2 Corinthians 10

Paulo 'ina paisewa

'Abo'agu Paulo taugu yasidasida 'emiya, 'atuwa Keliso 'ina bubuna nuwana 'enega, manuna 'omi wagwae, “Paulo 'ina bubuna nuwana 'eguma ma'edai tada onaona, ta esi 'edasolega 'i'ena pa'alida.” 'Enega yasida 'emiya be wabubuna palupalu, 'abona nai 'igu wai 'emiya 'enaya ya'ena pa'alimi nadigega 'iabe ya'ena pa'alidi taudi sigwae, “Paulo tauna 'ina nuwanuwa 'iguiguinuwa nadigega me bale'u 'idi guinuwa tuga.”

Ona'ai'aila bale'uya tamiyami, ta esi 'ida guinuwa nigeya me bale'u nadigega. Wate 'ida gwegwe nigeya me bale'u 'idi gwegwe saiya nadigega, ta esi 'ida gwegwe dumadumana be 'ediyega Seitani 'ina 'ebeloinao taewaiwai sinedi, Yaubada 'ina waiwaiyega. 'Ida gwegwe nidi 'ediyega sawesawedaya taewaiwaisine bubuna to'umalina, egewagewana be onalaga, nate yage nidi Yaubada 'ana emisa si'etobodena, ta esi tomota 'idi nuwanuwao tagibunidi be Keliso 'ina ona sida ematamatanedi. 'Enega 'abo tuta nina waematamatana 'ai'aila, taudi tologwautoyasa 'adi loina 'edega sida loba.

'Omi tomota 'adi 'ita namo 'ena wadunedune, ta to'ase 'atediya nigeya wamwalamwalatoni. 'Abo yaita 'ionalaga 'aene tauna Keliso 'ina boda, 'ida nuwa'i'isima 'aene 'abo'ama wate Keliso 'ina bodao, ga loina Yaubada 'i'ebwa'ema sabi lememi ta esi nigeya sabi gieto'umaliyemi, be 'abo yaonalaga wawasae 'igu loina nina manuna geya'abo wate 'ebe omayamaya yalobaloba.

Geya'abo leta waiwaidi 'ediyega yagiegie matautemi, 10 nadigega 'aina tomota sigwae, “Paulo 'ina leta 'ediyega 'i'ena pa'alida ta esi 'eguma matadaya 'ionaona 'ana 'ita nenetana tuga, ta 'ina ona nigeya bobo'ana.” 11 'Enega toona nidi sida nuwa'i'isi 'aene to'ase 'edasolega 'igu leta 'ediyega yaonaona yada guinuwa tuga, 'abo to tuta yaweewai 'emiya.

12 Geya'abo yaeonami be yagwae, “'Abo'agu Paulo 'igu bubuna bobo'ana,” nadigega 'aina tomota sigwae, “'Abo'ama 'ima bubuna gosemao 'idi bubuna 'ibobo'ana sinena.” 'Idi ona nidi 'atuwa uwauwadi sionaona.

13 Ta 'abo'agu geya'abo yaonaona laga yage yauna manudi, nate namo 'igu paisewa nina Yaubada 'i'ebwa'eguya manuna yada onalaga, ta 'igu paisewa nina 'aina 'asa 'ediya be 'omi wate 'emiya. 14 'Enega sawesaweguya be 'emiya yaloina. Ona'ai'aila, 'omi 'igu 'ebeloina solanaya, manuna 'abo'agu tetela bobo'ana Keliso manuna yagimi me'ena 'emiya.

15 Nigeya 'aene mali tomota 'idi paisewa 'emiya manuna yaonaona laga, taugu tuga 'igu paisewa manuna, ta yanuwayaina 'aene 'abo 'imi emisa 'isinabwa 'igu paisewa 'emiya wate 'ida sinabwa wawasae, 16 'enega taudi wate sena 'edasola 'ediya tetela bobo'ana yada loguguyae, ta geya'abo yaonaona laga, 'eguma yapaipaisewa tuga taudi tetela bobo'ana ni'atu sinononaya 'ediya. 17 “'Eguma yaita nuwanuwana be 'ionaona gagasa, 'ilobwenena be 'Inapwana namo manuna 'ida ona.” 18 Wate 'eguma yaita taunamo 'i'awa bobo'ane, Yaubada geya'abo 'igwaugwausowala manuna. Ta 'eguma Yaubada tomota 'i'awa bobo'ane, nate 'ebe gwausowala.

Copyright information for `DOB