1 Corinthians 8

Masula nina tomota si'ebwa'ebwaya 'ebe bwagobwago kabokaboyao 'ediya

'Ebweu wate enaida 'igu leta 'enaya ni'atu wasimanenaya, nate masula nidi tomota si'ebwa'ebwaya 'idi 'ebe bwagobwago gulewa nai kaiwe 'ediya. Yage nidi 'idi kabo wamwalamwalatoni, ta sa'i geya'abo wanuwanuwatu'e 'imi sinasinapu nina manuna, ta 'ilobwenemi be gosedao maibo'adi 'atemiyega wada obobomedi, manuna oboboma yage sinabwana, ta mwalatoi esi nigeya yage sinabwana.

'Enega 'abo tanuwena 'aene 'abo'ada tosinasinapu, nate nigeya tasinasinapu 'ai'aila, ta esiya 'abo Yaubada taobobome, 'abo'ada Yaubada 'imwalatonida 'aene bobo'ada.

'Enega mwa'adega masula nina tomota si'ebwa'ebwaya 'idi 'ebe emisa kabokaboyao 'ediya? 'Ebe bwagobwago kabokaboyao getedi nigeya 'ebe emisa 'ai'aila, manuna Yaubada namo tebweuna 'imiyami, ta mali 'ebe emisao yage besobeso tuga.

Ta tomota yaudi sinuwena 'aene 'ebe emisao nai yaubadao yaudi galewaya ta bale'uya simiyami. Ta 'abo'ada Yaubada taemise 'aene Tamada nina, ta tebweuna namo, ga yage maibo'adi 'ibubudi, ta wate 'abo'ada 'ibubuda, tauna manuna. Ta wate 'ida 'Inapwana taemisena 'aene tebweuna namo, Yesu Keliso, ta Keliso nina 'enega 'abo'ada Yaubada 'ibubuda, ta wate yage maibo'adi 'ibubudi.

'Abo'ada 'ida emisa pa'alina, ta sa'i 'aina toekalesiyao 'idi emisao nenetadi, manuna sienuwanaluwa 'aene mali 'ebe bwagobwago wate 'ebe emisa 'ai'aila, 'enega 'abo tomota nidi 'ebe emisa kabokaboyao 'adi masula si'a'ani 'iabe simatauta 'ediya.

Ta esi wada nuwa'i'isi 'aene nigeya masula 'enega Yaubada 'ida giebobo'aneda, manuna nigeya 'ebweu wate masula yaluyaluwada 'ida giebobo'anedi, nai 'ida gieto'umaliyedi. 'Enega masula maibo'ana sawesawenaya be ta'enidi ta esi wada nuwa'i'isi be geya'abo 'ami masula 'eto'etobodana 'ediyega toekalesiyao nenetadi wagiegie be'uyedi.

10 Manuna 'abo yaita 'oyo ma imu mwalatoi 'umwalamwalatoni 'aene mali 'ebe emisao nidi yage besobeso, ta nigeya 'ebweu 'idi waiwaimo, 'enega 'abo 'adi masula 'eto'etobodana 'u'a'ani, be tasiyo 'ebweuna ma ina emisa nenetana 'i'itayo, 'iabe tauna wate 'i'a'ani, ta esi ma ina matauta. 11 Ona'ai'aila, 'oyo ma imu mwalatoi, ta esi 'imu mwalatoi 'enega ma'etamo tasimuna nenetana 'ugieto'umaliye. 'Enega wada nuwa'i'isi 'aene Keliso 'imwawasa tasimina nenetana sabi 'etoseyena. 12 'Enega 'abo tasimina nenetana wagiebe'uye, nate 'imi loegesi Keliso 'enaya.

13 Ta 'abo'agu sa'i geya nuwagu be 'ebweu tasidai yagiebe'uye, 'enega masula nidi yaguitoyasa 'ai'ailidi, be geya'abo yalotolotoodi, 'abona nai 'ediyega tasidao yagie be'uyedi.

Copyright information for `DOB