2 Timothy 4

Timoti, 'amu emataluwa ya'ebwa'eyo Yaubada matanaya, ta Yesu Keliso tauna mwawamwawasidi be mayawasida 'ada tobwa'omatana matanaya, tauna ma'etamo 'iapwesa limanama be 'ietoloina 'edaya. 'Amu loina nina gete: Tuta maibo'ana 'uetapewa waiwai be tetelina 'usimane, tuta mwau ta tuta gwausowala 'ediya, be tomota 'ediya 'uloguguya be siemisa, ta wate 'ugiepaludi be 'ugiewaiwaiyedi, ta yage nidi getedi 'ue'ita 'ai'ailidi ma imu 'alama'i'ita.

Manuna tuta simeemai 'ediya tomota e'ita palupaludi siguitoyasedi, be mali e'itao 'adi nono 'ediya 'aene bobo'adi sida muliyedi. Ta e'ita dumadumadi 'adi muliya 'enega e'ita 'ai'aila sipilisine. Ta 'oyo geya'abo taudi nadigega. Tuta maibo'ana 'utoolo pa'ala ta 'imu miyamwau 'ediya 'ue'alama'i'ita, be tetela bobo'ana 'usimane. Gete 'enega 'iabe 'oyo toguinuwa waiwaiyo Yaubada 'ina guinuwa 'ena.

Ta 'abo'agu ni'atu be 'igu guinuwa yalosaloni be bale'u gete yapilisine. Ni'atu Yaubada manuna yalosaiya, ta 'igu epili ni'atu yalosalonina, ta tuta maibo'ana ma igu emisa Keliso 'ena. 'Enega ma'etamo 'ida 'Inapwana 'agu pali, bubuna palupaluna manuna, 'i'ebwa'egu. Ta pali nina ni'atu manugu 'igibubuna ga 'imiyami. Ta 'Inapwana nina ma ina loina palupaluna, 'abo 'asiyata nina 'iapwesama, 'abo'ada 'ina ilalimanama 'ana toyamwanao 'ada pali 'i'ebwa'eda.

Ona 'ana 'ebe losalowa

Timoti, nuwanuwagu 'ulomaninima. 10 Dimasa ni'atu 'iebesinegu, manuna bubuna bale'u nuwana 'i'ewena ga ni'atu 'itauya Tesalonaika. Kelesenisi wate ni'atu 'itauya Galetia, ta Taito ni'atu 'itauya Dalimetia. Taudi 'agu tolemao nidi maibo'adi ni'atu sipilisinegu. 11 Luke namo 'itupwa.

'Imu mai 'enaya Maki 'u'au'ewenama, manuna tauna 'agu tolema bobo'ana.

12 Tikiko ni'atu yaetunena ga 'itauya Epeso.

13 'Eguma 'umeemai 'aina 'igu gwegwe nuwanuwagu 'ume'edi, 'agu tala'apwala lowa Tiloasi 'ena yapilisinena Kalipo 'ina anuwaya, be 'igu bukiyao be wate 'igu pwepwai 'eto'etoladidi, taudi nuwanuwagu sinabwana.

14 Kainumu 'ana toguinuwa, 'ana esana Alekisana mwau sinabwana 'i'ebwa'egu. 'Enega 'ana e'isa 'Inapwana 'enega ma'etamo 'iloba. 15 Alekisana nina 'ida e'ita 'ietalauwala wawasaena. 'Enega 'oyo tauna 'enega wate 'u'ita'i'isiyo.

16 'Igu etala nuganuganina 'enaya nigeya 'ebweu yaita 'ilemelemegu. Maibo'adi 'idi matautega siebesinegu, ga tebweugu. Yaubada, 'idi to'umalina getei geya'abo e'ie'isadi.

17 Ta 'igu etala nina 'enaya Yaubada 'ilemegu ga waiwai 'i'ebwa'egu, ga tetelina maibo'ana yasimanena taudi nigeya me Yudia 'ediya, ta Yaubada 'ina lemega nigeya laiyoni 'ediya si'ebwa'ebwayaegu. 18 Be mwau maibo'adi 'ediyega 'Inapwana nina 'ida 'etoseyegu be 'ina 'ebeloina galewaya 'ena yalulugu. 'Enega tada tupu atae. Eimeni.

19 'Igu oboboma Pilisila be Akuila, ta Onesipolo ma ina susuyao 'ediya 'usimane.

20 Elasito 'imiyaila Kolinita, ta Tilopimo 'ile'oasa ga Milito 'ena yapilisinena.

21 'Ulomaninima manuna 'iabe tuta gogai 'iapwesama.

Yubulo be Pudeni be Lino be Kalodia ta wate tasidao yaudi 'idi oboboma 'emuya.

'Inapwana ma'iyayo be yaluyaluwayo 'igiewaiwaiye, ta 'oyo be 'imu bodao 'ida lememi.

'Abo'agu Paulo.

22 

Copyright information for `DOB