemisena ga ni'atu simwawasa, gete tuga taudi mwa'o nai simiyami? 19 Ta wate 'abo'ada Keliso 'ana toemisao nuwa'ole'oleda sa'i, 'abo Keliso 'ina lema 'edaya tuta gete bale'uya namo manuna, ta nigeya tuta 'imeema 'ida mwawasa mulinaya manuna.

20 Ta 'ana palupaluna esiya nate Keliso mwawasega 'igimitoolo limana, ga muliyega tokwaiyao maibo'adi.

21 Manuna tai 'ebweuna namo 'enega mwawasa 'iapwesama bale'uya, nate Adama, ga wate nadigega tai 'ebweuna 'ina guinuwega toololimana 'igieapwesena. 22 'Enega ni'atu tamwalatonina 'aene Adama 'ina to'umalina 'enega maibo'ada mwawasa 'edaya 'iapwesa, ta sa'i Keliso 'enega yawasida ataya talobena.

23 Ta yawasi ataya 'ina tauya gete nadigega, nugana Keliso 'itoolo limana be ma'etamo tuta nina 'iila limanama 'abo'ada yaisigedi 'ina bodao, wate tatoolo limana, 24 be muliyega Keliso nina toloinao maibo'adi 'iewaiwai sinedi be welabanao be yaluyaluwa to'umalidi maibo'adi 'iewaiwai sinedi, be tuta 'ana 'ebe losalowa 'enaya Keliso 'ina loina 'ida 'ebwaya Tamana 'enaya. 25 Manuna Keliso nina 'iabe ma ina waiwai be 'ida loiloina 'ana laba 'ana talauwalao maibo'adi 'iewaiwai sinedi, 26 ta 'ebe losalowa mwawasa 'ida ewaiwaisine be 'ida gumwala.

27 Manuna Yaubada loina maibo'ana Keliso 'i'ebwa'ena. Nate namo Keliso geya'abo To'ebwaya nina 'iloiloine. 28 'Enega ma'etamo tuta nina Keliso yage maibo'adi 'iloinedi, tauna 'itatagwala Tamana 'ina loina 'ena, manuna Tamanana Keliso 'ina loina maibo'ana 'ana to'ebwaya, 'enega Yaubada nina 'ida 'etoloetana sana.

29 Ta 'abo tomwawasao geya'abo sitootoolo limana, to'ase manuna tomota sibapitaiso tomwawasao nidi manudi? 30 Ta wate mwa'adega 'abo'agu? 'Abo geya'abo mwawasega yatootoolo limana, to'ase manuna 'ebe esilae 'ena tuta yauyauna yapaipaisewa Keliso manuna?

31 Ona'ai'aila, 'asiyata 'ebweuna 'ebweuna 'ediya 'atuwa yamwawamwawasa, ta esi ma igu gwausowala 'omi 'imi toolopa'ala manuna, 'ida 'Inapwana Yesu Keliso 'enaya.

32 Ta wate lowa Epeso 'enaya tomota gamwagamwasowalidi bomitawa 'atuwa silosaiyegu, ta esi losaiya nina nigeya 'ana bobo'anamo 'eguya 'abo nigeya mwawasega yatootoolo limana. 'Enega 'aina tomota sigwae 'aene 'ilobweneda be tuta gete bale'uya tada egwausowala 'ida 'e'ai be 'ida numa 'ediyega, manuna 'iabe mwawasa 'ana tutaya geya'abo 'ebweu wate to'ase talobaloba.

33 Ta esi ona nidi nate kabo tuga, 'enega geya'abo 'ediyega sikabokaboemi, 'abona nai 'idi bubuna to'umalina waetotowanedi. 34 Nai 'aimi Yaubada waemwagemwageyena. Gete 'ebe omayamaya 'emiya, 'enega 'ilobwenemi be wada sinasinapu, be 'enega 'imi bubuna to'umalina wada losa'udi.

Bwala auwaudi

35 Ta 'aimi nigeya wanuwanuwa sabwalena toolo limana manuna, 'enega wagwae, “Tokwaiya nidi to bwala 'enega sitoolo limana?” 36 'Enega 'ilobwenemi be wada sinasinapu 'aene 'eguma atuna taasoi be 'itatabwa ma'etamo atu nina 'idadaula. 37 Wamwalatonina 'aene 'eguma pesapesa nai 'ebweu atuna taasoi, bwala nina 'enega 'itatabwa, nigeya gimi atuna 'ana 'ita nadigega, ta esi dumadumana, 38 manuna toloina tauna Yaubada, ga kaiwe be pwatula 'ebweuna 'ebweuna 'adi 'ita 'ina nuwanuwa nadigega, ga 'isa'udi.

39 Ta wate bwala Yaubada 'iloinena, tomota bwalada dumadumana, yobai bwaladi dumadumana, manuwa bwaladi dumadumana, ta iyana sa'i wate bwaladi dumadumana. 40 Be wate me galewa bwaladi dumadumana, ta me bale'u bwalada dumadumana, ta wate 'adi 'ebe tupu dumadumana 'abo'ada 'edega. 41 Ta wate sinala 'ana tupu dumadumana, ta nawalae 'ana tupu dumadumana, be kwadimao wate 'adi tupu dumadumadi.

42 'Ida toolo limana wate nadigega, bwalada daudaulidi sisa'usa'u 'ali'aliyedi, be ma'etamo 'eguma tatoolo limana bwalada geya'abo sidaudaula. 43 Ona'ai'aila, bwalada 'ebe omayamaya ta nenetadi sisa'usa'u 'ali'aliyedi ta bwalada galewega tatoolo limana, ta bwala nidi ma 'adi tupu ta ma idi waiwai, 44 manuna bwala bale'u sisa'usa'u 'ali'aliyedi ta bwala galewa sitootoolo limana, manuna bwala bale'u dumadumana ta bwala galewa dumadumana. 45 Buki Tabu 'ina simana wate nadigega 'igwae, “Tai nuganuganina, Adama, bwalana mayawasina,” ta tai 'eluwena yaluyaluwana 'enega tomota yawasida 'i'ebwa'eda.

46 Tai yaluyaluwana nigeya 'iapwesa nugana, ta esi bwalana 'iapwesa nugana be yaluyaluwana muliyega. 47 Manuna gimitai Yaubada 'imweluluina bale'u 'enega, ta tai 'eluwena galewega 'imwa'utama. 48 Maibo'ada bale'uya tamiyami, 'ada 'ita me bale'u nadigega, be wate bwalada auwaudi galewega ta'ewadi, 'adi 'ita Keliso bwalana auwauna nadigega.

50 Gosegwao wada nuwa'i'isi 'aene bwala bale'u nigeya sawesawenaya be galewaya silulugu, manuna bwala bale'u daudaulina ta bwala galewa geya'abo 'idaudaula. 51 Ta wate mwalatoi auwauna yae'itami 'aene geya'abo toekalesiyao maibo'ada tamwawamwawasa, ta esi 'aida ma'etamo mayawasida tamiyami be Yaubada bwalada 'ida sa'ugelasedi. 52 Manuna tuta 'ana 'ebe losalowa 'enaya yoguli 'ida mu'e sinabwana be Yaubada bwalada 'ida sa'ugelasa maniniyedi, be wate tokwaiyao mabwala auwaudi sida toolo limana, ta 'abo'ada mayawasida bwalada wate 'isa'u gelasedi. 53 Manuna Yaubada sawesawenaya bwala daudaulidi ta mwawamwawasidi 'isa'u gelasedi, be sieauwau ta miyamiya atayadi. 54 Be 'etamo tuta gote 'enaya Buki Tabu 'ana 'awa'ai'aila 'ida apwesa, nate 'igwae,

“'Ida ewaiwai 'ai'aila be mwawasa 'igugumwala.

55 Manuna geya'abo mwawasa 'iewaiwai, ta esi mwawasa 'ina to'umalina 'edaya 'igugumwala.”

56 Mwawasa 'ina waiwai 'iapwesama bubuna to'umalina 'enega, ta bubuna to'umalina Mosese 'ina loinao 'ediyega tamwalamwalatoni, 57 ta 'ida 'Inapwana Yesu Keliso 'i'etoseyeda be to'umalina 'enega taewaiwai, 'enega Yaubada 'ena talokagutoki sinabwana.

58 Ta wate gosegwao yalokagutoki sinabwana 'emiya, be yaloguguyami be wada toolo pa'ala, be tuta yauyauna wada etapewa 'Inapwana 'ina paisewa 'enaya, manuna ma'etamo 'Inapwana 'ina paisewa nina 'enega uwana tada loba.

Copyright information for `DOB