1 John 5

Yesu 'ana emisa 'iewaiwai bubuna bale'u 'enaya

'Eguma maibo'ada Yesu taemise 'aene tauna To'etoseyana, 'abo'ada Yaubada natunao. Ta wate 'eguma Tamana taobobome, natunao nadigega taobobomedi. 'Enega 'eguma Yaubada taobobome, ta 'eguma 'ina loinao taematamatanedi, tamwalamwalatoni 'aene Yaubada natunao wate taobobomedi. Manuna Yaubada 'ana oboboma be 'ina loina 'ana ematamatana leleleya, ta 'ina loina nidi nigeya mwaudi, ta esi kapekapeyadi. 'Enega 'eguma Yaubada 'ienatuneda, bubuna bale'u taewaiwai sine, ta 'ida 'ebe ewaiwai nina 'ana esana emisa. Manuna 'abo Yesu taemise 'aene Yaubada Natuna, gete 'enega bubuna bale'u taewaiwai sine.

Yaubada Natuna 'ana simana manuna

Ta Natuna 'ina mai 'edaya nate bwasiyega ta wate lalanega, tauna Yesu Keliso, nigeya bwasi namo 'enega, ta esi bwasi be lala wate 'ediyega. Gete manuna Yaubada Yaluyaluwana 'isimasimana 'ai'aila manuna Yaluyaluwana adelina palupaluna. Manuna Yesu 'ana tosimanao 'etoi simiyami, nate Yaluyaluwa ta bwasi ta lala, ta 'idi e'ita leleleya.

'Eguma tomota 'idi simanao taemisedi, sawesawenaya be Yaubada 'ina simana taemise, manuna Yaubada tauna Toewaiwai, ga Natuna manuna 'isimana 'edaya. 10 'Enega 'eguma tauna taemise, 'atedaya talotoo 'aene tauna Yaubada Natuna. Ta esi 'eguma Yaubada geya'abo taemiemise, gote 'enega ta'awa kabokaboe, manuna 'ina simana Natuna manuna nigeya taemiemise. 11 Ta 'ina simana nina 'aene Natunana 'enega yawasida ataya 'i'ebwa'eda. 12 'Enega 'abo yaita Yaubada Natuna 'enaya 'imiyami, tai nina yawasina bobo'ana ni'atu 'ilobena, ta 'abo yaita nigeya Yaubada Natuna 'enaya, tauna nigeya.

Yawasi ataya manuna

13 'Imi leta gete ni'atu ya'etoladinawa be wamwalamwalatoni 'aene 'eguma Yaubada Natuna 'ana esanega waemiemisa, yawasimi ataya waloba, 14 be wate matanaya 'ada lotoona 'aene 'ida sidasida 'inonodi, be 'i'ebwa'eda to'ase be to'ase tasidasida manudi, 'abo tauna 'ina nuwena wate nadigega. 15 Ona'ai'aila, 'ida sidao maibo'adi 'inonodi, 'enega tamwalatonina 'aene 'ida sidao nidi 'ie'isedi.

16 'Aina loegesi 'adi e'isa mwawasa ta 'aidi nigeya, 'enega 'eguma yaita 'oyo tasiyo 'u'ita 'iloegesi, ta loegesi nina gidalina ta nigeya 'ana e'isa mwawasa, 'enega 'eguma toloegesi nina manuna 'usisida Yaubada 'enaya, Yaubada 'imu sida 'ida nono, be tasiyo yawasina 'ida tagwale. Ta esi loegesi nidi 'adi e'isa mwawasa, geya'abo manudi wasidasida Yaubada 'enaya. 17 Ona'ai'aila, loegesi maibo'adi to'umalidi, ta 'aidi 'adi e'isa nigeya mwawasa.

18 Ta esi tamwalamwalatoni 'aene 'abo Yaubada 'ienatuneda geya'abo taloeloegesi, manuna tauna Yaubada 'igimi enatunenaya 'i'ita'i'isida, be geya'abo tauna toto'umalina nina 'igitogitooda.

19 Ta wate 'abo'ada tamwalamwalatoni 'aene Yaubada 'ienatuneda, ta sa'i bale'u bubunina 'ana tomuliyao yauyaudi toto'umalina nina 'ina bodao.

20 Ta wate tamwalamwalatoni 'aene Yaubada Natuna ni'atu 'imai 'edaya, ga 'igienuwa sabwalenida 'aene Yaubada Topalupaluna, ta 'enaya tamiyami, manuna 'abo'ada Yaubada Natuna Yesu Keliso ma'eda. Yesu nina Yaubada 'ai'aila, ta yawasida ataya 'alena.

21 Natugwao, wada 'ita'i'isimi mali 'ebe emisao 'ediyega, be wapilisinedi.

Copyright information for `DOB