Acts 21

Paulo 'ina tauya Yelusalema

1Ta Paulo ma'ema, gosemao nidi 'alokaiyoniyedi, ga 'a'adau palupaluna ga Kosa 'ena 'alugu. Tomwa 'iulisina 'a'adau limana ga Lodi 'ena 'alugu, ga mali 'asiyataya 'alugu Patala. 2Ga Patala 'enaya waga 'alobena sabi abala Pinisia, ga waga nina 'ena 'agelubala ga 'apilipili bwagabwagaya. 3Ta ni'atu Saipilosi 'aapwesa, ta 'enega gegeumimega 'apilisi ataya, ta Silia manuna 'apilipili, ga Taiya 'ena 'alugu be 'aene waga 'ana eusana 'aina sida talasiwadi. 4Ta 'aina Yesu 'ana toemisao 'alobedi ga ma'emao 'amiyami 'asiyata sebeni, ta Yaluyaluwa Tabuna mwalatoi gosemao nidi 'i'ebwa'edi, 'enega Paulo sieonena, sigwae, “Geya'abo 'ulagalaga Yelusalema.”

5Ta 'enega 'ima 'asiyatao nada sigumwala ta 'atoolo ga 'adolo wagaya, ta yaudi mamwanediyao be manatudiyao sidoloema 'asa tautaulunaya, ga le'awaya 'aema 'atulasa ta Yaubada 'ena 'asidasida. 'Enega 'alokaiyoniyedi, 6ga 'agelu wagaya, ta taudi siila 'asaya.

7Ta Taiya 'apilisinena ga 'a'adau limana, ga Tolimei 'ena 'alugu, ga 'asuya, ta 'enega toekalesiyao 'alobedi ga 'alokagutokiyedi, ta 'asiyata 'ebweuna ma'emao 'amiyana. 8Ga tomwa 'iulisina ga 'atauya Sisalia, ta Pilipi, tauna tologuguya site sebeni 'ediyega, 'ina anuwaya 'alugu, ga ma'emai 'amiyamiyana. 9Ta Pilipi natunao site ata mewainedi, ta nigeya siaiai, ta 'idi guinuwa Yaubada 'ina nuwena sisimasimana tomota 'ediya.

10Ta 'aina 'asiyata 'ediya 'amiyami, ga 'ebweu palopita, 'ana esana Agabu, Yudiaega 'imwa'utama, 11ta 'emaya 'imai, ga Paulo 'ana gadiwana 'i'ewena, ta 'aena be nimana tauna 'iyonidi, ta 'igwae, “Yaluyaluwa Tabuna 'iona nadigega: Toni gadiwana gete me Yudia Yelusalema 'ena sida yonina, be sida 'ebwayae taudi nigeya me Yudia 'ediya.” 12'Abo'ama be 'asa nina 'ana tomiyanao ona gete 'anonona ga Paulo 'asidena, 'agwae, “Geya'abo 'utu'etu'e Yelusalema.”

13Ta Paulo 'ieonedi, “Geya'abo wadedoi be wagiegie 'atesa'aligu. Ni'atu yatagwalegu be sida sa'ugu deliya, nai sida loemwawasigu Yelusalema 'ena, 'Inapwana Yesu manuna.”

14Ta 'a'etoboda yogenena ga 'alosa'u, ta 'agwae, “Bobo'ana nate, to'ase 'Inapwana 'ina nuwanuwa nadigega 'ida guinuwei.”

15'Asiyatao nidi sigumwala, ga 'ima gwegwe 'agibubuna, ta 'atu'e Yelusalema. 16Ta 'aidi Yesu 'ana toemisao Sisalia 'enega ma'emao 'atauya, ga sime'ema Nesoni goma Saipilosi 'ina anuwaya, tauna Yesu 'ana togimiemisa 'ebweu, be 'aene 'enaya 'ada miyami.

Paulo be Yemesa sielobaloba

17Ta ni'atu Yelusalema 'ena 'amai, ga totapwaloloyao silokagutokiyema ma idi gwausowala. 18Ta tomwa 'iulisina ga Paulo ma'emai 'atauya Yemesa 'ina anuwaya, ga nada toekelesiyao 'idi toanuganao 'alobedi. 19Ta Paulo ni'atu 'iona obobomedi, ga 'ina loguguya be Yaubada 'ina guinuwa taudi nigeya me Yudia soladiya manudi 'iemwaemwasala 'ediya. 20Ta maibo'adi sinonona ga Yaubada situpuna, ta sieonena, sigwae, “Tasimai, 'u'ita tausani yauna ni'atu Yesu 'ena siemisa, ta yaudi toemisa nidi me Yudia, ga Mosese 'ina loina simulimuliye, 21ga aleyo sinonona 'aene 'oyo me Yudia taudi mali senao 'adi tomiyanao 'ue'ie'itadi be 'aene Mosese 'ina loina sida guitoyasa, ta 'ueoeonadi 'aene geya'abo natudiyao me'olotodi sida lodalodabadi be tubudao 'idi bubuna geya'abo sida mulimuliye. 22'Iabe sinono 'aene ni'atu 'umai saba, be sigamwasowaleyo, 'enega to'ase tada guinuwa?

23“'Ima nuwanuwa gete nadigega: 'Oloto site ata 'ima boda 'enega ni'atu Yaubada 'ena sionaupaupa. 24'Enega 'oyo ma'ediya wagie'esasemi be watauya Anuwa Tabu 'ena, be 'aene 'uya'uyadi sida sui be sida taliya Yaubada 'ena, be 'imi guinuwa nina 'ana maisa maibo'ana 'oyo 'uemaisi, be gete 'enega tomota maibo'adi sida mwalatoniyo 'aene Mosese 'ina loina 'umulimuliye, ta 'awato'umalina nidi manuyo sinonodiya, maibo'adi ona besobeso.

25“Ta Yesu 'ana toemisao, taudi nigeya me Yudia, ni'atu 'idi leta 'aetunena, be 'aene to'ase nadigega tomota sitalitaliyaedi mali 'ebe emisao 'ediya geya'abo sie'ani, ta wate yobai malaladi be yobai didimagadi geya'abo sie'ani, ta wate geya'abo siloeloelata.”

26'Enega Paulo 'idi ona 'inonona, ga mali 'asiyataya site ata nidi ma'enao sitauya ga sigie'esasedi, ga Anuwa Tabu 'ena silugu, ga Paulo totaliya 'ieonena, 'igwae, “'Abo'ama ni'atu 'aonaupaupa Yaubada 'ena, ta 'asiyata sebeni 'ima 'esasa manuna silosalowa, be 'enega 'ailama be yada taliya manuma.”

Paulo sigiyaina

27Ta 'idi 'asiyatao esebeni 'iabe sigugumwala, 'enega me Yudia, taudi lowa sena Esia 'enega simai, Paulo si'itena Anuwa Tabu solanaya, ga bodao sienuwa sa'uyedi, ga Paulo sigamwasowalena, ga sigiyaina, 28ta sibwaubwau, sigwaegwae, “Me Isileli ye, wamai be wa'ita tai getei, tauna tomota esena yaudi 'ediya 'ie'ita gesiyedi, be 'aene 'ida boda, be 'ida loinao be 'ida Anuwa Tabu sida sinalidi, ta wate Anuwa Tabu gete 'igie yage besobesoena, manuna mali tomota, taudi nigeya me Yudia, 'ime'edi solanaya.” 29'Idi ona gete manuna lowa goma Epeso, 'ana esana Tilopimo, Paulo ma'iyana 'asaya si'itena, ga sinuwena 'aene Paulo Tilopimo nina 'ime'ena Anuwa Tabu solanaya.

30Gete manuna me Yelusalema maibo'adi sigamwasowala, ga sipili egogonama, ga Paulo sigiyaina, ga Anuwa Tabuyega silisi apwesena, ga 'ana 'awa sigibodedi, 31ta sitootoo sabi loemwawasina. 'Enega boda saiya 'ana toloina ale 'inonona 'aene me Yelusalema maibo'adi sigalagalala besobeso. 32'Enega 'ilomanini, ga tolosaiyao ma idi toanuganao 'i'ewedi, ta pwalu 'ediya sipili mwa'uta. Ta tuta nina pwalu tolosaiyao ma 'adi toloina simeemai si'itedi, ga Paulo 'ana unuwa silosa'una.

33'Enega boda saiya 'ana toloina nina 'idoloma ga Paulo 'igiyaina, ta 'enega 'iloina ga balae kainumu 'eluwa 'ediyega siyonina, ga 'ienaida pwalu 'ediya, 'igwae, “Yaita tauna? Ta to'ase 'iguinuwena?”

34Ta boda sibwau, 'idi onao dumadumadi be dumadumadi, ta nigeya sawesawenaya be 'inono 'ai'aili, bwau toitoila manuna, ga 'iloina 'aene tolosaiyao 'idi anuwaya sida me'e.

35'Enega sitauyena, ta pwalu sigamwasowala wawasae ga simulimuliyedima, ta sibwaubwau, “Waloemwawasi namo tuga.” 'Enega tolosaiyao Paulo si'aalena waisana 'enega ga anuwaya, tomota 'idi gewana manuna.

Paulo 'ina ona pwalu 'ediya

37Ta 'iabe si'au'ewenama anuwaya, ga Paulo boda saiya 'ana toloina 'isidena, 'igwae, “Kapekapeyana ona 'ebweuna 'emuya yaonei?”

Ta toloina nina 'ilosuyaena, ga 'igwae, “Na! Tumada! 'Ena Gilisi 'umwalamwalatoni.
38'Igu nuwanuwa 'oyo goma Itipita nina, tauna lowa 'imai ga toloemwawasa powa tausani 'iegogonedi losaiya manuna, ga 'ianuganedi mitawa daitaya.”

39Ta Paulo 'igwae, “Nigeya. 'Abo'agu goma Yudiagu, ta 'igu 'asa Tasisi, sena Silisia solanaya, 'asa nina 'asa sinabwana. Ta sawesawenaya 'utagwalegu be tomota 'ediya yada ona?”

40Ta 'enega 'itagwalena, ga Paulo waisanaya 'itoolo, ga nimana 'igilagasina be sida 'alaenono, ta 'enega maibo'adi simiya 'alaenono, ga Paulo 'ena Ibeliuyega 'ieonedi, 'igwae,

Copyright information for `DOB