2 Corinthians 9

'Ebwayadaita toekalesiyao gomagomabesodi manudi

Geya'abo leta 'enega yaemaemataluwemi 'imi 'ebwayadaita toekalesiyao manudi, manuna ni'atu wamwalamwalatoni, ta wate yamwalatonimi 'aene 'ebwayadaita nina manuna wagwausowala, 'enega 'omi ya'awa bobo'anemi me Masidonia 'ediya, yagwae, “Sena Akaya 'ena taudi me Kolinita ni'atu sietapewa ga 'idi 'ebwayadaita sigibubuna yakwala 'igumwala 'enaya.” 'Enega yaudi 'ediyega wate nadigega siguinuwa'esa. Geya nuwagu be 'igu tupu manumi tomota sida 'awakabokaboegu, 'enega tasidao nidi yaetunediwa sabi lememi be 'imi 'ebwayadaita nina wagibubu, nadigega 'imi etapewa yasimanena 'ediya. 'Abo ma'etamo 'aina me Masidonia ma'egwao 'aweewa be si'italobami 'imi 'ebwayadaita nigeya wagibugibubuna, gete 'ebe omayamaya 'eguya ta wate 'emiya, 'igu gimisimana nina manuna.

'Enega yanuwena 'aene 'ilobwenena be tasidao nidi sida wai nugana sabi lememi 'imi 'ebwayadaita nina waona upaupaena 'ana gibubu manuna, be 'abo'agu tuta muliyega wate yawawai. Manuna geya'abo lo'aeetuetune 'enega wa'ebwa'ebwaya daita, ta esi 'atetagwalega.

'Ebwayadaita 'ana nuwanuwa nadigega bagula. Tauna 'idauna gidalina 'isesoi gidalina, ta tauna 'idauna sinabwana 'isesoi sinabwana.

'Enega 'omi 'ebweuna 'ebweuna tauna 'ina nuwena 'enega 'i'ebwaya daita, nigeya 'aene lo'ae etuetuneyega nai 'i'imega, ta esi 'atetagwalega, be gete manuna Yaubada 'ida gwausowala sinabwana.

Ta Yaubada nina sawesawenaya be oboboma maibo'ana 'ida 'etosiwa 'emiya, be tuta yauyauna yage maibo'ana sawesawemiya ma 'ana tupwa sinabwana 'ebwayadaita manudi. 'Ebweu ona 'eto'etoladina Buki Tabu 'ena Yaubada manuna 'igwae,

“Obobomao 'ilelewanedi togomabeso mali sena be mali sena 'ediya, tauna 'ibubuna palupaluna, ataya be ataya.”

10 Tauna ewana be masula 'adi To'ebwaya 'imi yageyao 'ida 'ebwa'emi be sida sinabwa 'ai'aila, be 'imi bubuna bobo'ana 'enega sesoi sinabwana wada loba, 11 be 'imi esaesa 'enega sawesawemiya gwegwe sinabwana wada egueguyaiyedi, be wate 'imi 'ebwayadaita nina 'abo'ama 'ada 'ebwaya togomabeso 'ediya, be 'enega taudi sida lokagutoki sinabwana Yaubada 'ena. 12 'Imi 'ebwayadaita gete 'enega toekalesiyao gomagomabesodi 'adi lema silobaloba, ta wate Yaubada 'ana tupu sinabwana 'ida apwesa.

13 Ta togomabeso nidi sida gwausowala 'adi lema be mali boda wate 'adi lema bobo'adi 'emiyega manuna, be wate 'imi ematamatana Keliso tetelina 'enaya manuna sida ona'ai'aila, be wate Yaubada sida tupu, 14 be wate ma idi nuwa'ewa 'idi sidasida manumi 'ediyega Yaubada sida lokagutokiye 'ina oboboma 'atemiya 'isa'una manuna.

15 Ona'ai'aila, Yaubada 'ena tada lokagutoki 'ina oboboma sinabwa wawasae manuna.

Copyright information for `DOB