2 Corinthians 5

'Ida anuwa galewaya

Bwalada 'atuwa 'ida anuwa bale'uya, ta tamwalatonina 'abo 'ieligei, 'ida anuwa auwauna galewaya tada loba, nigeya tomota nimadiyega siguinuwena, ta esi miyamiya atayana tauna Yaubada 'enega. Gete tuga bale'uya ma ida nuwamwau tayamwayamwa, nuwanuwada 'ida anuwa galewaya tada 'ewa, 'atuwa 'ada 'oama auwauna ta bobo'ana ta'ote, be geya'abo tabubugewa.

Ona'ai'aila, ma'etamo anuwa bale'u 'ena tamiyami ma ida 'elouyao be ma ida nuwanuwa yauna tuga, ta nigeya 'aene 'ada 'oamao taalolodi ta esi 'aene 'ada 'oama auwauna ta'ote, be 'enega bwalada sawasawalidi sida sa'ugelasa yawasida auwauna 'enaya.

Gete maibo'ana Yaubada 'igibubuna be 'i'ebwa'eda ta we'iwe'iyaya 'i'ebwa'eda be 'enega 'ana 'ai'aila tamwalamwalatoni, nate Yaluyaluwa Tabuna. 'Enega tuta maibo'ana 'ediya ta'ate'atepatu, ta tamwalatonina 'aene 'abo 'ida anuwa bale'u 'ena tamiyami nate nigeya 'Inapwana 'ina senaya, manuna 'ida emisa 'enega tatautauya ta nigeya duneyega.

'Enega ta'atepatu, ta nuwanuwada bwalada tapilisinedi be 'Inapwana 'ina senaya taapwesa. Ta 'eguma bwaladaya tamiyami, nai 'eguma bwalada tapilisinedi, 'ida 'ebe masi tuga to'ase 'Inapwana nina nuwanuwana.

10 Manuna ma'etamo 'abo tuta nina Keliso 'ina 'ebemi esaesa 'ena 'imiyatowa sabi loineda, maibo'ada 'ada e'isa 'enega tada loba, nai bobo'ana nai to'umalina, nadigega 'ida guinuwao bada bale'uya.

Tomota auwauda

11 Gete manuna tauna 'Inapwana nina 'amatautena ga tomota 'ediya 'aloguguya. Yaubada 'ima bubuna 'imwalamwalatoni ta yanuwayaina 'omi wate wamwalamwalatonima 'aene bobo'ama. 12 Nigeya 'a'awa'awa bobo'anema tauma 'ima onao gete 'ediyega, ta esi taudi sinuwanuwa eesaesa manuna, ta nigeya 'atedi manuna, 'eguma 'idi ona wae'isa wada e'itadi 'aene 'abo'ama 'ima bubuna bobo'ana.

13 'Eguma 'ima ona gete 'atuwa ona uwauwa nate Yaubada manuna, ta esi 'eguma 'ima ona palupaluna nate 'omi manumi. 14 Keliso 'ina obobomega 'aonaona, manuna tauna tuga 'ama toloina. Ona'ai'aila, tauna maibo'ada manuda 'imwawasa, 'enega maibo'ada 'atuwa tomwawasa. 15 Ta 'ina mwawasa maibo'ada manuda 'alena 'aene ma'etamo mayawasida, nigeya tauda 'ida guinuwao sabi guinuwedi, ta esi Keliso manuna, tauna manuda 'imwawasa ga wate 'itoolo limana.

16 Lowa, 'igu nuwanuwa 'aene Keliso tauna tai to'umalina ta esi ni'atu yanuwa'ebuni, 'enega geya'abo taesiesinuwa tomota 'ediya 'aene bobo'adi nai to'umalidi, nate me bale'u 'idi nuwanuwa nadigega, 17 ta esi wanuwa'i'isi 'aene 'abo yaita Keliso 'enaya 'imiyami, tauna 'ietomota auwauna. 'Ina bubuna kadekadelina ni'atu 'igumwala, ta auwauna sa'i ni'atu 'iapwesama.

18 Oboboma gete Yaubada 'enega, tauna Yaubada nina Keliso 'ina guinuwega 'i'au'eweda tauna 'enaya, ga ma'edai taegosigosiyana limana, ta wate 'ida guinuwa 'i'ebwa'eda be tomota tada me'edi egosigosiyana nina 'enaya. 19 Ona'ai'aila, Yaubada 'atuwa Keliso solanaya 'imiyami ga me bale'u 'i'au'eweda tauna 'enaya sabi egosigosiyana limana, ta 'ida loegesiyao 'inuwataudi be geya'abo 'ie'ie'isadi, 'enega egosigosiyana limana tetelina 'i'ebwa'eda, be tasimasimana tomota 'ediya.

20 'Abo'ama Keliso 'ana tosimanao ga Yaubada 'emega 'iloguguya 'emiya, ta Keliso manuna 'asidemi be Yaubada 'ena wada egosigosiyana limana. 21 Yaubada nina 'abo'ada manuda Keliso 'iloinena, tauna nigeya 'ebweu wate 'ina to'umalinamo, ta Yaubada 'itagwalena be Keliso nina 'atuwa tai to'umalina, be tauna 'enega 'abo'ada Yaubada 'ina bubuna palupaluna tada lowa'elu.

Copyright information for `DOB