Acts 2

Yaluyaluwa Tabuna 'ina mai

Ga muliyega 'emasula 'ana esana Penitikosi 'ana 'asiyata 'enaya Yesu 'ana toemisao maibo'adi ni'atu sideli egogonama, ga anuwaya simiyamiya, ta galewega 'ebweu dudu 'atuwa wediliya sinabwana sinonona, ga 'idi anuwa solana nigeya sawesawenaya be 'ebweu wate to'ase sida nono, ta 'ebweu yage si'itena 'ana 'ita kaiwe sabesabeluluna nadigega, ga 'enega sabelulu nidi debadiya sitowa 'ebweuna 'ebweuna. 'Enega maibo'adi Yaluyaluwa Tabuna 'iloemaedi, ta sie'ale ga mali 'enana be mali 'enana 'ediyega sionaona, nate Yaluyaluwa Tabuna 'ina waiwaiyega.

Tuta gote 'enaya totapwalolo me Yudia mali esenega be mali esenega ni'atu simai, ga Yelusalema 'ena simiyami, ga dudu nina sinononaya ta sideli egogonama, manuna maibo'adi taudi 'enadiyega 'ebweuna 'ebweuna ona sinonona, 'enega nuwadi 'iowana sinabwana, ga sigwae, “Mwa'adega, taudi toona nidi maibo'adi me Galili aga? Ta mwa'adega ga 'enega maibo'ada tauda 'enadega sionaona, 'enana nidi nate Palitia, be Midia, be Elama, be Mesopotemia 'ana tomiyanao, be Yudia, be Kapadosia, be Ponito, be Esia, be 10 Piligia, be Pamipilia, be Itipita, be Libia senanao nidi Sailini solanaya simiyami, be taudi Lomega simai, 'aidi me Yudia, ta 'aidi nigeya me Yudia ta esi 'ida tapwalolo 'ena sitagwaledi ma'ediyao, 11 be wate me Kiliti be me Alebia, ta maibo'ada tauda 'enada dumadumadi be dumadumadi 'ediyega 'idi 'awagwae Yaubada 'ina guinuwao waiwaidi manuna sionaona.” 12 'Enega maibo'adi ma idi nuwaowana taudimo 'ediya sigwaegwae, “To'ase 'alena ga 'idi guinuwa gete nadigega?” 13 Ta sa'i gosediyao 'aidi sigwae, “Nai bwasi waiwaiyega siekabaleya.”

14 Ta Pita gosenao site ilebeni ma'enao sitoolo, ga Pita 'ie'ale ga 'ediya 'iloguguya, 'igwae, “'Omi me Yudia be Yelusalema 'ana tomiyanao maibo'ami 'igu ona wada nono, be wada nuwasabwalena, 15 'aene 'ima guinuwa gete nigeya bwasi waiwaiyega, manuna ma'etamo gonagona, nigeya numa ekabaleya 'ana tuta. 16 Ta esi yage gete lowa palopita Yoeli 'igimi simanena, 'iona, 17 ‘Yaubada 'ina simana gete nadigega 'igwae,

“Ma'etamo tuta 'ana 'ebe losalowa 'enaya, yaluyaluwagu yada 'etosiwa tomota maibo'adi 'ediya, be natumiyao me'olotodi nai mewainedi sida loguguya, be 'imi tubuwauyao sida 'enomata'ita'ita, ta 'imi 'inapwanao sida madawala.
18 Ona'ai'aila, tuta gote 'ena yaluyaluwagu yada siwa 'igu toguinuwa me'olotodi be mewainedi 'ediya, be manugu sida loguguya. 19 Be 'igu guinuwao 'ebe nuwaowana yada e'itaedi galewaya tomota 'ediya, be wate edeedede bada bale'uya, nadigega lala be kaiwe sabelulu be bwawa, 20 be sinala 'ida guguyoi, be nawalae 'ana 'ita 'ida elala, be muliyega 'Inapwana 'ina 'asiyata 'ebe matauta 'ida apwesa. 21 'Enega 'abo yaisigedi 'Inapwana 'ana esanega sibwabwau 'enaya, 'ida 'etoseyedi tuga.” ’ ”

22 Pita wate 'ieonedi, 'igwae, “Me Isileli 'omi ona gete wada nono, Yesu tauna goma Nasaleta manuna. Yesu nina matamiya Yaubada 'ie'itaena 'aene tauna 'ina toguinuwa nina, manuna Yesu 'ina guinuwa waiwaidi ta 'ebe nuwaowana, Yaubada 'ina waiwaiyega 'iguinuwedi, ta wamwalamwalatonidi manuna gamwagamwanimiya 'iguinuwedi. 23 Yaubada lowaenei Yesu nina manuna 'iloina, ga to'ase bale'uya 'ida loba Yaubada 'igimi mwalatonina, ta 'omi wasipupuyena, ga 'imi loinega tomota to'umalidi kelose 'enaya siloemwawasina. 24 Ta Yaubada mwawasa 'ina sena mwauna 'enega 'i'etoseyena, ga 'igietoolo limena, manuna nigeya sawesawenaya mwawasa 'ina senaya 'imiyaataya. 25 Gete manuna lowa Debida Yesu 'ina ona 'igimi simanena, 'igwae,

‘'Inapwana ya'itena mataguya 'imiyaataya, ta 'ataiguya 'imiyami, ta 'igiewaiwaiyegu be geya'abo yaneeneta.
26 'Enega yagwausowala sinabwana ta yatuputupuna, be yanuwayaina 'aene geya'abo bwalagu 'ito'uto'umali.

27 'Abo'agu 'imu tai esiesinuwagu, 'enega geya'abo yaluyaluwagu 'usa'usa'u ataya tomwawasao 'idi 'asaya, nai bwalagu wate 'imwaulu.

28 Ta esi yawasi bobo'ana 'ina 'eda 'ue'itaena 'eguya. 'Enega matamuya 'uda giegwausowala ataegu.’ ”

29 Ta Pita wate 'igwae, “Tasigwao, ona gete nigeya tubuda Debida manuna, manuna Debida nina tamwalatonina 'aene lowaenei 'imwawasa ga sisa'u 'ali'aliyena, ta gete tuga 'ana 'ali'ali nina bada 'imiyami. 30 Ta Debida nina palopita 'ebweu, ga Yaubada 'ina onaupaupa waiwaina 'enaya 'inuwa'i'isina 'aene ma'etamo Debida tubuna 'ebweuna Debida nina 'ina 'ebeloina 'ida 'ewa Yaubada 'enega. 31 'Enega To'etoseyana nina 'ina toololimana 'igimi mwalatonina, ga 'ieonena 'aene geya'abo tomwawasao yaluyaluwadi 'idi 'asa 'ena 'imiyamiya ataya, ta wate bwalana geya'abo 'imwaumwaulu.

32 “Gete Yesu nina ni'atu mwawasega Yaubada 'igietoolo limena, ga 'abo'ama maibo'ama 'a'itena. 33 'Enega Yaubada 'igitu'eyena ga tauna 'atainaya 'imiyami, ga tauna Yaluyaluwa Tabu nina Yaubada lowa 'iona upaupaena, ta gete tuga ni'atu 'i'ebwa'ema, 'enega guinuwa gete wa'ita'itadi ta wanononodi, tauna 'enega simai.

34 “Manuna Debida nigeya tauna 'ina tu'e galewaya manuna 'iona, ta Yesu esi manuna 'iona, 'igwae, ‘Yaubada ni'atu 'iona 'igu 'Inapwana 'ena,

“'Ataiguya 'uda miyatowa
35 be 'ana laba tuta nina 'amu talauwalao yasa'u ebusiyedi 'aeyo 'ana 'ebesa'u 'ena.” ’

36 “Gete manuna me Isileli maibo'ami wada mwalatoni 'ai'aili 'aene Yaubada Yesu ni'atu 'i'awa 'Inapwanaena be tauna To'etoseyana, tauna Yesu nina ni'atu wagiekelosena.”

37 Tomota nidi Pita 'ina ona gete ni'atu sinonona, ga manuna sinuwanuwa sinabwana, ga Pita magosenao 'ediya sienaida, sigwae, “Tasimao, ni'atu 'aloegesi. Mwa'adega 'ada guinuwa'esa?”

38 'Enega Pita 'igwae, “'Imi guinuwa to'umalina 'ediyega wada nuwa'ebuni, be maibo'ami To'etoseyana Yesu 'ana esanega 'ada giebapitaisoemi, be 'imi to'umalinao 'ida nuwataudi, be wate Yaluyaluwa Tabuna 'ida 'ebwa'emi. 39 Manuna Yaubada 'ina onaupaupa nina 'aene 'omi manumi, be natumiyao wate manudi, be taudi 'edasolaya simiyami manudi, yaisigedi taudi Yaubada 'ibwauyedi 'ena.”

40 Ta Pita 'ina ona be 'ina loguguya yauna wate 'ediyega 'isimana, ga 'igwae, “Gosegwao, 'epata gete to'umalina 'enega wa'etoseyemi.”

41 'Enega 'asiyata nina 'ena 'aina tomota Pita 'ina ona sinonona ga sibapitaiso, ta 'adi yau nadigega 'etoi tausani, 42 ga sitagwala 'ai'ailedi tosimanao nidi 'idi e'itao 'ediya, ta siegosigosiyana 'ai'ailedi, ta si'e'ai leleleya, ta wate sisidasida Yaubada 'ena.

Toekalesiyao 'idi bubuna

43 Ta maibo'adi Yaubada si'amayabena, ta tosimanao 'idi guinuwao 'ebe nuwaowana ta edeedede yaudi siguinuwedi. 44 Ta toemisao nidi siegogonedima, ta 'idi gwegweyao sitagwaledi be 'aene tomota maibo'adi 'idi gwegwe. 45 Be 'eguma 'idi 'ebeloina 'asaya simiyami siegimwaneyedi, be yage nidi 'adi maisega sieguyaiyedi taudi nigeya 'idi gwegwemo 'ediya. 46 'Enega 'asiyata 'ebweuna 'ebweuna 'ediya ma idi 'atetagwala sitapwatapwalolo Anuwa Tabu 'enaya, ta taudi 'idi anuwaya ma idi gwausowola si'e'ai egogona, 47 ta Yaubada situputupu. Ta wate pwalu maibo'ana toemisao nidi si'awa bobo'anedi. Ga 'asiyata 'ebweuna 'ebweuna 'ediya Yaubada 'aina tomota wate 'i'eto'etoseyedi, ga toekalesiyao 'adi yau 'isinasinabwa.

Copyright information for `DOB