1 Timothy 5

'Ida guinuwao gosedao 'ediya

Geya'abo 'enayo setalinega 'inapwanao 'u'ena'ena pa'alidi, ta esi oonuwega 'u'awanoi 'ediya, nadigega 'atuwa tamayo 'u'awa'awanoiye; ta wate 'amu 'epatao 'u'awa'awa tasinedi; ta iine sinabwadi 'ediya 'uda bubuna nadigega 'atuwa sinamwao, ta gomagweine 'ediya ma imu nuwanuwa be bubuna 'esasena 'ediyega 'uda 'awanuunedi.

Kwabulao nidi nigeya 'idi susu walemedi. Ta 'eguma natudiyao nai tubudiyao simiyamiya, taudi getedi 'ilobwenedi be sida 'ita'i'isidi, be lowa gidalidiya 'adi 'ita'i'ita sida e'isa. Lema nidi getedi nadigega Yaubada 'ina 'ebe gwausowala.

'Enega kwabulao nidi taudi nigeya 'idi susumo, 'eguma 'idi emisa Yaubada namo 'ena sisa'u, sidesidega 'asiyata be boiboi 'ediya, wada lemedi. Ta taudi esi gwausowala besobeso manuna sinuwanuwa, taudi bwaladiya mayawasidi, ta yaluyaluwadi ni'atu simwawasa. 'Enega kwabulao guguya gete 'u'ebwa'edi be sida bubuna 'ai'aila, be 'enega geya'abo mali tomota kwabulao nidi si'awa'awa to'umaliyedi. Ta 'eguma yaita nigeya 'ina bu'unao nai natunao 'ida 'ita'i'isidiya, tauna ni'atu Yaubada 'ina e'ita 'iguitoyasena, ga taudi Yaubada 'ana toeyaseyaseyao 'ito'umali sinedi.

Kwabula nidi 'adi loina gete nadigega: 'eguma 'adi yakwala sikisiti nai 'ilagaya, ta mwanediya lowa 'ebweuna namo, 10 ta tomota matadiya 'idi bubuna palupaluna, manuna natudiyao 'adi 'iyabwebwe 'enaya siguinuwa 'ai'aila, be 'owagao ta wate toekalesiyao 'adi 'itanao 'enaya, be tomiyamwau wate 'adi lema 'enaya, be 'abo 'atenuwa'ole'ole 'aledi, 'ilobwenedi be toekalesiyao 'ediya silulugu, be toekalesiyao nidi 'ediyega 'adi lema, nai 'e'ai, nai 'oama, sida loba. 11 Ta kwabula nidi taudi ma'etamo nigeya sieilemwaya geya'abo silugulugu be sionaupaupa Keliso 'enaya be 'aene geya'abo siaiai limana, manuna taudi nadigega 'iabe 'idi onaupaupa nina sile'oa be siai limana, 12 be gete 'enega Yaubada matanaya ni'atu sito'umalina. 13 Ta iine nidi wate miyadaidaita 'aledi, be mali anuwa be mali anuwa 'ediya sitautauya ta silomulomugi, ta mali tomota manudi sionaona dadana. 14 'Enega yanuwena kwabulao taudi ma'etamo nigeya sieilemwaya 'ilobwenedi be siai limana, be sienatuna, be taudi natudiyao si'ita'i'isidi, be 'enega geya'abo 'ada talauwalao si'awa'awa to'umaliyeda, kwabulao nidi 'idi bubuna manuna. 15 Manuna 'aina kwabulao ni'atu sineneta, ga Seitani 'ina 'eda 'ena sitautauya.

16 'Eguma to waine Keliso 'ana toemisa, ta 'ina susuyao 'aina sikwabulaya, 'ilobwenena be 'i'ita'i'isidi. Ta tapwalolo 'ana toanuganao 'idi paisewa kwabulao nigeya 'idi bu'unaomo si'ita'i'isidi.

17 Ta 'ami toanuganao 'eguma silema 'ai'ailimi, 'omi wate wada 'amayaba 'ai'ailidi be wada 'ita'i'isidi, nate 'idi loguguya ta 'idi e'ita 'ana e'isa.

18 Gete manuna Buki Tabu 'ena Yaubada 'iloina, 'igwae,

“'Eguma bulumakau 'ipaipaisewa witi atuna 'enaya, sawesawenaya be tupwana witi 'i'a'ani.”

Ta wate 'igwae,

“Toguinuwa 'adi niyaula 'ilobwenedi be sida 'e'ai.”

19 'Eguma 'aina tomota sie'ewa kabokabo 'ami toanuganao manudi, geya'abo wanoonodi. Nate namo 'eguma tomota 'eluwa nai 'etoi sieonaona toanugana 'ebweuna 'ina to'umalina manuna, 'enega wada etala. 20 Ta 'eguma toanugana 'ina to'umalina wa'italoba, 'uda 'enapa'ali tomota yaudi matadiya, be 'enega taudi wate loegesi nina geya'abo 'ena silugulugu.

21 Gete 'amu emataluwa 'eguyega Yaubada be Yesu Keliso matadiya, be wate aniloseyao 'esasedi matadiya, 'aene loina getedi 'uda muliya 'ai'ailidi. Tomota maibo'adi 'uda loinedi loina 'ebweuna namo 'enega, ta geya'abo 'aidi namo 'ediya 'uloiloina pa'ala, ta 'aidi 'ediya nigeya.

22 Toanugana 'ana esinuwa 'enaya geya'abo 'uemanimanini, 'abona nai ma ina to'umalinao kwaikwaiyidi esinuwa 'iloba, be nate 'ana 'ita 'atuwa 'ina to'umalinao 'ediya 'ulemeleme. Ta 'oyo wate tauyo 'imu bubuna 'u'ita'i'ita 'ai'aili.

23 Geya'abo bwasi namo 'unumanuma, manuna tuta yauna 'ule'oale'oasa ta gamwayo 'iuyauya, 'enega 'ilobwenemu be oine tupwana 'ununuma.

24 'Aina tomota 'idi to'umalinao miyamiya apwesadi manudi 'adi loina sida loba. Ta 'aidi 'idi to'umalinao miyamiya kwaikwaiyidi, ta ma'etamo be sida loapwesedi. 25 Nadigega wate guinuwa bobo'ana 'aidi miyamiya apwesadi, ta 'aidi ma'etamo be sida loapwesedi, manuna nigeya sawesawenaya simiya kwaiya.

Copyright information for `DOB