2 Thessalonians 2

'Ebweu tai to'umalina manuna

Gosemao, nuwanuwama be wada mwalamwalatoni 'ida 'Inapwana Yesu Keliso 'ina apwesa limana be 'ida egogona 'enaya manuna, be 'enega geya'abo wa'ate'ate sa'ala. 'Enega 'eguma tomota sigwae, “'Inapwana 'ina apwesa limanama 'ana tuta gete,” geya'abo waemiemisedi. 'Eguma siona 'aene mwalatoi gete silobena 'idi madawalega, nai Yaubada 'ina ona 'ediya 'enega, nai 'abo'agu 'idi leta ya'etoladina 'ediya 'enega, geya'abo 'ebweu wate 'idi kabo nidi waemiemisedi, ta esi wada nuwa'i'isi 'aene nugana tomota yaudi Yaubada sida etalauwale, be tai to'umalina 'ida apwesa, ta muliyega Yesu 'iilama. Ona'ai'aila, tai nina to'umalina ta guguyoi taina, Yaubada 'ana saiya ta wate 'ebe emisa maibo'adi 'adi saiya, 'enega tauna 'ida gitu'eye be Yaubada 'ina Anuwa Tabu 'enaya 'ida miyatowa, be 'ida etoloina 'atuwa Yaubada.

Nai wanuwa'i'isina 'aene lowa 'omi ma'egwao tamiyami ga yage nidi manudi yaeonemi. Ta 'omi tai nina to'umalina 'ina mai so'iso'i 'alena, ni'atu wamwalamwalatoni 'aene 'eguma 'ina mai 'ana tuta 'ilobai 'enega 'iapwesama.

Ona'ai'aila, gete tuga tai to'umalina nina 'ina guinuwao ni'atu siapweapwesa kwaiya bale'uya, ta mali tai sa'i guinuwa to'umalidi nidi 'i'eto'etobodedi be 'ana laba to'etoboda nina 'itoolosi'i, be 'enega toto'umalina nina 'iapwesama. Muliyega 'ida 'Inapwana Yesu 'ida apwesama, be tai to'umalina nina 'ida loesawali yage 'eluwa 'ediyega, nate 'ina waiwai ta 'awanega 'awesabelulu.

Ta tai nina to'umalina 'ida apwesa, be Seitani 'ina waiwaiyega edeedede ta yage 'ebe nuwaowana 'ediyega tomota 'ida kaboedi. 10 Ta taudi tetela 'ai'aila 'ana tologuitoyasao 'idi sena 'asa gabugabu, Yaubada 'ida tagwaledi be Seitani 'ina kaboyao maibo'ana sida emisedi, ta taudi bwa'omatana sida loba, manuna e'ita 'ai'aila siguitoyasena, 12 ta bubuna geyogeyoi 'ana guinuwa nuwadi 'i'ewena. 'Eguma lowa tetela 'ai'aila sida emisenaya, Yaubada 'ida 'etoseyedi, ta sa'i nigeya.

Yaubada 'ana toesinuwao

13 Gosemao, ona'ai'aila 'ida 'Inapwana 'iobobomemi, manuna gimituta 'enaya 'iesinuwemi be 'aene Yaluyaluwa Tabuna 'enega 'ida gie'esasemi, be tetela 'ai'aila wada emise 'ami 'etoseyana manuna, 'enega 'ilobwenema be tuta maibo'ana manumi 'ada lokagutoki Yaubada 'ena. 14 Tetela nina lowa 'aloguguyaena 'emiya ga waemisena, ga gete 'enega 'ida 'Inapwana Yesu Keliso 'ina esaesa 'i'ebwa'emi. 15 Gosemao, wada toolopa'ala, be 'ami e'itao nidi 'ima onega, ta wate 'ima leta 'ediyega, wada giyai'i'isidi.

16 Tamada Yaubada 'ioboboma 'ai'ailida, 'enega tuta yauna 'igiegwausowalida, manuna tanuwayaina yage nidi ma'etamo manuda 'ida guinuwedi. 17 Tauna Yaubada be 'ida 'Inapwana Yesu Keliso sida giegwausowalimi, ta sida giewaiwaiyemi, be wada gwaunuwa 'imi paisewa 'ediya, ta tuta maibo'ana 'imi onao sida bobo'ana.

Copyright information for `DOB