1 Corinthians 7

Ai manuna

Nuwanuwa nina ai manuna ni'atu 'igu leta 'enaya wasimanena, 'enega 'abo'agu yaeonami 'aene bobo'ana tuga 'abo me'olotodi geya'abo siaiai. Ta esi nigeya sawesawemiya be maibo'ami nadigega waguiguinuwa'esa, manuna yau wawasae taudi weweloedi siguiguinuwa besobeso. 'Enega nai 'ilobwenemi wa'eloai be 'enega 'ebweuna 'ebweuna mamwanena, be geya'abo guinuwa besobeso 'isinasinabwa 'emiya.

Be 'enega me'olotomi mwanemiyao 'idi nuwanuwa wada muliyedi. Wate nadigega 'omi mewainemi mwanemiyao 'idi nuwanuwa wada muliyedi. Manuna 'abo waine 'iai, nigeya sawesawenaya be tauna oona 'iloine, ta esiya mwanenana me'olotona 'iloina. Wate tai, nigeya sawesawenaya be tauna oona 'iloine ta esiya mwanena mewainena 'ida loine.

Ta wate geya'abo wa'eno'eno dumaduma mwanemiyao 'ediyega. Nate namo 'abo siteluwa 'emiyega 'idi nuwanuwa leleleya be 'asiyata nigeya yauna 'ediya sida sidasida Yaubada 'enaya be muliyega wate sida 'enoluwa limana, ta geya'abo wamiyamiya dumaduma wawasae, 'abona nai yalakwaiyao 'emiya siapwesa be 'ediyega Seitani 'itoo be 'imi ai 'igieto'umaliyedi.

'Abo nuwanuwami be waaai, bobo'ana, ta geya'abo yaloiloinemi 'aene maibo'ami wada ai, manuna nuwanuwagu be 'aene geya'abo waaiai, nadigega 'abo'agu nigeya yaaiai, ta sa'i maibo'ada 'ida miya dumadumadi Yaubada ni'atu 'i'ebwa'eda, be 'aima 'amiyamiya weweloe ta ma ima gwausowala, ta 'aimi waaai.

'Enega 'omi weweloemi be kwabulao 'ami emataluwa gete, 'abo nigeya waaiai, nai bobo'ana be nadigega tuga wada miyami, 'abo'agu nadigega. Ta 'abo nuwanuwami be waaai, bobo'ana, wada ai tuga, be 'enega geya'abo yalakwaiya 'igiegie to'umaliyemi.

10 Ta 'omi toai 'Inapwana 'ina loina yasimana 'emiya 'aene geya'abo wasa'isa'ila. 11 Ta 'abo yaita waine mwanena lowa 'isa'ilena 'ina 'eda 'eluwa bobo'adi simiyami, nate 'abo waine nina tebweuna 'imiyami be geya'abo 'iaiai limana, ta bobo'ana wate 'abo 'iila limana mwanena 'enaya. Ta tai mwanediyao geya'abo sisa'isa'iledi.

12 Gete wate 'aina nuwanuwa 'abo'agu 'eguyega, ta nigeya 'Inapwana 'ina loinega, nate 'abo yaita 'oyo me'olotoyo mwaneyo nigeya 'iemiemisa Yaubada 'enaya, ta 'ina nuwanuwa nadigega be ma'iyayo wamiyami tuga, geya'abo 'usa'isa'ile. 13 Wate nadigega 'abo 'ebweu waine 'oyo mwaneyo nigeya 'iemiemisa Yaubada 'enaya, ta nuwanuwana be ma'iyayo wamiyami tuga, geya'abo 'usa'isa'ile.

14 'Abo yaita tai nai waine 'abo mwanena nigeya 'iemiemisa Yaubada 'enaya, ta esi ma'iyana tuga simiyami, 'iabe toemisa nina mwanena 'igiebobo'ane, ta 'enega natudiyao sena 'esasena 'ena simimiya. Ta 'abo sisa'ila, 'iabe natudiyao simiya to'umali. 15 Ta 'abo yaita 'oyo mwaneyo nigeya Yaubada 'ena 'iemiemisa ta nuwanuwana be 'isa'ileyo, 'uda gisine ta geya'abo 'uegagale. Manuna Yaubada nuwanuwana be wamiya siwalowa, ta geya nuwana egewagewana. 16 'Oyo tai nai waine 'etamo mwa'adega, mwaneyo 'ugiesana ile'ese, 'abo 'ugiyai?

'Iyaugwa! Nigeya tamwalamwalatoni, aga?”

'Ida 'ebemiya be 'ida 'ebe paisewa Yaubada 'iloiloinedi

17 'Ida paisewa Yaubada ni'atu 'ieguyaiyena 'ebweuna 'ebweuna 'edaya, 'enega 'ebe paisewa nidi 'ediya tada miyami. Gete nadigega 'igu loina toekalesiyao sena maibo'ana 'ediya.

18 'Abo yaita 'oyo goma Yudia ta me Yudia 'ida we'iwe'iyaya lowa sidabena* bwalamuya ga muliyega Yesu Keliso 'ena 'uemisa, geya'abo 'unuwanuwa mwau me Yudia 'ida we'iwe'iyaya nina manuna. Ta wate 'abo nigeya we'iwe'iyaya nina 'emuya, geya'abo 'ulodalodaba, 19 manuna lodaba nigeya yage sinabwana, ta yage sinabwana esiya Yaubada 'ina loinao 'adi ematamatana. 20 Geya'abo 'imi miya nai 'imi paisewa bale'uya manudi wanuwanuwa mwau, be 'aene nuwanuwami wasa'ugelasa. 21 'Abo yaita 'oyo 'ebweu tai sinabwana manuna 'uguiguinuwa tuta nina 'uekalesiya, geya'abo 'unuwanuwa mwau 'imu paisewa daita nina manuna, ta esi 'eguma 'imu taubada nina ma'etamo 'itagwaleyo be 'uila 'imu 'asaya, bobo'ana 'uda ila tuga. 22 Ona'ai'aila, topaisewao bale'uya 'abo Keliso 'ena siemisa, Yaubada sawesawenaya 'idi to'umalinao 'ediyega 'ili'amidi, ta wate tai sinabwadi 'abo Keliso 'ena siemisa, sida eto'ali'ei tauna manuna. 23 Manuna Keliso nina 'iemaisida ga 'abo'ada 'ina bodao. 'Enega geya'abo watagwatagwalemi mali taubadao 'ediya.

24 'Enega gosegwao, geya'abo 'imi 'ebemiya nina waguiguitoyasedi. 'Abo to'ase 'imi 'ebemiya tuta nina Yaubada 'ibwauyemi ga waekalesiya, 'ebemiya nidi tuga 'ediya wada miyami, Yaubada ma'emi.
*daba nai lodaba: Nugana 17:10-14 'ena Yaubada Ebelaamo 'iloinena be 'aene tauna be natunao me'olotodi be tubunao me'olotodi 'idi yage bwaladi sida 'upwa yauledi, nate we'iwe'iyaya nai 'ebe 'inana sida guinuwe, ta 'ana mwalatoi taudi Yaubada 'ina tomotaiyao esiesinuwadi.


Taudi gomagweineyao be kwabulao 'adi loina

25 Nigeya 'ebweu wate loina Yaubada 'i'ebwa'ebwa'egu gomagweineyao taudi nigeya siaiai manudi, ta esi 'iobobomegu ga nuwanuwa palupaluna 'i'ebwa'egu yage gete manuna. 26 'Enega tuta 'ebe esilae gete 'enaya 'ida 'ebemiya gete tuga 'ena tada miyami. 27 Ta 'abo yaita 'oyo 'uaiya, mamwaneyo wada miyami tuga. Ta 'abo yaita 'oyo nigeya 'uaiai, geya'abo wate waine 'u'ebe'ebese. 28 Ta 'abo yaisigedi ni'atu siai nate nigeya loegesi, ta esi aiai nidi 'idi paisewa sinabwana, 'enega nuwanuwagu be yagie kapekapeyanemi.

29 Manuna tuta mwauna bale'uya ni'atu 'iloselabena, 'enega 'omi aiai nimi 'ilobwenemi be wabubuna nadigega taudi nigeya siaiai. 30 Ta 'omi todedoi wada bubuna nadigega taudi nigeya sidedoi, ta wate 'omi togwausowala wada bubuna nadigega tonuwamwau. Nadigega wate 'omi toegimwane wada bubuna nadigega gomagomabesodi, 31 be wate geya'abo bale'u gete yagenao manudi wanuwanuwa wawasae, manuna tuta gidalina be sisasawala be bale'u gete 'igugumwala.

32 'Enega nuwanuwagu be geya'abo yage bale'u manudi wanuwanuwa wawasae, ta esi wada bubuna nadigega taudi nigeya siaiai. Manuna taudi nigeya siaiai Yaubada 'ina guinuwa namo manuna sinuwanuwa sinabwana, ta nuwanuwadi be 'Inapwana sida giegwausowali.

33 Ta taudi aiai nidi bale'u yagenao nuwanuwadi be 'aene 'ediyega mwanediyao sigiegwausowalidi. 34 'Enega nigeya kapekapeyana be 'eda 'eluwa nidi 'ediyega sitautauya.

Ta wate gomagweineyao be iine taudi nigeya siaiai, sawesawediya be Yaubada manuna sinuwanuwa sinabwana, be 'enega bwaladi ta yaluyaluwadi sida gie'esasedi, ta esi aiai nidi sinuwanuwa yage bale'u manudi be 'aene 'ediyega mwanediyao sigiegwausowalidi.

35 'Igu simana gete 'enega nigeya ai ya'eto'etobode, ta esi sabi lememi, be Yaubada 'ina guinuwa 'ediya wada guinuwa 'ai'aila, ta geya'abo mali yage manudi wanuwanuwa.

36 'Abo yaita tai natuna gomagweinena 'iegagale be geya'abo 'iaiai, ta esi 'abo natunana 'inuwamwau, manuna ni'atu 'iewaine ta nuwanuwana be 'ebweu tai ma'iyana siai, tamana 'ida tagwala tuga 'idi ai manuna, manuna ai nigeya yage to'umalina.

37 Ta esi 'abo tai 'inuwapa'ali be 'aene natunana geya'abo 'iaiai ta 'abo natunana sawesawenaya be 'i'alama'i'itana be geya'abo 'iaiai, ta wate 'abo nigeya yaita 'ediyega 'inuwanuwa mwau 'etoboda gete manuna, nate bobo'ana wawasae, 'abo gomagweine nina geya'abo 'iaiai. 38 'Enega 'abo yaita 'ina gomagweine 'itagwale be 'iai nate bobo'ana, ta 'abo 'iegagale nate bobo'ana wawasae.

39 Ta 'abo yaita waine aiai nina ni'atu mwanena ma'iyana sie'ebweu ta 'abo tai 'imwawasa, waine nina sawesawenaya be 'iai limana. Nate namo 'ilobwenena be Yaubada 'ina tai 'ebweuna ma'iyana siai. 40 Ta esi yanuwena 'aene 'abo waine nina tebweuna 'imiyami, be geya'abo 'iaiai limana, nate bobo'ana wawasae. Ta nai Yaubada Yaluyaluwana 'ina nuwanuwa gete nadigega.

Copyright information for `DOB