Acts 20

Paulo 'ina sakowasi Masidonia be Gilisi 'ediya

Ta ni'atu galala 'igumwalaya, ga Paulo toekalesiyao 'ibwauyedima ga 'iguguyedi, 'enega 'ilokaiyoniyedi, ga 'itauya Masidonia. Ta Masidonia senanao 'ediya 'isakowasi, ta 'iloguguya toekalesiyao 'ediya, ga 'igiepa'alidi, ga muliyega sena Gilisi 'ena 'iapwesa, ga nada nawalae 'etoi 'imiyami, ga 'iabe wagega 'itutupa, Silia manuna, ta 'aina onaona 'inonona 'aene me Yudia siloiloina manuna sabi giyaina, ga 'enega 'ina 'eda 'isa'u gelasena be 'aene Masidonia solanega 'ida ila.

Ta 'aina tomota ma'enao sitauya, 'ebweuna goma Belia, tauna Pilo natuna 'ana esana Sopeta, be siteluwa me Tesalonaika, taudi Alisitako ta Sikanido, be goma Dabi 'ana esana Gayo, be Timoti wate, ta me Esia siteluwa, 'adi esanao Tikiko be Tilopimo.

Taudi getedi sitauya nugana wagega ga Tiloasi 'ena siyamwayamwana. Ta 'abo'ama Pilipai 'ena 'amiyami 'ana laba pwalawa daisinamo 'emasulina 'aguinuwena ga muliyega 'abo'ama wate 'agelu, ta 'asiyata nima soladiya 'apilipili, ga muliyega 'alugu Tiloasi, ga gosemao nidi 'alobedi, ga 'asiyata sebeni wate 'amiyami.

Paulo 'ina guinuwa Tiloasi 'ena

Wiki 'ana gimi 'asiyata 'ena maibo'ama 'adeli egogona beledi gitogitomwana 'ana 'ebe nuwa'i'ita sabi guinuwena, ga Paulo 'iloguguya, manuna mali 'asiyataya 'ina tuta tauya. Ta 'ina ona guguya nina 'iloedudulina ga 'ana laba niuniuwanaya, ta tuwa tuga 'etamo 'iloguloguguya. Ta anuwa 'ana tu'e nadigega anuwa 'etoi, ta 'etonina 'ena 'adeli tu'e, ta mayale yaudi 'agabudi.

Ta tubuwau 'ebweu, 'ana esana Yutiko, anuwa 'ana 'awa pita 'ena 'imiyatowa, ta mata'eno'enoega 'ie'etoyogala. Ta Paulo 'etamo 'ionaona, ga Yutiko nina 'i'enomwataiya, ga pita 'ana 'awa 'enega 'ibe'u bale'uya, ta simwa'uta ga sigilagasina, ta si'itena ni'atu 'imwawasa.

10 Ta Paulo 'imwa'uta ta 'ena 'ikopu sanamwa'uta, ga 'i'atubwailina ta 'iona, “Geya'abo wa'ate'ate sa'ala. Yawasina 'imiyami.” 11 Ta tubuwau nina si'au'ewa tu'eyena mayawasina, ta manuna sigwausowala sinabwana.

'Enega Paulo 'itu'e limana ga beledi 'igitomwena ga si'e'ai, ta 'enega ma'enao si'awa'awagwae ga 'ana laba tomwa 'iulisina, 'enega 'itoolo ga 'ipilisinedi.

Tiloasi 'enega 'a'adau Milito manuna

13 Ta 'abo'ama wagega 'agelu ga 'a'adau Asosi be 'aene gote 'ena Paulo 'ada usa, manuna 'isimana 'emaya, 'igwae, “Wagega watatauya, ta 'abo'agu 'aeguyega yatatauya Asosi, be gote 'ena wausagu.”

14 Ta ni'atu Asosi 'ena 'aapwesa ga 'aelobaloba, 'enega 'ausena ta 'a'adau limana, ga Mitiline 'ena 'alugu. 15 Ta Mitiline 'apilisinena, ga tomwa 'iulisina Kiyo matanaya 'apilipili, ta tomwa wate 'iulisina ga Samo 'ena 'alugu, ta 'asiyata wate 'ebweuna ga Milito 'ena 'alugu. 16 Paulo ni'atu 'ieonema be 'aene Epeso 'ada pilisine, be 'aene geya'abo wate tuta 'ida mudamudali Esia senanao 'ediya, manuna nuwanuwana be 'ida lomanini 'abo kapekapeyana Yelusalema 'ida loba Penitikosi 'emasulina 'ana 'asiyata 'ena.

Paulo 'ina ona lokaiyoni me Epeso 'ediya

17 Ta Milito 'enega 'isa'uale Epeso ekalesiya 'ana toanuganao 'ediya be sida mai. 18 Ta ni'atu 'ena simai ga Paulo 'ieonedi, 'igwae, “'Omi wamwalamwalatoni 'igu bubuna tuta nina tamiyami ma'egwao, Esia 'ena igu mai'unu 'enega ga batuwa, 19 nate 'Inapwana manuna yaguiguinuwa maoonuwagu be ma igu dedoi be 'elouyao wate yalobediya me Yudia 'idi loinega, 20 ta sa'i nigeya 'ebweu to'ase 'Inapwana tetelina bobo'ana 'ana simana yaegagalena, ta esiya maibo'ana yae'itemi 'imi tapwalolo 'ediya, be wate 'imi anuwa 'ebweuna 'ebweuna 'ediya, 21 ta 'igu e'ita 'emiya leleleya tuga, 'omi me Yudia, be 'omi mali sena tomoteninao, maibo'ami yaloguguya 'emiya be 'aene 'imi bubuna to'umalidi 'ediyega wada sanaila Yaubada 'ena, be 'Inapwana Yesu wada emise.

22 “Ta gete tuga Yaluyaluwa Tabuna 'ina loinega yatautauya Yelusalema, ta nigeya tamwalamwalatoni to'ase nai 'iabe nada 'eguya 'iapwesa. 23 Nate namo 'asa 'ebweuna 'ebweuna 'ediya, Yaluyaluwa Tabuna 'isimasimana 'eguya 'aene ma'etamo Yelusalema 'ena yona be 'elouya yalobadi.

24 “Ta nigeya sa'i yawasigu manuna yada nuwanuwa be yaegagalena. Nate namo 'igu 'eda, nai 'igu paisewa nina, 'Inapwana Yesu 'i'ebwa'eguya manuna yanuwanuwa be 'aene yada losaloni, nate 'ada oboboma Yaubada 'enega 'ana simana.

25 “Wanuwa'i'isi lowa tuta yauna 'ediya yasakosakowasi 'emiya ta Yaubada 'ina etoloina tetelina manuna yaloguloguguya, ta gete wanono, ma'etamo geya'abo wate wa'ita'ita limagu. 26 'Enega gete tuga yasimana 'emiya 'aene Yaubada 'ina loinao maibo'adi ni'atu ya'ebwa'emi, ta nigeya 'ebweu yakwaikwaiye. 'Enega 'eguma 'aimi 'emiyega waesilae ataya nate 'abo'agu nigeya 'igu loegesiyega, ta taumimo esi 'imi loegesi.

28 “'Enega toanuganao 'omi, taumimo wa'ita'i'isimi be 'imi sipiyao wate wa'ita'i'isidi, manuna Yaluyaluwa Tabuna 'imi paisewa nina 'i'ebwa'emi be toekalesiyao nidi walomata'i'isidi, manuna 'ida 'Inapwana Yesu tomotai nidi tauna lalanega 'igimwanedi.

29 “Yamwalamwalatoni wate 'iabe 'igu tauya mulinaya toe'ita to'umalidi, 'atuwa kedewa bosasa, simamai be 'imi sipiyao sida gieto'umaliyedi. 30 Ta wate 'omi 'iabe 'emiyega 'aidi sida e'ale be sie'ita kabokabo 'emiya be 'aina tomota sida lisidi taudi 'idi bodao 'ediya. 31 'Enega walomata'i'ita be wate 'igu loguguya wanuwa'i'isi, 'aene yakwala 'etoi soladiya nigeya yada eyawai'ata, 'asiyata be boiboi 'ediya, ta esi ma mataselugu yaloguloguguya 'ebweuna 'ebweuna 'enaya.

32 “Wate yaemataluwemi tuta simeemai manudi, 'aene Yaubada tauna 'ida 'ita'i'isimi, ta wate tauna 'ina oboboma tetelina sawesawenaya be 'igiepa'alimi, be 'enega 'ina bodao, taudi 'igie'esasediya 'ediya, 'omi wate walulugu.

33 “Lowa 'abo'agu ma'emiya tamiyami, nigeya yayatoyato'aiyedi 'imi esaesao, nai mani, nai 'oama bobo'adi, 34 ta esi ni'atu wamwalatonigu 'aene taugu 'igu paisewega 'agu 'e'ai be gwegwe yalobedi, ga 'igu 'ali'eiyao wate yalemedi. 35 'Igu bubuna getedi 'ediyega yae'itemi 'aene 'ilobweneda be tauda 'ida paisewega tonenetao tada lemedi. Nadigega wate 'Inapwana Yesu 'ina ona wanuwayaina, nate 'igwae, ‘'Ewadaita nigeya gwausowalinamo, ta 'ebwaya esiya 'ana gwausowala sinabwa wawasae.’ ”

36 Paulo 'ina ona gete 'igumwalaya ga 'i'aetulasa, ga ma'enao sisidasida Yaubada 'ena. 37 Ta maibo'adi sidedoi, ga Paulo si'atubwailina, 38 ta sinuwamwau sinabwana manuna 'ieonedi, 'igwae, “Ma'etamo geya'abo wa'ita'ita limagu.” 'Enega sidoloena wagaya, ga siegeluna.

Copyright information for `DOB