1 Corinthians 5

Me Kolinita 'idi loegesi

'Imi to'umalina yanonona manuna 'ebweu tai 'emiyega tamana mwanena ma'iyana siloegesi. Loegesi nate to'umali wawasae. Taudi tomiya apwesa sena yauyauna 'ediya nigeya nadigega sida bubuna'esa. 'Enega geya'abo wanuwanuwatu'e, ta esi bubuna gete manuna wada dedoi, be tai nina to'umalina 'imi boda 'enega wada 'ausepale.

Gete tuga 'abo'agu yamiya 'edasolaya, ta esi 'igu nuwanuwa 'emiya 'imiyami, 'atuwa nadigega 'abo'agu ma'emi, 'enega toto'umalina nina 'ana loina 'emiya yasimanenawa, nate 'ida 'Inapwana Yesu 'ana esanega.

'Ana loina nina gete nadigega, deliegogona waguinuwe 'ida 'Inapwana Yesu 'ana esanega, ta 'igu nuwanuwa wate ma'emi, be 'Inapwana Yesu 'ina waiwaiyega, toto'umalina nina wa'ebwayae Seitani 'enaya be 'aene bwalana 'igieto'umaliye, be 'enega ma'etamo 'ida 'Inapwana 'ina 'asiyata 'enaya tai nina yaluyaluwana 'i'etoseye.

Ta geya'abo wanuwanuwatu'e, ta esi wada nuwa'i'isi 'aene 'abo to'umalina gidalina 'emiya 'imiyami, 'iabe maibo'ami 'igieto'umaliyemi. 'Enega to'umalina nina 'emiyega wa'ausepale be waeboda bobo'ana, manuna Keliso 'ina mwawasega 'igie'esasemi. Ta Keliso nina tauna 'atuwa 'ida Ataona masulina bawena, manuna ni'atu manuda siloemwawasina. 'Enega 'ida sagali nina tada guinuwe, nigeya ma ida bubuna kadekadelina ta to'umalina 'ediyega, ta esi ma ida bubuna bobo'ana ta palupaluna 'ediyega.

Lowa 'imi leta 'ebweu 'ena yasimana 'aene geya'abo toto'umalidi ma'emiyao waegosigosiyana, 10 ta esi nigeya yaloiloina be 'aene toloyaweyao be tomatagwegweyao be to'ipwalao be tolonabwasuwao wae'idi'idiyedi, manuna bale'u gete 'enaya taudi nadigega yau wawasae, 'enega nigeya sawesawedaya taebesinedi.

11 Ta esi 'igu loina 'emiya gete tuga be 'abo yaita 'iekalesiya ta 'iloyawe, nai 'ilomatagwegwe, nai 'ilonabwasuwa, nai 'i'enapa'ala, nai bwasi waiwai 'inumanuma, nai 'i'ipwala, geya'abo waegosigosiyane nai ma'emi wa'e'ai.

12 Ta 'abo'agu 'igu 'ebeloina toekalesiyao dimo 'ediya, ta geya'abo mali bodao 'ediya. 13 Manuna taudi ma'etamo Yaubada 'iloinedi, ta esi toloyawe nina 'ebweu 'imi boda, 'enega 'ilobwenena be waloine, be 'emiyega wapa'i.

Copyright information for `DOB