1 Timothy 6

1'Ali'eiyao 'idi 'inapwanao sida 'amayabedi be sida ematamatanedi. 'Eguma nigeya, 'aina tomota 'ida e'itao si'awa to'umaliyedi, ta sigwae, “Yaubada 'ana toemisao taudi, ta nigeya sida guinuwa palupalu.”

2Wate 'ali'eiyao nidi 'eguma 'idi 'inapwanao ma'ediyao si'awatasina Keliso 'ana emisa 'enaya, be 'enega geya'abo 'idi 'inapwanao 'adi 'amayaba silosalosa'u, ta esi sida etapewa waiwai manudi, be 'idi guinuwa bobo'ana 'ida sinabwa, manuna 'idi 'inapwanao nidi taudi Keliso 'ana toemisao, 'enega obobomega 'ediya sida paisewa.

Toe'ita kabokabo manudi

E'ita getedi 'uloguloguguyaedi tomota 'ediya.
3Ta 'eguma yaita 'ina e'ita dumadumana, nai 'ida 'Inapwana Yesu Keliso 'ina ona palupaludi nigeya 'ida muliyedi, ta e'ita nidi bubuna bobo'ana manuna 'iguitoyasedi, 4tauna 'ina nuwatu'e 'enega 'iemwagemwage 'ai'aila, ta egewagewana nuwanuwana. Taudi nadigega e'ipi'ipi 'aledi, be gamwasowala 'aledi, be eliya ta etalauwala 'aledi. 5'Enega gosediyao ma'ediyao siegewagewana, ta 'idi nuwanuwa geyogeyoi manuna e'ita 'ai'aila geya'abo simwalamwalatoni, ta esi sinuwena 'aene Yaubada 'ana 'amayaba 'enega esaesa bale'u sinabwana siloba.

6Ta 'abo'ada 'ida esaesa dumadumana. Yaubada 'ana 'amayaba 'enega sawesawenaya 'iloineda, ta esi esaesa bale'u 'ana loba geya'abo manuna tanuwanuwa. 7Manuna 'abo'ada lowa ma'animenimeda bale'uya taapwesama, ta ma'etamo wate ma'animenimeda bale'u gete tapilisine. 8'Enega 'ada masula be 'ada 'oama manudi tada gwausowala, ta mali yage manudi geya'abo tanuwanuwa wawasae.

9Taudi esaesa 'ana toyalao ma'etamo Seitani 'ina sikwa 'enega 'i'onadi, ta taudimo 'idi nuwanuwagesi 'ediyega sigie to'umaliyedi, be ma'etamo taudi esilae 'ai'aila siloba. 10Manuna esaesa 'ana yala to'umalina maibo'ana 'aledi, ta wate esaesa 'ana 'ebesa waiwai 'enega 'aina gosedao tapwalolo 'ai'aila sipilisinena, ta 'ebe nuwamwau yaudi silobedi.

'Eda bobo'ana manuna

11Timoti ye, 'oyo Yaubada 'ina toguinuwa, 'enega gete bubuna nina 'enega 'u'ita'i'isiyo, ta bubuna palupaluna 'umuliye, yage nidi nadigega 'eda'eda bobo'ana be emisa be oboboma be 'alama'i'ita be bubuna oo nuwana, 12ta wate tapwalolo 'ana guinuwa bobo'adi 'ediya 'utoo be 'uewaiwai, ta yawasiyo ataya wate 'ugiyai'i'isi, manuna lowa Yaubada 'iesinuwemuya, tuta nina 'imu emisa Yaubada 'enaya 'usimana apwesena tomota yaudi matadiya.

13'Oyo Timoti yaloineyo Yaubada matanaya, tauna yage yauna yawasidi 'ana to'ebwaya, ta wate Yesu Keliso matanaya, tauna lowa Ponitio Pailato 'enaya ona 'ai'ailega 'iona. 14Ta 'igu loina nina 'aene emataluwa getedi 'umuliya 'ai'ailidi, ta geya'abo 'ebweu 'ena 'uneeneta, be 'ana laba 'ida 'Inapwana Yesu Keliso 'iila limanama.

15Manuna ma'etamo tuta nina esiesinuwana 'enaya, Yaubada Yesu 'igieapwese. Yaubada nina toloina tebweuna ta bobo'ana, ta toloinao maibo'adi 'idi toloina, ta wate 'inapwanao maibo'adi 'idi 'inapwana.

16Yaubada namo miyamiya atayana, ta nigeya 'ebweu wate yaita nadigega. Ta 'ina sena nigeya sawesawenaya ta'ita, manuna maedana wawasae, be nigeya sawesawenaya Yaubada nina ta'ita, ta 'ina esaesa be 'ina waiwai geya'abo sigumwagumwala. Eimeni.

17Ta bale'u 'ana toesaesao 'uemataluwedi be geya'abo sinuwanuwa tu'e 'idi esaesa manudi, ta wate geya'abo siemiemisa 'aene ma'etamo 'ebe lema sinabwana 'idi esaesa 'ediyega silobaloba, manuna esaesa nidi sawasawalidi. Ta esi Yaubada namo 'ena sida emisa, manuna Yaubada tauna To'ebwaya bobo'ana, ta 'ida 'ebe gwausowala maibo'ana tauna 'enega siapweapwesama.

18Ta wate toesaesa nidi 'uemataluwedi be guinuwa bobo'adi be eobooboboma be lo'ebwa'ebwaya 'ediyega sida eesaesa 'ai'aila. 19Gete 'enega 'adi e'isa bobo'ana tuta 'imeemai 'ena siloba, nate yawasidi ataya.

20Timoti ye, yage nidi Yaubada 'i'ebwa'emuya 'u'ita'i'ita 'ai'ailidi, ta sinasinapu kabokabo be egewagewana besobeso geya'abo 'umulimuliyedi. Manuna taudi yage nidi getedi 'adi tomuliyao 'idi emisa Yesu 'ena 'ineneta.

Yaubada 'ina oboboma 'emuya.

'Abo'agu Paulo.

21

Copyright information for `DOB