2 Peter 1

Lokagutoki

'Abo'agu Yesu Keliso 'ina toguinuwa, nai 'ana tosimana, 'imi leta ya'etoladinawa, manuna 'omi be 'abo'agu 'ida emisa leleleya, tauna 'ida Yaubada be 'ada To'etoseyana Yesu Keliso 'idi loina bobo'ana 'enega talobena. Gete yage nina 'edaya yage sinabwana. 'Enega Yaubada be 'ida 'Inapwana Yesu 'adi mwalatoi 'enega, oboboma 'ai'aila be gwausowala 'emiya sida siwa.

Yaubada nina 'ina waiwaiyega 'ilemeda ga 'iobobomeda, ta yage yauna yawasida be 'ida bubuna 'esasena manudi 'i'ebwa'eda. Manuna tauna tamwalatonina 'aene 'iesinuweda be 'ina esaesa ta 'ina bubuna palupaluna 'i'ebwa'eda. Ta wate 'ina onaupaupa bobo'adi ta waiwaidi 'ediyega bubuna bale'u 'ana yalakwaiyao to'umalidi waebesinedi, ga Yaubada 'ina bubuna bobo'ana walobena.

'Enega watoo waiwai be 'imi emisa waloeposeyanedi gete yage nidi 'ediyega: nugana bubuna bobo'ana, 'eluwena mwalatoi, 'etonina 'alama'i'ita, eatana toolopa'ala, enimana bubuna 'esasena, esikisina egosigosiyana, ta 'ebe losalowa oboboma. 'Enega 'eguma yage nidi 'emiya sisinasinabwa 'ai'aila, 'ida 'Inapwana Yesu Keliso 'ana mwalatoi 'enaya waewaiwai, ta geya'abo 'imi paisewa simudamudala. Ta 'eguma yage nidi nigeya 'emiya simiyami, 'ana 'ita 'atuwa matakebokebomi, manuna gie'esasa 'imi to'umalinao 'ediyega lowa ni'atu wanuwa pupulena.

10 'Enega, gosegwao, watoo waiwai be geya'abo Yaubada 'ana esiesinuwao bodadi 'enega wamiyamiya apwesa. Ta 'abo 'igu ona getedi waematamatanedi geya'abo wabe'ube'u, 11 be 'enega muliyega ma imi gwausowala walulugu 'ida 'Inapwana ta 'ada To'etoseyana Yesu Keliso 'ina 'ebeloina 'enaya, be nada wamiya ataya.

12 'Enega nuwanuwagu be yaguguyami be yage getedi wanuwa'i'isidi, manuna ni'atu wamwalatonidi ga mwalatoi 'ai'aila 'emiya 'imiyami. 13 Ta tuta gete mayawasiguya yamiyami, 'ilobwenegu be yagie nuwa'i'isimi be waetapewa bubuna bobo'ana manuna. 14 Manuna 'ida 'Inapwana Yesu Keliso ni'atu 'ie'itegu 'aene 'iabe yapilisinemi, 15 'enega yatootoo waiwai be 'aene ma'etamo 'igu kwaiya mulinaya e'ita nidi geya'abo wanuwanuwa pupuledi.

Keliso 'ina maedana si'itena

16 Lowa 'ida 'Inapwana Yesu Keliso 'ina waiwai be 'ina mai 'asimanedi 'emiya, ta 'ima simana nina nigeya tosinasinapuyao 'idi emwasalao 'ediyega, ta matamega tauna 'ina esaesa 'a'itena. 17 Ta tuta nina lowa ma'emai 'oyaya 'amiyami Yaubada 'enana galewega 'anonona 'igwae, “Gete Natu'ai'ailigu, tauna manuna yagwausowala sinabwana.” Ta 'enana nina Tamana 'ina sena 'esasena galewega 'imai, ga 'oya nina debanaya Yaubada tupu ta esaesa maemaedanina Natuna 'i'ebwa'ena.

19 Ta palopitao lowa 'idi ona 'ediyega Keliso sigimi simanena, ta 'abo'ama 'a'itena, 'enega 'omi 'ilobwenemi be ona nidi wanuwa'i'isidi, manuna ona nidi 'atuwa mayale sena guguyoi 'enaya 'imaemaedana be 'ana laba tomwa 'iulisi ta 'Ubwana 'atemiya 'isasae.

20 Ta yage gete wada nuwasabwaleni 'aene palopitao 'idi ona Buki Tabu solanaya nigeya sawesawenaya taudamo 'adi gibui tamwalatonidi, 21 manuna palopitao nidi nigeya taudimo 'idi nuwenuwega sionaonaedi, ta esi Yaubada 'enega, ta Yaluyaluwa Tabuna palopitao 'ienuwa sa'uyedi ga ona nidi sionaedi.

Copyright information for `DOB