2 Corinthians 8

'Ebwayadaita manuna

Gosegwao, nuwanuwama be toekalesiyao Masidonia solanaya wada mwalatonidi 'aene Yaubada 'ienuwa sa'uyedi ga 'ebwayadaita bobo'ana sisa'una. Taudi gomagomabesodi nadigega 'atuwa 'ebe toona silobena 'idi miya 'ana mwau 'enega, ta tuwa tuga ma idi gwausowala 'ebwayadaita bobo'ana wawasae sisa'una.

Yaona 'ai'aila me Masidonia nidi 'atedi sitagwaledi ga 'idi yageyao si'ebwaya daitedi ma 'ana loeposeyana, ta sisidasida waiwai 'emaya be 'abo kapekapeyana sida 'ebwayadaita Yelusalema 'ana toekalesiyao 'adi lema manuna.

'Abo'ama 'ima nuwanuwa nadigega be sida 'ebwayadaita, ta ona'ai'aila 'idi 'ebwayadaita nina sinabwa wawasae, manuna 'Inapwana 'ena sitagwaledi nugana, 'enega wate sitagwaledi 'emaya nadigega Yaubada 'ina nuwanuwa.

'Enega Taito 'aeonena, 'agwae, “Lowa 'ue'ale ga me Kolinita 'ulemediya 'idi 'ebwayadaita 'ana guinuwa manuna, 'enega 'ulemedi wate be silosaloni.”

'Omi ni'atu wabubuna bobo'ana 'imi guinuwa yauna 'ediyega, nate emisa be simana be mwalatoi be etapewa be wate 'imi oboboma 'emaya, 'enega 'ilobwenemi be 'ebwayadaita bobo'ana wate wada guinuwe.

Gete 'igu ona tuga ta nigeya 'aene yaloiloinemi, ta manuna 'aina toekalesiyao yamwalatonidi sietaetapewa 'ebwayadaita manuna, 'enega 'ebe toona gete yasa'una be ta'ita nai waeobooboboma 'ai'aila, nai nigeya.

'Omi 'ida 'Inapwana Yesu Keliso 'ina oboboma wamwalatonina, tauna 'ina esaesa sinabwana 'ipilisinena ga 'iegomabeso sabi 'etoseyemi, be 'aene 'ina egomabeso 'enega 'omi wada eesaesa.

10 'Enega nuwanuwa ya'ebwa'emi. Yakwala 'igumwala nuwanuwami ga wae'ale be wa'ebwayadaita, 'enega 'ilobwenena be walosaloni. 11 Lowa waetapewa ga wae'alena, 'enega batuwa wate 'imi 'atetagwalega to'ase 'emiya simiyami 'ediyega 'ebwayadaita nina wada losaloni. 12 Geya'abo waonaona be wagwae, “Nigeya 'ebweu yage 'emaya be 'enega 'ada 'ebwayadaita.” Tuwa tuga wada etapewa be to'ase 'emiya 'imiyami 'ediyega wada 'ebwayadaita, be Yaubada wada giegwausowali. 13 Gete nigeya 'aene 'omi 'imi 'ebwayadaita 'ana mwau sinabwana ta mali 'asa 'idi 'ebwayadaita 'ana mwau gidalina, 14 ta esiya leleleya tuga. 'Eguma gete tuga 'imi gwegwe yauna, sawesawenaya be mali 'asa walemedi 'idi miyamwau 'ediyega, be 'abo to tuta taudi 'idi gwegwe yauna sida lememi wate, 'abo wamiyamwau. 'Enega wada eleleleya. 15 'Ebweu ona 'imiyami Buki Tabu 'ena 'igwae,

“Taudi siegogona sinabwana nigeya 'adi masula

'ana tupwamo, ta taudi siegogona gidalina 'adi masula tuga sawesawediya.”

Taito magosenao sitatauya Kolinita

16 Yaubada 'ena yalokalokagutoki, manuna Taito 'ina nuwanuwa sinabwana ni'atu 'i'ebwa'ena, be tauna 'ida lememi, nadigega 'abo'ama wate 'ima nuwanuwa. 17 'Enega tuta nina 'aeonena be 'iayausimi, 'itagwala 'ai'ailena manuna nate tauna 'ina nuwanuwa sinabwana.

18 'Enega wate tasidai 'ebweu Taito ma'iyana 'aetunediwa, tauna tologuguya 'ebweu tetela bobo'ana manuna, ta 'ana esana sinabwana toekalesiyao 'ediya, 19 ta wate toekalesiyao 'ina paisewa si'ebwa'ena, be tauna ma'emai 'asakosakowasi 'ebwayadaita manuna sabi lememi, be 'enega tomota Yaubada sida tupui.

20 Geya nuwama be 'ebweu yaita 'ida lomugiyema 'ima 'ewa 'ebwayadaita gete sinabwana manuna, 21 ta esi nuwanuwama be tuta yauyauna 'ediya 'ada guinuwa palupalu Yaubada matanaya, ta wate tomota matadiya.

22 Tasida wate 'ebweu ma'edi 'aetunenawa, tauna 'amwalatonina 'aene toemisa 'ai'aila 'ina guinuwa yauna 'ediyega, ta gete tuga 'omi 'imi bubuna bobo'ana ni'atu 'inonona ga 'iemisena, 'enega nuwanuwana sinabwana 'iayausimi sabi lememi wate.

23 Taito wamwalatonina 'aene ma'iyagu 'aguiguinuwa leleleya 'ami lema manuna, ta tasidao nidi taudi toekalesiyao manudi siguiguinuwa, ga manuna tomota Keliso situpuna. 24 'Enega 'ilobwenemi be tasidao nidi waoboboma 'ai'ailidi, be 'ima tuputupu 'imi oboboma manuna sida emise, be wate boda ekalesiya yaudi sida 'awabobo'anemi.

Copyright information for `DOB