1 Timothy 4

Toe'ita kabokabo manudi

Yaluyaluwa Tabuna ni'atu 'isimana apwesa 'aene ma'etamo tuta 'ana 'ebe losalowa 'enaya 'aina tomota tapwalolo sida guitoyase, be yaluyaluwa to'umalidi be Taumudumudulele 'idi e'ita kabokaboyao sinonodi. Toe'ita nidi tomota kabokabodi, ta 'idi kabo nidi manudi nigeya sida nuwanuwa. 'Idi kabo nidi 'aina gete, 'aene ai yage to'umalina, ta wate 'aina masula 'adi 'ai si'etobodedi. Ta 'omi Keliso 'ana toemisao e'ita 'ai'aila wamwalamwalatoni 'aene Yaubada masula maibo'ana 'ibubudi 'e'ai manuna, be 'aene ma ida gwausowala tada 'enidi.

Yage yauyauna Yaubada 'imweluluidiya bobo'adi, 'enega manudi tada lokagutoki Yaubada 'ena, be tada 'ewadi, manuna Yaubada 'ina onega ta 'ida sidesidega ni'atu 'igie'esasedi.

Yaubada 'ina toguinuwao 'idi bubuna

Loina getedi 'eguma gosedao 'ediya 'ue'itae, 'enega 'oyo Yesu Keliso 'ina toguinuwa bobo'ana, manuna e'ita palupaludi Yesu 'ana emisa manuna 'umulimuliyedi, ta 'ediyega yaluyaluwayo 'iewaiwai. Ta emwasala besobeso yaudi nigeya Yaubada 'enega, 'enega geya'abo 'unoonodi, ta esi 'utoo waiwai be tuta maibo'ana 'uda bubuna bobo'ana Yaubada matanaya. Ona'ai'aila, yage nidi taguiguinuwedi bwalada 'ana 'abi manuna, nate yage bobo'ana, ta esi yaluyaluwada 'ana 'abi yage bobo'ana wawasae, manuna tauna 'ilemeda 'ida tuta bale'uya manuna, ta wate tuta 'imeemai manuna.

Ona gete ona'ai'aila, 'enega tada tagwaleda 'enaya, 10 manuna tuta gete 'enaya ma ida etapewa be ma ida gwaunuwa, manuna Yaubada miyamiya atayana tebweuna, tomota maibo'ada 'ada To'etoseyana, 'abo taemise. 'Enega 'ida nuwayaina 'enaya ni'atu tasa'una be 'i'etoseyeda.

11 Yage nidi getedi 'uda loguguyaedi, ta 'uda e'itaedi tomota 'ediya.

12 Tomota geya'abo sisinasinaliyo manuna 'aene 'oyo tubuwau tuga, ta esi 'imu ona bobo'ana, be 'imu guinuwa bobo'ana, 'imu oboboma, 'imu emisa, be 'imu bubuna 'esasena 'ediyega be 'oyo 'ebe'ita taudi 'ediya.

13 Ta wate tapwalolo solanaya Buki Tabu 'uda sawa, be 'uda loguguya, be 'uda e'ita, be 'ana laba yaapwesawa.

14 Lowa tapwalolo 'ana 'inapwanao sigidebemuya, ta Yaubada 'ina guinuwa manuna siona obobomemu, 'enega guinuwa nina manuna Yaubada 'igiewaiwaiyemu. Ta 'unuwa'i'isi, 15 be guinuwa nidi 'ediya geya'abo 'uloguitoyasa, be 'enega tomota 'imu etapewa manuna sida gwae, “Ona'ai'aila, Timoti gwaunuwa 'alena.”

16 Timoti, 'u'ita'i'isiyo, tuta maibo'ana 'ena 'uda guinuwa bobo'ana, be 'uda e'ita 'ai'aila, be 'enega Yaubada 'oyo ta ma imu toenonoyao, 'i'etoseyemi.

Copyright information for `DOB