2 Thessalonians 3

Manuma wada sidasida Yaubada 'ena

1Gosemao, 'ebweu yage wate nuwanuwama be manuma wasidasida Yaubada 'ena, be 'enega 'Inapwana tetelina 'ima loguguyega 'ida lelewana be 'iewaiwai tomota 'ediya, nadigega lowa 'emiya. 2Ta wada sida wate be toto'umalidi 'ediyega Yaubada 'ida 'etoseyema, manuna 'Inapwana 'ana toeyaseyaseyao yaudi. 3Ta esi 'Inapwana nina ma 'ana emisa sawesawenaya be 'igiepa'alimi, ta 'i'ita'i'isimi be 'aene geya'abo Seitani 'igitogitoomi. 4'Enega 'Inapwana 'aemisena 'aene 'ima e'ita 'emiya waematamatanedi, 5ta wate 'ida gienuwa sabwalenimi, tauna 'ina oboboma manuna, ta wate 'imi toolopa'ala Keliso 'ena manuna.

Logwautoyasa geya'abo

6Gosemao, 'aemataluwemi wate, 'ida 'Inapwana Yesu Keliso 'ana esanega, be 'eguma 'aina tasidao loogwautoyasidi, geya'abo wa'ita'ita naodi, manuna gwautoyasa 'ina 'eda 'abo'ama nigeya 'ae'ie'itami, ta gwaunuwa 'ina 'eda esi. 7'Enega ni'atu wamwalatonina 'aene 'ilobwenemi be 'abo'ama waetotowanema. Manuna lowa 'omi ma'emao tamiyamiya, nigeya 'ebweu tuta paisewa 'ena 'ada logwautoyasa. 8Nadigega wate taumamo 'ae'enima. Boiboi be 'asiyata 'ediya 'apaipaisewa, manuna geya nuwama be 'ami mwau 'asa'u 'ama masula manuna.

9Ona'ai'aila, loina 'imiyami be 'omi wada e'enima, ta tuwa tuga tauma 'ama masula manuna 'aetaetapewa, be 'enega 'omi 'ima guinuwa wada etotowanedi. 10Ta wate lowa 'omi ma'emao tamiyami, 'aloinemi 'aene 'abo yaita 'ilogwautoyasa geya'abo wate 'i'e'a.

11Ni'atu tetelimi 'anonona 'aene 'aidi 'emiyega tologwautoyasa, ta nigeya sida miyabaula be sida paisewa. 12'Enega gosedao nidi 'ada emataluwedi, ta 'ida 'Inapwana Yesu Keliso 'ana esanega 'aloinedi, be 'idi paisewa taudimo sida guinuwedi, ta sida miyabaula be 'enega 'adi masula sida loba.

13Gosemao, guinuwa bobo'adi manudi geya'abo walo'ame'ame.

14'Eguma yaita e'ita nidi 'imi leta gete solanaya 'isinalidi, geya'abo tai nina wa'ita'ita nao, be 'enega 'ina guinuwa nina manuna 'ida omayamaya, 15ta watoo be geya'abo waeetalauwale, manuna tauna tasidai, 'enega e'ita namo wa'ebwa'e.

Ona 'ana 'ebe losalowa

16'Ida 'inapwana tauna nuwasiwalowa 'alena be 'ida gienuwa siwalowemi, be 'ida giegwausowalimi tuta maibo'ana, ta ma'emi wada miyaataya.

17Leta gete 'ana 'ebe losalowa taugu nimaguyega ya'eto'etoladinawa, nadigega 'igu gimi letao 'ediya. Ta 'ida 'Inapwana Yesu Keliso 'ina oboboma maibo'ami 'emiya.

'Abo'agu Paulo.

18

Copyright information for `DOB