1 Thessalonians 4

Yaubada nuwanuwana bubuna bobo'ana

Gosemao, 'ebweu wate yage 'ida 'Inapwana Yesu manuna 'aemataluwemi, be 'aguguyemi, nate lowa bubuna nidi 'ae'itemi ga wamwalatonidi 'aene bobo'adi, ta manudi Yaubada 'igwausowala, ga gete tuga ni'atu 'ediya wabuubuna, ta 'ilobwenena be waguinuwa limalimadi. Ta wate 'Inapwana Yesu 'ina loinao nidi 'a'ebwa'emiya wamwalamwalatonidi. Yaubada nuwanuwana 'imi miya 'esasena, ta geya'abo waloeloelata, be 'enega 'ebweuna 'ebweuna wada ai ma imi bubuna bobo'ana ta palupaluna, ta geya'abo ma imi yalakwaiya, nadigega tomotai nidi Yaubada 'ana toemwagemwageyao.

'Enega wate geya'abo mali tomota mwanediyao wa'ipwa'ipwalidi, 'abona nai 'Inapwana 'ina gamwasowala waloba. Yage nidi manudi lowa 'aemataluwemi. Manuna Yaubada 'iesinuweda nigeya bubuna baibailidi manudi, ta 'esasedi esi manudi. 'Enega 'abo yaita loina nina 'ile'oai, nigeya 'aene tomota 'idi loina, ta esi Yaubada 'ina loina 'ile'oale'oa, manuna Yaluyaluwa Tabuna tauna nuwanuwa 'ana togie'esasa, nate Yaubada 'ina 'ebwaya 'edaya.

Ta gosedao 'adi oboboma manuna geya'abo 'a'eto'etoladiwa, manuna Yaubada tauna ni'atu 'ie'itemi be taumimo wada eoboobobomemi. 10 Nadigega wate tomota maibo'adi sena Masidonia solanaya waobobomedi. 'Enega 'ada lo'aetuetunemi be 'imi oboboma nina 'ena wada ewaiwai, 11 be wate wada too be wada miyasiwalowa be taumimo 'imi paisewa wada paisewadi, be geya'abo mali tomota 'alodi wa'e'enuwadi, nadigega lowa 'aemataluwa'esemi. 12 Gete 'enega taudi nigeya Keliso 'ana toemisao sida 'amayabemi. Ta 'omi 'ami lema manuna geya'abo mali tomota 'ediya watuituila.

'Inapwana 'ina ilalimanama manuna

13 Gosemao geya'abo waemwagemwage tokwaiyao manudi, be 'enega 'abo yaita tasidai 'ikwakwaiya, geya'abo wanuwanuwa mwau, 'atuwa taudi nigeya 'idi emisamo toololimana manuna. 14 Ta 'abo'ada Yesu taemisena 'aene mwawasega 'itoolo limana, ga nadigega wate taemisa 'aene gosedao nidi ni'atu sikwaiya Yaubada 'ida ila limanedima, Yesu ma'enao.

15 Gete 'ida 'Inapwana 'ina ona 'asimasimane 'emiya, 'aene tuta nina 'iila limanama, taudi kwaikwaiyidi Keliso sida gimi lobai, ta 'abo'ada mayawasida muliyega. 16 Manuna 'Inapwana nina ma'enana sinabwana 'ida apwesa, ta aniloseyao 'adi toanugana wate 'ida bwau, ta wate yoguli simu'e sinabwana, be 'enega 'Inapwana galewega 'imwa'utama, be tokwaiya nidi lowa Keliso 'ana toemisao sida gimitoolo, 17 ta 'enega 'abo'ada wate mayawasida ma'edao tatutu'e galewaya, be 'ida 'Inapwana ma'eda taelobaloba pwana 'ediya, be tauna ma'edai tada miyaataya. 18 'Enega tetela gete 'enega wada giegwausowalimi.

Copyright information for `DOB