2 Peter 2

Toe'ita kabokabo manudi

Ta esi lowaenei 'aina palopita kabokabodi tomota gamwagamwanidiya siapwesa. Nadigega wate gete tuga toe'ita kabokaboyao gamwagamwanimiya siapweapwesa, ta 'idi e'ita kabokabo 'enega tomota sigie to'umaliyedi 'idi e'ita to'umalina 'enega. 'Inapwana nina tauna 'iyotulidaya, ta taudi sieyaseyaseye, 'enega e'isa to'umalina 'iabe siloba. Ta tomota yaudi 'idi guinuwa to'umalina nadigega loelata sida etotowanedi, nate Yesu 'ina 'eda 'ai'aila 'ana 'ebe 'awato'umali.

Ta toto'umalina nidi gwegwe 'ana toyala diidigao, 'enega 'idi ona dibidibiyega ma'etamo sikaboemi be 'imi gwegwe si'ewadi. Lowaenei 'adi e'isa Yaubada 'isa'una ga 'iyamwayamwa, ta nigeya 'ida sa'ugelasa.

Manuna Yaubada aniloseyao to'umalidi nigeya 'i'ate'atenuwa 'ole'oleyedi, ta esi gaula guguyoi 'ena 'iula mwa'utedi, ga simiyami be 'ana laba bwa'omatana 'ana tuta. Ta wate lowaenei me bale'u maibo'adi nigeya 'i'ate'atenuwa 'ole'oleyedi, ta esi muluwega toto'umalina nidi 'imutudi. Ta Noa namo ma ina bodao site sebeni 'i'etoseyedi, manuna Noa tauna bubuna palupaluna 'ana tologuguya.

Ta wate 'asa nidi to'umalidi Sodoma be Gomola 'igabudi ga siekalikau, be 'enega 'aene maibo'ada tada mwalatoni, be geya'abo tabuubuna to'umalina nadigega taudi. Ta Loti tebweuna 'asa nidi 'ediyega 'ina bubuna palupaluna, 'enega Yaubada 'i'etoseyena. Ona'ai'aila, Loti nina toto'umalidi 'idi bubuna sogala manuna 'inuwamwau. Manuna Loti toto'umalina nidi gamwagamwanidiya 'imiyami, ga 'idi bubuna geyogeyoi 'i'ita'ita ta 'inoono, ga 'inuwamwau sinabwana.

'Enega tamwalamwalatoni 'aene Yaubada tobobo'adi 'ebe tooyao 'ediyega 'ida 'etoseyedi, ta toto'umalidi 'iloinedi be 'ana laba 'asiyata bwa'omatana 'enaya.

10 Ona'ai'aila, 'eguma toto'umalidi Yaubada 'ina loina siguitoyasei, be 'idi yalakwaiyao baibailidi simulimuliyedi, 'adi e'isa to'umali 'ai'ailina 'i'ebwa'edi. Toto'umalina nidi wate gagasa 'aledi, ta nigeya 'idi 'amayabamo me galewa to'esasedi 'ediya, ta esi si'awa'awa to'umaliyedi. 11 Ta aniloseyao ma idi waiwai sinabwana 'idi 'ebemiya Yaubada matanaya, ta nigeya 'ilobwelobwenedi be toe'ita kabokabo nidi si'awa to'umaliyedi.

12 Ona'ai'aila toto'umalina nidi 'atuwa yobai. Yobai 'adi lotoona namo simulimuliyedi, ta nigeya sida nuwanuwa palupalu, 'enega tomota yobai nidi sigiyaidi be siunudi. Toto'umalidi wate mwalatoi 'ai'aila nigeya sida mwalatonina ta esi si'awa'awa to'umaliye, 'enega taudi wate sida esilae, yobai nadigega, 13 be 'adi e'isa 'idi to'umalina manuna 'ida to'umali 'ai'aila.

Nuwanuwadi 'asiyata 'ebweuna 'ebweuna siegwausowala besobeso. Ta 'eguma ma'emiyao wa'e'ai, 'idi bubuna to'umalina 'ediyega sigiebailimi.
14 Ta 'idi loelata 'enega ga simatamata yauyau, ta 'idi loelata limalimana manuna nigeya tona'adi 'ida towa. Ta toneneta sianuganedi 'eda to'umalina 'ena, ta gwegwe 'ana nuwa'ewa 'ediya 'isinabwa wawasae. Ta Yaubada ma'etamo 'ie'isadi 'idi bubuna to'umalina manuna.

15 'Eda palupaluna ni'atu siebesinena ga sitauya gesi, 'enega Bioli natuna 'ana esana Balami 'ina bubuna to'umalina lowaenei taudi gete tuga simuliyena, manuna tauna nuwanuwana be 'ina guinuwa to'umalina 'enega 'ida eesaesa, 16 ta yobai 'ebweuna ase Balami nina 'ina bubuna to'umalina 'igie losa'una, ta yobai nina tomota 'enadega 'iona Balami 'ena, ga 'ina guinuwa kabaleya 'i'etobodena.

17 Ta toe'ita kabokabo nidi 'idi bubuna 'atuwa nadigega bwasi gaula nigeya bwasi dimo, ta taudi wate nadigega pwana, nigeya sida miyabaula, 'enega Yaubada 'ida sa'umwa'utedi gaula guguyoi 'ena be nada sida miyaataya.

18 Toe'itao nidi 'idi bubuna to'umalidi ma idi ona gagasa siemwaemwasala, ta wate yalakwaiya to'umalidi 'ediyega tonuwa'ebuni'unu silisidi be siila limana 'idi gimi bubuna 'ediya. 19 'Adi tomuliyao nidi 'ediya sigwae, “'Eda gete 'ena wameemai, 'eda bobo'ana, ta nigeya 'ebweu wate 'etoboda 'imiyami.” Ta nigeya, ta taudi 'idi bubuna to'umalina 'enega taudimo siyonidi.

20 Taudi lowa 'ida 'Inapwana ta 'ada To'etoseyana Yesu Keliso tetelina siemisena ga bubuna bale'u sipilisinena, ta 'eguma siila limana bubuna kadekadelidi 'ediya ma'etamo sineeneta, ta 'enega taudi sito'umali 'ai'aila.

21 Taudi nigeya bubuna palupaluna 'ana 'eda simwalamwalatoni, ta e'ita kabokabo simulimuliyedi, ta ma'etamo to'umalina siloba. Ta esi taudi ni'atu bubuna palupaluna 'ina 'eda be Yaubada 'ina loina 'esasena 'ana tomwalatoiyao, 'eguma sipilisinei sito'umali 'ai'aila. 22 Ta 'idi bubuna nina nadigega tuga onasemalimali 'ebweu 'igwae, “Kedewa tauna maiwana 'ida 'elima.” Ta wate, “Bawe bwalana tagie'esasai, ta muliyega 'iila be 'iesepwasepwala limana.”

Copyright information for `DOB