1 Thessalonians 5

Gosemao, nigeya sawesawenaya be 'imi leta gete 'enega 'aeonami to tuta 'ena Keliso nina 'iila limanama, manuna ni'atu wasinapuna 'aene nigeya tamwalamwalatoni, ta esi 'ina mai ma'etamo 'atuwa to'ipwala 'ina mai boiboiya nadigega, be 'abo tomota 'aidi sigwae, “'Ida miya maibo'ana bobo'ana tuga,” ta muliyega esilae 'ida loesalutunidi, nadigega waine 'ina 'elouya tuta enatuna 'ena. 'Enega nadigega esilae nina nigeya sawesawenaya sidenasine.

Ta gosemao, 'omi nigeya sena guguyoi 'ena wamiyami, 'enega 'inapwana 'ina ila limanama manuna geya'abo wa'ate'ate sa'ala, ta sa'i guguyoi 'ana tomiyanao 'ida loesalutunidi, to'ipwala nadigega. Manuna 'omi maedana 'ana tomiyanao, 'enega maedanega tada tauya, ta geya'abo guguyoi 'ina 'edega. 'Enega geya'abo ta'eno'eno, nadigega tomota yaudi si'eno'eno'esa, ta esiya Yesu tada yamwayamwa ma ida nuwanuwa palupalu. Ta geya'abo 'abo'ada nadigega taudi toemata'eno'eno, be bwasi waiwai 'ana tonumao. Taudi guguyoi 'idi 'ebe guinuwa.

Ta 'abo'ada esi 'atuwa maemaedanida, 'enega taudamo tada 'ita'i'isida, be yaluyaluwada tada lawa Yaubada 'ana emisa be 'ana oboboma 'ediyega, ta wate 'ida nuwayaina 'ada 'etoseyana tada loba 'enega. Manuna Yaubada nigeya 'iloiloina be bwa'omatana 'ana sena 'ena taapwesa, ta esi nuwanuwana 'ida 'Inapwana Yesu Keliso 'ina guinuwega 'i'etoseyeda. 10 'Enega Keliso nina manuda 'imwawasa, be nai mayawasida nai mwawamwawasida, ta 'eguma 'iilama 'ida 'au'ewada be ma'edai tada miyaataya. 11 'Enega 'ilobwenemi be taumimo wada lo'aetuetunemi ta wate wada elemalema, nate paisewa nidi nadigega gete tuga waguiguinuwa 'esedi.

'Ebe losalowa

12 Gosemao, 'asidemi wate be 'aene 'ami toanuganao wada 'amayabedi, be wada oboboma 'ai'ailidi, manuna 'Inapwana 'ina paisewa siguiguinuwe, nate si'ita'i'isimi ta siloguloguguya 'emiya. Ta 'ebweu yage wate, geya'abo egewagewana, ta esi nuwasiwalowega wada miyami.

14 Ta gosemao, 'ilobwenemi wate be tologwautoyasao waloguguyadi, be to'atesa'ala wagie 'atepatudi, be toneneta walemedi, ta yage nidi getedi e'alama'i'itega wada guinuwedi.

15 Wa'ita'i'isimi be geya'abo 'ebweu yaita 'emiyega to'umalina 'ie'ie'isa to'umalina 'enega, ta esi tuta maibo'ana wada eobooboboma be wada elemalema. Mali tomota wate wada lemedi.

16 Tuta yauna wada uyawana. 17 Nadigega wate sidasida Yaubada 'enaya geya'abo walosalosa'u. 18 Ta wate tuta yauna wada lokagutoki Yaubada 'ena, 'abo 'imi miya bobo'adi nai to'umalidi 'ediya. 'Imi gwausowala nina nate Yaubada 'ina nuwena, 'abo'ada Yesu Keliso 'ina bodao manuda.

19 Ta geya'abo Yaluyaluwa Tabuna 'ina guinuwa wa'eto'etobode, 20 'enega 'eguma 'ebweu tologuguya e'ita auwauna 'iona apwesei, geya'abo waguiguitoyase, 21 ta esi e'ita nina wada too, be 'abo bobo'ana wagiyai, 22 ta 'abo to'umalina, maibo'ana waguitoyase.

23 Yaubada tauna gwausowala 'alena 'enega yaluyaluwami be nuwami ta oomi 'ida gie'esasa 'ai'ailidi be sida maedana, be 'enega ma imi bubuna bobo'ana wada miyami be 'ana laba Yesu Keliso 'iila limanama. 24 Manuna Yaubada tauna 'iesinuwemi, tauna ma 'ana emisa, ga to'ase ni'atu 'ieoneda 'ida guinuwe.

25 Gosemao, wada sidasida manuma Yaubada 'enaya.

26 Be wate toekalesiyao maibo'adi obobomega waenima'abidi. 27 Ta yaloinemi Yaubada 'ana esanega be leta gete tasidao matadiya wada sawa.

'Ida 'Inapwana Yesu Keliso 'ina oboboma 'emiya.

'Abo'agu Paulo.

28 

Copyright information for `DOB