Acts 17

Paulo be Sailasa to'umalina silobena 'asa Tesalonaika 'ena

'Enega Amipipoli be Apolonia 'ediyega sitauya ga Tesalonaika 'ena siapwesa, ta Tesalonaika 'ena me Yudia 'idi anuwa tapwalolo 'imiyami. 'Enega Paulo 'idi lotapwalolo 'ena 'ilugu, nadigega sena yauyaudi 'ediya 'iguiguinuwa'esa, ga nada tapwalolo 'etoi 'ediya Buki Tabu 'enega 'ie'ie'ita be ma'ediya siegewagewana, ta Paulo nina mwalatoi 'i'ebwa'edi, 'igwae, “To'etoseyana nina 'ilobwenena be 'elouya 'iloba be 'ida mwawasa, be wate mwawasega 'ida toolo limana.” Ta wate 'igwae, “Yesu nina yasimasimanena 'emiya, tauna tuga To'etoseyana nina.”

'Enega 'aidi si'awa 'ai'ailena ga Paulo be Sailasa 'idi boda 'ena silugu, ta Yaubada 'ana to'amayabao taudi nigeya me Yudia 'ediyega, be iine 'adi esanao sinabwadi 'ediyega, yaudi wate siemisa.

Ta me Yudia sa'i Paulo be Sailasa sie'ipi'ipiyedi ga si'awa to'umaliyedi, ga 'aina toadadana besobeso to'umalidi siloinedi ga pwalu sinabwana siegogonedima ta nuwanuwadi be silosaiyedi. 'Enega Yesoni 'ina anuwa simwelena, 'idi nuwanuwa 'aene Paulo be Sailasa anuwaya simiyami, be 'aene sida giyaidi, Ta si'ebesa yogenedi, ga Yesoni ta 'aina toekalesiyao ma'enao sigiyaidi, ta 'enega si'au'ewedi 'asa 'ana toloinao 'ediya sabi etalaedi, ta sibwaubwau, sigwae, “Tai getedi sena maibo'adi 'adi togieto'umali ni'atu simai bada, ga Yesoni 'ina anuwaya sie'owaga, ta 'idi e'ita 'enega Sisa 'ina loina sile'oena, manuna sionaona 'aene kini auwauna 'iapwesamaya, 'ana esana Yesu.”

'Asa 'ana toloinao ta pwaluyao e'ewa gete sinonona ga si'atesa'ala, 'enega siloina Yesoni magosenao 'ediya be 'idi mani 'enega sida yotula, be wate sida miya siwalowa. 'Enega siyotulaya, ta sili'amidi ga sitauya. 16:20v7 Lu 23:2

Paulo be Sailasa 'idi guinuwa sena Belia 'ena

10 Ta boiboiya toekalesiyao Paulo ta Sailasa sietunedi be sitatauya Belia, 'enega sitauya, ga tuta nina siapwesa Belia, silugu me Yudia 'idi anuwa tapwalolo 'ena, ga Yesu tetelina sie'ie'ita. 11 Lowa Tesalonaika 'ena me Yudia geya nuwadi tetela nina, ta sa'i me Yudia Belia 'ena 'idi tagwala bobo'ana, ga tetela nina nuwadi 'i'ewena, 'enega 'asiyata 'ebweuna 'ebweuna Buki Tabu sisawasawa be 'aene tetela gete 'ana 'ai'aila sida mwalamwalatoni. 12 'Enega me Yudia yaudi siemisena, ta wate taudi nigeya me Yudia, iine taudi 'adi esana sinabwadi, be wate 'aina 'oloto, tupwana yaudi siemisa.

13 Ta sa'i me Yudia Tesalonaika 'ana tomiyanao nidi sinonona 'aene Paulo Yaubada tetelina ni'atu 'iloguloguguya 'asa Belia 'ena, ga silomaninima ga pwaluyao sienuwa sa'uyedi be 'aene Paulo be Banaba sida losaiyadi.

14 'Enega toekalesiyao siloina manini, ga Paulo sietunena be 'imwa'uta 'asa le'awaya 'ena, ta Sailasa be Timoti bada ma'ediyao simiyami. 15 'Enega 'aina toekalesiyao 'ediyega Paulo si'oayabuna ga sitauya Ateni, ta 'enega Paulo loina 'i'ebwa'edi be 'aene Sailasa be Timoti sida lomaninima Ateni 'ena, 'enega to'oayabu nidi siila Belia.

Paulo 'ina miyami Ateni 'ena

16 Ta Paulo Ateni 'ena, Sailasa be Timoti manudi 'etamo 'iyamwayamwa, ga 'inuwamwau sinabwana, manuna 'i'itena me Ateni nigeya Yaubada 'ena siemiemisa, ta 'idi 'ebe emisa dumadumadi ta yau wawasae. 17 'Enega ma'ediya siegewagewana, nuwanuwa gete manuna, me Yudia ta 'aidi Yaubada 'ana toemisao wate ma'ediya sionaona, me Yudia 'idi anuwa tapwalolo 'ena, ta wate toni'asa, 'eguma 'ialobadi 'ebe gimwane 'ena, ma'ediya sionaona 'asiyata 'ebweuna 'ebweuna 'ediya.

18 Ta 'aidi tosinasinapuyao wate, taudi sieesedi Epikulo, be 'aidi Sitoike wate, Paulo ma'enao sieonaona, ga 'aidi taudimo 'ediya siemwaemwasala, sigwae, “Na! Kabaleya nina to'ase 'ioneone?” Ta 'aidi sigwae, “Nai mali yaubadao manudi 'iloguloguguya.” Manuna sinononaya Yesu 'ina toololimana mwawasega manuna 'iloguloguguya. 19 'Enega Paulo nina si'au'ewena Anuwa Deliegogona 'ana esana Aliopago 'ena, ga sieonena, “'Imu e'ita gete auwauna, 20 ta 'emaya 'ana nono 'aene nuwaowana, 'enega 'ana mwalatoi 'uda li'ami be 'ada nuwasabwalena.” 21 Ta me Ateni be 'owagao maibo'adi 'idi nuwanuwa mwalatoi auwaudi 'adi e'ita be 'adi enono namo tuga manudi.

22 'Enega Paulo Anuwa Deliegogona solanaya 'itoolo ga 'iloguguya 'ediya, 'igwae, “Me Ateni 'omi, ni'atu yamwalatonimi 'aene waetaetapewa 'imi tapwaloloyao 'ediya, 23 manuna 'igu adadanao 'ediya 'imi 'ebe bwagobwagoyao yaudi ya'itedi, ta 'ediyega 'ebweu 'ebe taliya ma 'ana 'etoladi ya'ita lobena, ga 'ana 'etoladi gete nadigega, 'igwae, ‘Yaubada tauna nigeya tada mwalatonina 'ina 'ebe taliya gete.’ Ta Yaubada nina 'ina 'ebe taliya nate 'ena wabwagobwago, ta nigeya wamwalamwalatoni, tauna manuna yasimasimana 'emiya. 24 Tauna bale'u maibo'ana ta yage yauyaudi 'enaya simiyami 'adi tomweluluwa, ta galewa be bale'u 'adi 'Inapwana. 'Enega nigeya anuwao tomota nimadiyega si'abi'abidi soladiya Yaubada nina 'ida miyami. 25 Ta tomota 'abo'ada nigeya sawesawedaya be 'ebweu to'ase nimadega tauna Yaubada nina ta'ebwa'e, 'abo tanuwanuwa 'aene nuwanuwana, ta tauna esi yawasida be yaluyaluwada be 'ida yageyao maibo'adi 'adi To'ebwaya, 26 ga 'ebweuna tai 'ana esana Adama 'enega mali sena be mali sena tomotenidiyao 'imweluluida be tomota sida 'elelewana bale'u maibo'ana 'enaya, ga boda 'ebweuna 'ebweuna 'idi tuta be 'idi sena Yaubada 'iloinedi. 27 'Ina nuwanuwa 'aene tauna sida 'ebese, be nai ma'etamo sida lotoona, nai sida loba. Ta sa'i Tomweluluwa nina maibo'ada selabedaya 'imiyami. 28 Manuna ‘Tauna tuga 'enega yawasida ta'ewa'ewa, ta ma'edai tatautauya be wate tamiyami.’

“Ta 'aina wate 'imi toedale Yaubada nina manuna sigwae, ‘Ona'ai'aila, 'abo'ada tauna natunao.’

29 “'Enega geya'abo tanuwena 'aene Tamadai nina 'atuwa tokwalui, nate tomota 'idi nuwenuwega be goula nai siliba nai gulewa 'ediyega sibubuna.

30 “Tuta nidi lowa tomota Yaubada siemwagemwageyena, 'enega nigeya 'ida gamwasowaledi, ta esi gete tuga sena maibo'adi tomotenidiyao 'iloineda be 'ida loegesi 'ediyega tada nuwa'ebuni, 31 manuna 'ida 'asiyata bwa'omatana ma'etamo 'iupaena be me bale'u maibo'ada 'ada loina palupaluna 'ida 'ebwa'eda tai nina 'iesinuwena 'enega, ga tai nina mwawasega 'igietoolo limenaya, be 'enega tomota maibo'ada tetela gete tada 'awa'ai'aile.”

32 Ta pwalu tomwawasa 'idi toloolimana tetelina sinononaya, ga 'aina siedagi, ta 'aidi sigwae, “Nuwanuwama be ma'etamo nuwanuwa gete manuna 'uemwasala limana be 'anono.”

33 'Enega Paulo boda nidi 'ediyega 'iapwesa. 34 Ta 'aina tomota Paulo 'ina ona siemisena ga 'ina boda 'ena silugu, 'ebweuna tai 'ana esana Dionisio, tauna Anuwa Deliegogona nina 'ana toguinuwa 'ebweu, be 'ebweu waine 'ana esana Damali, ta 'aidi wate.

Copyright information for `DOB