2 Thessalonians 1

Lokagutoki

'Abo'ama Sailasa be Timoti ma'egwao 'imi leta 'a'eto'etoladinawa 'omi toekalesiyao Tesalonaika 'enaya, manuna 'omi Tamada Yaubada be 'Inapwana Yesu Keliso 'adi toemisao. Tamada Yaubada be 'ida 'Inapwana Yesu Keliso 'idi obobomega wada miya gwausowala.

Keliso ma'etamo 'iilama tomota 'adi loina manuna

Gosemao, 'ilobwenema be tuta yauyauna Yaubada 'ada lokagutokiye 'imi emisa be 'imi eobooboboma taumimo 'emiya 'adi sinabwa manuna. 'Enega toekalesiyao sena yaudi matadiya 'atuputupumi, 'agwae, “Taudi me Tesalonaika e'alama'i'ita 'aledi. 'Anabwa'ayoi 'adi talauwalao mwau sinabwana si'ebwa'edi, ta tuwa tuga ma idi 'alama'i'ita be ma idi emisa Yaubada 'enaya.”

Gete 'ebe'ita be 'enega Yaubada 'ina loina palupaluna tada mwalatoni, manuna 'imi miyamwau nidi 'ediyega 'igiepa'alimi, be 'enega 'ina 'ebeloina 'ana lugu 'ida lobwenemi. Nadigega wate sa'i taudi 'ami togie'elouyao 'adi e'isa Yaubada 'igibugibubu be 'ina gamwasowala sida loba.

'Omi tomiyamwau yaeonami 'aene ma'etamo 'ida 'Inapwana Yesu galewega 'ida mwa'uta maninima, ma ina aniloseyao ta 'awe sabelulu wate 'ida me'e, be 'omi ta 'abo'ama 'ida 'ebe eyawai'ata 'ida 'ebwa'eda, ta taudi 'ida 'Inapwana Yesu Keliso tetelina siguitoyasena, ga Yaubada siemwagemwageyena, 'adi e'isa mwauna 'ida 'ebwa'edi. 'Enega sida miya dumaduma, ta sida esilae ataya 'asa gabugabu 'enaya, be 'Inapwana maninina be 'ina waiwai ta 'ana tupu geya'abo si'ita'ita. 10 Manuna 'abo tuta nina 'imamai, 'ana tupu sinabwana 'ida loba 'ina guinuwao 'ebe nuwaowana manudi 'ana toemisao 'ediyega. Ta 'omi lowa tetelina 'a'ebwa'emi ga waemisena, 'enega ma'etamo 'omi ma'emao Yesu 'ina apwesama 'enaya tada tupu.

11 Lowa Yaubada 'iesinuwemi ga 'ibwauyemi, ga 'enega waemisena. Gete manuna 'abo'ama tuta yauyauna 'asidasida manumi be 'aene wada muliya 'ai'aili. Manuna 'omi nuwanuwami be emisa 'ai'ailega wada bubuna palupalu, 'enega 'ima sidasida Yaubada 'enaya 'aene 'ida giewaiwaiyemi be guinuwa nidi wada guinuwedi. 12 Gete 'enega be tomota yaudi 'ida 'Inapwana Yesu 'ana esana situpu, 'omi 'imi guinuwa bobo'adi manudi. Ta 'omi wate tupu waloba tauna 'ana esanega, ta tupu nidi maibo'ana Yaubada be 'Inapwana Yesu Keliso 'idi oboboma 'enega.

Copyright information for `DOB