1 Peter 4

'Ida bubuna tada sa'ugelasedi.

Wada nuwa'i'isi 'aene tuta nina Yesu 'ietomotai 'elouya 'ilobena, ta 'imi nuwanuwa wasa'udi Yesu nadigega, be 'enega taumimo wada giepa'alimi, manuna 'abo yaisigedi taudi oodiyega 'elouya silobaloba, 'idi bubuna to'umalina ni'atu 'igumwala.

'Enega 'ida tuta maibo'ana bale'uya tamiyami, tada tagwaleda Yaubada 'enaya be tauna 'ida loineda, ta 'ida yalakwaiya geya'abo 'iloiloineda.

Lowa 'imi bubuna to'umalina, nadigega taudi guguyoi 'ana tomiyanao, be bubuna nidi getedi wada guitoyasedi, nadigega sogala be yalakwaiya be bwasi waiwaidi 'adi numa kabaleya, be egosigosiyana guinuwa to'umalidi manudi, be wate emisa kabokabo mali yageyao 'ediya. Ta tomiya apwesa nidi sinuwa owana 'abo 'omi nigeya ma'emiyao yage nidi to'umalidi waguiguinuwedi, 'enega si'awa to'umaliyemi. Ta esi 'etamo Yaubada tomota mayawasidi be mwawamwawasidi 'ida bwa'omatadi, be 'enega taudi tomiya apwesa nidi sida etala matanaya. Gete 'alena 'enega tetela bobo'ana 'iguguyaena tomwawasao 'ediya, be tuta mayawasidiya bwa'omatana sida loba, ta yaluyaluwadiyega yawasidi sida loba Yaubada 'enega.

Ta ni'atu be yage maibo'ana sigugumwala. 'Enega wa'ita'i'isimi be geya'abo walo'ame'ame, ta esi tuta yauyauna wada sidasida Yaubada 'ena. 'Enega wada eobooboboma 'ai'aila 'ebweuna 'ebweuna 'emiya, manuna oboboma yage maibo'adi 'isinabwa sinedi. Ta wate oboboma sawesawenaya be to'umalina yaudi 'ikweudi. 'Enega gosemiyao wabwauyedi 'imi anuwaya nuwa bobo'anega, ta geya'abo manudi walomulomugi.

10 Ta ni'atu 'ebweuna 'ebweuna Yaubada egueguyai dumadumadi be dumadumadi 'i'ebwa'emi, 'enega egueguyai nidi 'ediyega wada guinuwa be gosemiyao wada lemedi, be 'enega 'omi Yaubada 'ina toguinuwao bobo'ami. 11 'Enega yaisigedi 'omi waetosimana wada etosimana tuga nadigega Yaubada 'ina ona wasimasimane, ta 'abo yaisigedi 'omi walemalema wada lema tuga 'imi waiwai maibo'anega, nadigega waiwai nina 'i'ebwa'emi, be 'enega guinuwa maibo'adi 'ediyega tomota Yesu Keliso sida mwalatoni be Yaubada sida tupu, manuna tauna Toesaesa sana, ta Toewaiwai sana, tuta maibo'ana 'ediya. Eimeni.

Yesu 'ina tomotaiyao si'elo'elouya.

12 Ta tasigwao, geya'abo ma imi nuwaowana 'abo tuta nina 'ebetoo mwaudi walobadi. Geya'abo wanuwanuwa 'aene siapweapwesa daita. 13 Ta esi wada gwausowala manuna Yesu Keliso 'elouya 'ilobena, ga 'omi nadigega tuga walobaloba'ese, be muliyega tuta nina 'ina esaesa 'iapwesama wada gwausowala 'ai'aila.

14 Ta 'abo tomota si'awa to'umaliyemi 'imi emisa Keliso 'enaya manuna, wada gwausowala tuga, manuna Yaubada yaluyaluwana 'esasena ni'atu 'emiya 'imiyami. 15 Ta esi nigeya yage bobo'ana manumi, 'abo waloemwawasa, nai wa'i'ipwala, nai waloegesi, nai waguinuwa besobeso, be manudi 'elouya waloba. 16 Ta yage bobo'ana esi, 'abo 'omi Keliso 'ina bodao be 'elouya waloba. Nate nigeya 'ebe omayamaya, ta esi Yaubada wada tupu, manuna 'omi ni'atu Keliso 'ina bodao.

17 Ta ni'atu tuta 'imai saba be bwa'omatana 'ie'ale, be 'enega Yaubada 'ina tomotaiyao 'ida gimi bwa'omatada, be muliyega taudi 'ina tetela bobo'ana nigeya siemiemise, 'idi to'umalina 'ana e'isa mwau wawasae sida loba. 18 Ta ni'atu Buki Tabu 'ena 'isimana, 'igwae,

“Yaubada 'ena mwauna be 'aene tobobo'adi 'ida 'etoseyedi, ta esi toto'umalidi, taudi Yaubada 'ana toe'idi'idiyao 'adi 'etoseyana mwau wawasae.”

19 'Enega 'abo 'omi Yaubada 'ina nuwena 'enega 'elouya walobadi, yawasimi wada tagwaledi tauna 'ena, be 'enega 'ida 'ita'i'isimi, manuna tauna 'ada Tomweluluwa bobo'ai'ailina; ta 'omi wate nadigega wada bubuna bobo'ana.

Copyright information for `DOB