2 Corinthians 1

Lokagutoki

Kagutoki me Kolinita 'omi Yaubada 'ina toekalesiyao, be 'omi wate Yaubada 'ana toemisao sena Akaya maibo'ana solanaya, 'imi leta gete tasidai Timoti 'ilemegu ga 'a'etoladinawa, 'abo'agu Paulo 'eguyega, manuna Yaubada 'ina esinuwega yaetosimana Yesu Keliso manuna. Tamada Yaubada be 'ida 'Inapwana Yesu Keliso 'idi obobomega wada miya gwausowala.

Paulo 'ina miyamwau solanaya 'ilokagutoki Yaubada 'ena

Yaubada, tauna 'ida 'Inapwana Yesu Keliso Tamana 'ena tada lokagutoki manuna tebweuna tauna nuwa'ole'ole 'alena, ta 'ima 'elouyao 'ediyega 'igie gwausowalima, be 'enega sawesawemaya taudi tomiya mwau wate 'ada giegwausowalidi, manuna 'ima 'ebe gwausowala nina Yaubada 'enega 'alobena sawesawenaya be 'asa'ubale 'ediya be taudi wate sida gwausowala. Ona'ai'aila, Keliso 'ana 'elouyao 'abo'ama 'alotoodi ta 'enega Keliso 'ina gwausowala 'i'ebwa'ema, tauna 'ina gwausowala nadigega.

Ta 'eguma 'abo'ama 'elouya 'aloba, nate 'omi 'ami gie'atepatu be 'ami 'etoseyana manudi. Ta wate 'eguma 'ama 'ebe gie'atepatu 'aloba, nate 'omi 'imi 'atepatu manuna, 'eguma 'imi miyamwau nadigega 'abo'ama 'ima miyamwau, be wate 'eguma 'ediyega wae'alama'i'ita 'omi wada 'atepatu. 'Enega 'ima emisa 'omi manumi ni'atu 'iewaiwai, manuna 'amwalatonimi 'aene wa'elo'elouya 'abo'ama nadigega, be wate nadigega wada 'atepatu nadigega 'abo'ama.

Gosegwao, nuwanuwagu be wada mwalatoni 'ima 'elouyao manudi, tuta nina Esia 'ena 'amiyami, nate 'ima nuwamwau sinabwa wawasae 'enega 'anuwena 'aene 'iabe 'amwamwawasa. 'Ana 'ita 'atuwa 'ama talauwalao nidi 'iabe siloemwawasima, ta Yaubada sa'i sawesawenaya be tomwawasao 'igietoolodi, ga miyamwau nina 'alobena, be 'enega 'anuwayaina 'aene nigeya tauma 'ima waiwai, ta esi Yaubada 'ina waiwai 'i'etoseyema.

10 Ta ni'atu 'ebe esilae nina 'enega 'i'etoseyema, ta wate 'anuwayaina 'aene ma'etamo 'ida 'etoseyema tuta maibo'ana 'ediya.

11 'Omi wate 'imi sidesidega wada lemema be 'enega e'isa bobo'ana Yaubada 'enega 'ada loba, yauyauda 'ida sidasida 'ediyega, 'enega maibo'ada tada lokagutoki 'etoseyana nina 'alobena manuna.

Paulo nuwanuwana be me Kolinita 'ida ayausidi

12 'Ebweu yage manuna yagwausowala sinabwana, ta yanuwena ona'ai'aila 'ima bubuna 'esasena ta palupaluna tomota 'ediya, nigeya sinasinapu bale'u 'ediyega, ta esi Yaubada 'ina oboboma 'emaya 'enega, ta wate nadigega 'aguinuwa sinabwana 'emiya. 13 'Imi leta gete 'a'etoladinawa maibo'ana sawesawenaya wasawadi be wamwalatonidi, 'enega nuwanuwagu be wada nuwasabwaleni, 14 nadigega tupwana ni'atu wamwalatonina, be 'enega ma'etamo 'Inapwana Yesu 'ina 'asiyata sinabwana 'enaya wada gwausowala 'abo'ama manuma, ta 'abo'ama sa'i 'ada gwausowala manumi.

15 'Omi yamwalatonimi 'imi emisa 'emaya, 'enega lowa nuwanuwagu be yayausimi maluwa be gwausowala waloba. 16 'Ebweuna 'igu 'adau Masidonia manuna 'ana tutaya, be 'eluwena 'aene Masidoniyega yailama 'emiya, be 'enega 'igu 'eda manuna walemegu be yatatauya Yudia.

17 Geya'abo wanuwena 'aene 'igu ona nina lowa manuna yaenuwanaluwa. Nigeya. Geya'abo yatagwatagwala kabokabo 'atuwa taudi bubuna bale'u 'ana tomuliyao nadigega. 18 Nadigega Yaubada 'ina ona 'ai'aila, 'abo'agu wate 'igu ona 'emiya ona 'ai'aila, ta geya'abo yatagwatagwala kabokabo.

19 Nadigega Yaubada Natuna Yesu Keliso, tauna manuna Silibenosi ta Timoti ma'egwao 'aloguguya 'emiya, Yesu nina nigeya 'ida tagwala kabokabo, ta esi tuta maibo'ana 'itagwala 'ai'ailena. 20 Manuna Yaubada 'ina onaoboboma maibo'adi 'itagwala Yesu namo 'enega. 'Enega Yesu nina 'ana esanega taloeimeni, ta Yaubada tatupuna. 21 'Ida miya bobo'ana Keliso ma'edai Yaubada 'i'ebwa'eda, 'omi be 'abo'ama, ta 'ida guinuwa 'i'ebwa'eda, 22 ta 'ana 'ebe lo'inana 'edaya 'isa'una, tauna Yaluyaluwana 'atedaya, be 'enega tamwalatoni 'aene 'abo'ada 'ina tomotaiyao.

23 Gete Yaubada 'imwalatonina yaonaona 'ai'aila 'aene lowa nigeya yayausimi 'imi senaya Kolinita 'ena, manuna geya nuwagu be yaloina pa'alemi 'imi bubuna to'umalina manuna. 24 Nigeya 'aene 'aetoloina pa'alina 'emiya 'imi emisa be 'imi tapwalolo manudi, manuna ni'atu 'imi emisega watoolopa'ala, ta esi sabi lememi 'imi gwausowala manuna.

Copyright information for `DOB