Acts 12

Yemesa siloemwawasina ta Pita deliya sisa'u luguyena

1Tuta gote 'enaya Kini Elodi 'ina loina pa'ala 'enega 'ina tolosaiyao 'aina toekalesiyao sigiyaidi sabi gieto'umaliyedi. 2'Enega Yemesa, tauna Yoni tasina, Elodi 'ina loinega siununa sisisaiyega ga 'imwawasa.

3Ta me Yudia sigwausowala Yemesa 'ina mwawasa manuna. 'Enega Elodi 'iloina limana be Pita sida giyai. Ta wiki nina nate me Yudia 'idi edidigula 'ana tutaya ta beledi daisina nigeya 'ana 'ebe gieseseyamo sie'ani.

4'Enega Pita sigiyaina ga deliya sisa'u luguyena, ta Elodi 'ina tolosaiyao sikisitini 'iloinedi be silomata'i'ita 'ai'aili, ta Elodi 'inuwanuwa 'aene Ataona Sagalina mulinaya Pita nina 'ida sa'uapwese me Yudia 'ediya, be 'ina etala sida guinuwe. 5'Enega deliya si'ita'i'isina ta toekalesiyao sa'i sisidasida waiwai Yaubada 'ena, Pita manuna.

Anilose Pita 'i'etoseyena

6Ta Pita 'aina 'asiyata 'ediya deliya 'imiyami, be mali 'asiyata 'enaya Elodi Pita 'ida sa'uapwese, ta boiboiya Pita tolosaiyao gamwagamwanidiya 'i'eno'eno, ta 'ana 'ebeyona seni 'eluwa 'ediyega siyonina, ta wate deli 'awanaya tolosaiyao si'ita'i'isina. 7Ga Yaubada 'ina anilose 'ebweu manini 'iapwesa ga deli solana 'imaedana, ga anilose nina Pita lesulesuna 'isapina, ta 'ilowanowanona, ga 'igwae, “'Utoolo manini,” ga 'ana 'ebe yonao nimanega sibe'u. 8Ga anilose nina 'ieonena, 'igwae, “'Amu 'oama 'u'ote be 'amu 'aelawa 'ulosipwa,” ga ona nina Pita 'iematamatanena. Ta anilose nina wate 'igwae, “'Amu tala'apwalega 'ubwabwasa be 'umuliyegu,” 9ga 'iapwesa ta Pita 'imuliyena ta 'inuwena 'aene 'imadamadawala, ta nigeya 'imwalamwalatoni 'aene anilose nina 'ina guinuwa yage 'ai'aila.

10'Enega to'ita'i'ita 'ebweuna sipilisinena, ta 'eluwena wate sipilisinena, ga 'awa sinabwana kainumuyega siguinuwenaya 'ena simai, ga 'awa nina taunamo 'i'egegena, ga siapwesa 'asaya, ta 'eda 'enega sitauya, ga manini anilose nina Pita 'ipilisinena.

11'Enega Pita 'inuwa sabwalena, ta 'igwae, “Ni'atu yamwalatoni 'ai'ailina 'aene 'Inapwana 'ina anilose 'ietunenama, ga 'i'etoseyegu Elodi 'ina loina 'enega, be geya'abo me Yudia 'idi nuwanuwao sida guiguinuwedi.” 12Pita ni'atu nuwana 'isabwalena ga 'itauya Meli 'ina anuwaya, tauna Yoni sinana, ta Yoni 'ana esana 'eluwena Maki, ta anuwa nina solanaya tomota yaudi sideli egogonama, ga sisidasida Yaubada 'enaya.

13'Enega Pita anuwa 'ana 'awa 'enaya 'i'aukeke, ta topaisewa mewainena 'ana esana Loda 'imai, 14ta Pita 'enana 'imwalatonina, ga 'igwausowala sinabwana, ga nigeya 'awa 'igigegigege, ta 'iila manini anuwa solanaya ga 'igwae, “Pita 'awaya 'itootoolo.”

15Ta sigwae, “Uwauwayo!”

Ta waine 'awana 'ipa'ala 'aene tauna Pita nina.

'Enega sigwae, “Nai Pita yaluyaluwana.”

16Ta Pita 'etamo 'etauluya 'imiyami ta 'i'au'aukeke tuga, 'enega 'awa sigigegena, ga si'itena tauna, ga nuwadi 'iowana 'ai'aila.

17Ta Pita nimanega 'i'etobodedi be sida 'alaenono, ta 'iemwasala 'Inapwana deliyega 'i'au'ewenama manuna, 'enega 'igwae, “Tetela gete wasimana Yemesa be gosedao wate 'ediya.” 'Enega 'ipilisinedi ga 'itauya mali esenaya.

18Tomwa 'iulisina ga tolosaiyao nuwadi 'iowana, ta si'atesa'ala sinabwana Pita manuna, mwa'adega 'iapwesa'esa. 19Ta Elodi 'iloinedi be Pita nina sida 'ebesei, ta nigeya sida lobena, 'enega to'ita'i'itao 'idi etala 'iguinuwena, ga 'adi loemwawasa 'iloinena. 'Enega Elodi nina Yudia 'enega 'imwa'uta Sisalia, ga nada 'imiyami.

Elodi 'ina mwawasa

20Elodi nina me Taiya be me Saidoni lowa 'igamwasowaledi, 'enega Elodi 'ina to'ita'i'ita, 'ana esana Bilasito, sigiegwausowalena, ga muliyega mabodadi simai Elodi 'ena, ga nuwanuwadi be ma'enao sida egosigosiyana limana, manuna taudi 'adi masula Kini nina 'ina senega silobaloba.

21'Enega Elodi 'ebweu 'asiyata 'iupaena be ma'enao sida onaona, ga 'asiyata nina 'ena 'ana 'oama esaesa 'i'otena, ga 'ina 'ebemi esaesa 'ena 'imiyatowa, ga boda nidi 'ediya 'iona.

22Ta boda nidi sibwaubwau, sigwae, “Gote 'ebweu Yaubada 'ina ona, ta nigeya tomota 'ina ona.”

23Tuta gote 'ena Yaubada 'ina anilose Elodi 'iununa, manuna Yaubada 'ana tupu 'isa'ubalena tauna 'enaya, ga ipwaipwa solana si'enina ga 'imwawasa.

24Ta 'enega Yaubada 'ina ona 'iewaiwai tomota yauyaudi ta sena maibo'adi 'ediya. 25Ta Banaba be Saulo 'idi guinuwa Yelusalema 'ena silosalonina, ga 'enega simwa'uta limana Anitioki 'ena, ta Yoni, tauna 'ana esana 'eluwena Maki, si'au'ewenama ma'edi.

Copyright information for `DOB