Acts 15

Yelusalema 'ena siloiloina

'Enega 'aidi tomota Yudia 'enega siebusima, ga sie'ie'ita toekalesiyao me Anitioki 'ediya, sigwaegwae, “Mosese lowaenei 'iloinema bwalama 'ana daba manuna. 'Enega 'eguma 'omi daba nina nigeya wa'ewa'ewa, geya'abo 'etoseyana walobaloba.” Ta Paulo be Banaba nigeya si'awa'awa 'ai'ailedi, 'enega ma'ediyao siegewagewana sinabwana. Ga toekalesiyao Anitioki 'ena Paulo, be Banaba, be 'aina wate tomuliyao 'ediyega, siesinuwedi be 'aene sida tu'e Yelusalema, be nuwanuwa gete manuna sida onaona, nai sida loina, Yesu 'ana tosimanao site tuwelo be wate toanuganao ma'ediyao.

'Enega toekalesiyao silokaiyoniyedi ga sena Pinisia ta Samelia siataonedi, ga 'idi sakowasi nina 'ena 'asa apwesa tomoteninao 'idi sanaila Yaubada 'ena sisimanena, ta Yesu 'ana toemisao 'asa 'ebweuna 'ebweuna 'ediya, simana gete sinonona, ga 'enega sigwausowala sinabwana.

'Enega siapwesa Yelusalema, ga toekalesiyao be Yesu 'ana tosimanao be toanuganao si'au'ewedi 'idi anuwaya, ga Paulo be Banaba siemwasala 'ediya to'ase be to'ase 'idi paisewa Yaubada 'ina waiwaiyega siguinuwedi.

Ta 'aina Yesu 'ana toemisao Palisi bodadi 'ediyega sitoolo, ga sigwae, “'Eguma 'asa apwesa 'adi tomiyanao siemiemisa, 'ilobwenedi be daba si'ewa be wate tada loinedi be Mosese 'ina loinao sida muliyedi bemi, be muliyega siekalesiya 'ai'aila.”

'Enega Yesu 'ana tosimanao site tuwelo nidi be toanuganao deliegogona siguinuwena, ga nuwanuwa gete manuna sionaona. Ga tupwana siegewagewana 'amana, 'enega Pita 'itoolo ga 'igwae, “Tasigwao, wamwalamwalatoni 'aene tuta lowa Yaubada 'edega 'abo'agu 'iesinuwegu, ga 'awaguyega taudi nigeya me Yudia tetela bobo'ana sinonona, ga siemisena. Ta Yaubada to'ase 'atedaya simiyami 'imwalamwalatoni, ga taudi nigeya me Yudia 'ediya 'itagwala, ga Yaluyaluwa Tabuna 'i'ebwa'edi, nadigega 'abo'ada 'i'ebwaya'eseda, ta nigeya 'ebweu wate weyala 'igieapwesena, be 'aene taudi dumadumadi be 'abo'ada dumadumada, ta taudi siemisena nadigega 'abo'ada taemisena, ga 'enega maibo'ada 'ateda 'igie'esasedi.

10 “'Enega geya'abo Yesu 'ana toemisa auwaudi sena apwesa 'ediyega 'adi 'aa'aala mwauna wa'ebwa'ebwa'edi, 'abona nai Yaubada wagiegamwasowale, manuna 'aa'aala nina tubudao nigeya sawesawediya be si'aali, ta 'abo'ada wate nigeya sawesawedaya. 11 Ta sa'i 'ida emisa 'aene 'Inapwana Yesu 'ina obobomega 'i'etoseyeda, ta taudi wate Yesu 'iobobomedi, ga 'enega wate 'i'etoseyedi.”

12 Ga maibo'adi simiya 'alaenono, ga muliyega, Banaba be Paulo siemwaemwasala edeededeyao be 'ebe nuwaowanao Yaubada 'iguinuwedi sena apwesa 'ediya 'idi guinuwega manudi.

13 Ta muliyega Yemesa 'itoolo ga 'igwae, “Tasigwao, 'igu ona gete wada nono. 14 Saimoni 'edaya 'isimanaya 'aene Yaubada ni'atu 'ie'ale, ga taudi nigeya me Yudia 'ediyega 'aina 'ina tomotaiyao 'iesinuwedi. 15 Yage gete manuna lowa palopitao Yaubada 'ina ona sigimi simanena, 'igwae,

16 ‘Muliyega yada ilama be Debida 'ina anuwa ni'atu 'ieligeina, yada 'abilima. Gete tuga 'imiyami besobeso ta esi yada giebobo'ana lima.

17 Be 'enega tomota tupwatupwadi simiyami 'Inapwana sida 'ebesa, be 'agu esiesinuwao, taudi nigeya me Yudia 'ediyega, taudi wate sida 'ebesegu.

18 Gete 'Inapwana 'ina ona, tauna lowaenei nuwanuwa gete 'igieapwesena.’ ”

19 Ta Yemesa wate 'igwae, “'Igu loina gete, taudi nigeya me Yudia Yaubada 'ena sisanasana ila, 'aene geya'abo 'adi mwau tasa'usa'u, 20 ta esi 'idi leta tada 'etoladi be 'etoboda ata dimo tasa'udi nate, masula nina mali 'ebe bwagobwago 'ediya si'ebwa'ebwaya be, loelata be, yobai didimagadi esiyodi be, lala be. 21 Manuna lowaenei ga batuwa Mosese 'ina loina 'ana tologuguya 'asa 'ebweuna 'ebweuna 'ediya simiyami, ta wate me Yudia 'idi anuwa tapwalolo 'ediya 'etoboda getedi sisawasawadi ta tomota sinonodi Sabate 'ebweuna 'ebweuna 'ediya.” Ga 2:16; Ep 2:8v16-18 Emo 9:11-12v20 1 Loi 17:10-16

Toemisao taudi nigeya me Yudia 'adi loina

22 'Enega Yesu 'ana tosimanao site tuwelo be toanuganao be toekalesiyao maibo'adi sinuwanuwa leleleya ga 'aidi 'ediyega siesinuwedi be sietunedi be 'aene Paulo be Banaba ma'ediyao sitatauya Anitioki. Ta 'eluwa toekalesiyao 'adi toanuganao 'ediyega siesinuwedi, natedi Yudasa, tauna sieesena Basaba, be wate Sailasa, 23 ga toemisao nidi taudi nigeya me Yudia 'idi leta si'ewena, ta 'ana 'etoladi 'igwae, “Kagutoki tasimao 'omi toekalesiyao sena apwesaya Anitioki be Silia be Silisia 'ediya wamiyami. 'Abo'ama Yesu 'ana tosimanao be toanuganao 'imi leta 'a'etoladinawa. 24 Lowa alemi 'anononaya 'aene 'aidi tomota 'emega siwai, ga mali tetela 'enega sigie kwanimi, nate taudimo 'idi nuwenuwega, ta nigeya 'ima emataluwa 'ediya 'enega. 25 'Enega 'abo'ama ni'atu gete 'adeli egogonama, ga 'ima nuwanuwa 'ebweuna 'enega 'aina 'ima tomotaiyao 'aesinuwedi, be gosedao Banaba be Paulo ma'ediyao 'aetunediwa 'emiya. 26 Ta Banaba be Paulo nidi taudimo sitagwaledi ga tuta yauyauna 'ediya sitautauya 'ebe esilae soladiya, 'ida 'Inapwana Yesu Keliso 'ina guinuwa manuna. 27 Ta 'ima tomotai nidi ni'atu 'aesinuwedi, 'adi esanao Yudasa be Sailasa, be 'ami loina sida 'ebwa'emi 'imi leta 'enega, be wate taudi 'idi ona 'enega. 28 'Ami loina nina 'abo'ama, be wate Yaluyaluwa Tabuna ma'emai, 'anuwena 'aene gete loina bobo'ana be 'etoboda nidi ata getedi sinabwadimo wada 'amayabedi, be geya'abo 'ebweu to'ase wate manuna wanuwanuwa. 29 'Etoboda nidi nate, to'ase tomota sitalitaliyae mali 'ebe bwagobwagoyao 'ediya, geya'abo wae'ani, wate yobai malaladi ta yobai didimagadi esiyodi geya'abo wae'enidi, ta wate geya'abo waloeloelata. 'Eguma 'etoboda getedi 'ediyega wa'ita'i'isimi, 'imi miya bobo'ana. Kaiyoni.”

30 'Enega site ata nidi sitoolo, ga simwa'uta Anitioki, ta toekalesiyao nada sibwau egogonedima, ga 'idi leta nina si'ebwa'edi. 31 'Enega leta nina sisawena, ta 'ina simana manuna sigwausowala sinabwana. 32 Ta Yudasa be Sailasa taudi sana wate palopitao, ga 'idi loguguya yauna 'ediyega toekalesiyao sigiewaiwaiyedi.

33 'Enega siteluwa nidi nada ma'ediyao simiya'amana, ta tuta ni'atu be sitatauya, ga toekalesiyao nidi silokagutokiyedi, ta silokaiyoniyedi, ga siila taudi 'adi toetuneyao 'ediya. 35 Ta esi Paulo be Banaba Anitioki 'ena simiyaila, ga 'Inapwana 'ina ona sie'ie'ita ta siloguloguguya, ta yaudi wate ma'ediyao siguinuwa.

Paulo be Banaba sitauya dumaduma

36 Ta 'asiyata 'aina sigumwala ga Paulo Banaba 'ieonena, 'igwae, “Gosiyagu, taila be 'asa nidi lowa 'Inapwana tetelina 'aloguguyaena 'ediya taayausidi wate, be tasidao nidi ta'itadi, mwa'adega 'idi miyamiya.”

37 'Enega Banaba 'igwae, “O bobo'ana, ta Yoni tauna taeesena Maki ta'au'ewa be ma'edai tatautauya.”

38 Ta Paulo 'igwae, “Nai geya'abo tauna 'i'oaya'oayabuda, manuna lowa Pamipili 'ena 'ipilisineda, ga 'iila 'asaya, ta geya nuwana be 'i'oayabuda 'ida sakowasi 'enaya.”

39 'Enega Paulo be Banaba siegewagewana sinabwana Maki manuna, ga Banaba Maki 'i'au'ewena ga sigelu wagaya ga sidolo salu Saipilosi 'enaya.

40 Ta Paulo Sailasa 'iesinuwena be 'ida 'oayabuna 'ina sakowasi nina 'ena. 'Enega toekalesiyao Yaubada 'ena sisidasida be 'ina obobomega siteluwa nidi 'ida giewaiwaiyedi; ta sitauya, 41 ga sisakowasi Silia be Silisia 'asanao 'ediya, ga Paulo toekalesiyao 'ilemedi, ta 'igiewaiwaiyedi.

Copyright information for `DOB