2 Corinthians 12

Paulo 'ina 'enomata'ita'ita

Sawesaweguya be yaonagagasa, ta onagagasa nigeya wate 'ina lemamo, ta tuwa tuga yada onagagasa 'igu 'enomata'ita'ita 'Inapwana 'enega manuna.

'Ebweu Keliso 'ina tai yamwalamwalatoni, tauna yakwala potini sigumwala 'ena Yaubada 'i'au'ewena, ta 'iyaugwa nai bwalana nai yaluyaluwa namo nigeya yamwalamwalatoni. Yaubada namo 'imwalamwalatoni. 'I'au'ewena ga 'itu'e galewa 'ebweuna 'ena, ga 'itu'e wate galewa 'eluwena 'ena, ga wate 'itu'e galewa 'etonina 'enaya. Yamwalatonina 'aene Yaubada tai nina 'i'au'ewena 'ina sena bobo'ana ta esaesana 'enaya, ta 'iyaugwa nai bwalana nai yaluyaluwa namo, nigeya yamwalamwalatoni. Yaubada namo 'imwalamwalatoni. Ta tai nina me galewa 'idi ona 'aina 'inonodi, ta nigeya sawesawenaya be 'iona apwesedi, manuna etaetabudi.

Mwalatoi nina manuna yada onagagasa, ta geya'abo 'abo'agu manugu yaonaona gagasa. Nate namo 'igu nenetao manudi yada onagagasa.

Ta 'eguma to tuta yada onagagasa, nate ona 'ai'aila, ta nigeya ona uwauwa. Ta tuwa geya'abo yaonaona gagasa, manuna nuwanuwagu be to'ase 'igu guinuwa wa'itediya nai 'igu ona wanonodiya, gete namo manudi be geya'abo to'ase wate manugu wada nuwanuwa.

Ta Yaubada geya nuwana be yanuwanuwa tu'e 'igu 'enomata'ita'ita bobo'adi manudi, 'enega yage mwauna Seitani 'enega 'i'ebwa'eguya, ga solagu 'ana lotoona 'atuwa ma gitana, ta manuna yanuwanuwa mwau, ga nigeya sawesaweguya yanuwatu'e. Mwau nina gete manuna matoi Yaubada yasidena be 'ida 'ewayaule, ta 'igu sida nina 'ie'isena, 'igwae, “Geya'abo, ta esi 'igu oboboma namo sawesawemuya, be 'imu neneta 'ena 'igu waiwai 'uda lotoona 'aene sawesawenaya.”

'Enega 'igu nenetao manudi yagwaugwausowala be yada onagagasa, manuna 'igu tuta neneta 'ediya Keliso 'ina waiwai 'eguya 'imiyami.
10 'Enega Keliso manuna yatagwatagwala mwau yaudi 'ediya, nadigega neneta, 'awa to'umalina, tuta mwau, etalauwala, esilae. Manuna 'abo yaneneta gete 'igu 'ebe ewaiwai!

Paulo 'ina nuwanuwa me Kolinita manudi

11 Ona'ai'aila, 'omi 'imi bubuna manuna ni'atu yaonaona 'atuwa uwauwagu, ta esi 'ilobwenemi be wa'awa bobo'anegu, manuna 'imi tologuguya auwaudi wa'awa bobo'anedi, ta 'abo'agu wa'awa yage besobesoegu, ta taudi nigeya sida bobo'ana sinegu. 12 We'iwe'iyaya nidi matamiya ma igu e'alama'i'ita yaguinuwedi, nate yage 'ebe nuwaowana ta guinuwa waiwaidi, be 'ediyega wada mwalatonigu 'aene 'abo'agu Keliso 'ana tosimana 'ai'aila. 13 Wate 'igu guinuwa manumi tuga nadigega 'igu guinuwa ekalesiyao maibo'adi manudi, ta 'ebweu yage namo nigeya 'emiya yaguiguinuwa, 'agu lema mani ya'ewena ekalesiyao yaudi 'ediyega, ta esi 'omi 'emiyega nigeya. Gosegwao, yasidasida 'emiya be 'igu loegesi gete wada nuwatau.

14 Tuta gidalina be yawawai 'emiya. Lowa maluwa yayausimi, ta gete 'iabe 'etonina yawawa, be geya'abo 'ebweu wate mwau yasa'usa'u 'emiya 'agu lema manuna, ta esi 'omi tuga nuwanuwagu, ta geya nuwagu 'imi gwegwe. Gogama nigeya lema sida 'ebwa'edi tamadiyao 'ediya ta tamadiyao esi si'ebwa'ebwaya natudiyao 'ediya, 'enega 'abo'agu 'ilobwenegu be 'omi natugwao 'emiya yada 'ebwaya. 15 Ni'atu yatagwala be 'igu gwegweyao be 'igu tuta be yawasigu wate yada 'ebwaya yaluyaluwami sabi 'etoseyedi. 'Igu oboboma 'emiya sinabwana, 'enega mwa'adega ga 'enega 'omi 'imi oboboma 'eguya gidalina tuga?

16 Ta 'aimi wagwae, “Paulo 'ima gwegwe nigeya 'ida 'ewedi, ta esi 'ina mwalatoi sinabwana 'enega 'ikaboema.”

17 Nigeya! Tai nidi yaetunediwa, 'igu loinega mwa'adega sikabo'esa? Nigeya, aga?

18 Lowa Taito yaloinena ga tasidai 'ebweu ma'iyana yaetunediwa 'emiya. To'ase Taito 'ina kabo 'emiya? Taito ta 'abo'agu 'ima nuwanuwa be 'ima bubuna 'emiya leleleya, aga?

19 Gosegwao geya'abo wanuwanuwa 'aene 'igu ona getedi 'ediyega ya'awa bobo'anegu matamiya. Nigeya, ta esi maibo'ana Yaubada matanaya Keliso 'ina ona yaonaonaenawa sabi giewaiwaiyemi.

20 Ona'ai'aila ya'atesa'ala, ta geya nuwagu yawawai be 'imi bubuna ya'italoba 'aene nigeya bobo'ana, be 'igu wai manuna wada nuwamwau, 'abo taumimo waegewagewana be wae'ipi'ipi ta wagamwasowala, nai walogwegwe diidiga, ta gosemiyao wa'awa to'umaliyedi, be wanuwatu'e, nai waguinuwa besobeso. 21 'Igu 'atesa'ala nina 'aene 'abo yawai limana 'emiya be 'ebe omayamaya Yaubada 'i'ebwa'egu matamiya, be taudi lowa siloegesi, ta 'idi bubuna baibailidi be loelata be sogala 'ediyega nigeya sinuwanuwa 'ebuni, taudi sida gienuwa mwaugu be manudi yada dedoi.

Copyright information for `DOB