Ephesians 1

Lokagutoki

Kagutoki toekalesiyao 'omi Yesu Keliso 'ana toemisao, 'imi leta gete 'abo'agu 'eguyega. Yaubada 'ina nuwena 'enega yaetosimana To'etoseyana Yesu manuna. Tamada Yaubada be 'Inapwana Yesu Keliso 'idi oboboma be 'idi gwausowala 'emiya.

'Etoseyana Keliso 'enega

Gosegwao tada lokagutoki Yaubada 'enaya, tauna 'ida 'Inapwana Yesu Keliso Tamana, ga Keliso 'enega yaluyaluwada 'iobobomedi esaesa galewa maibo'adi 'ediyega. Manuna lowaenei 'etamo bale'u nigeya 'imwelumwelului, ta 'igimi esinuweda be 'aene taeboda 'ebweu Keliso ma'edai, be Yaubada nina matanaya adelida 'esaseda, ta nigeya 'ada 'ebe e'ewamo.

Ta 'enega Yaubada nuwanuwana ga 'ina obobomega 'iesinuweda be Yesu Keliso 'enega 'i'awa natuneda, be Yaubada tada tupui gete oboboma bobo'ana wawasae manuna, tauna Natu 'ai'ailina 'i'ebwaya daitena manuda, ta Natunana lalanega 'ili'amida 'ida loegesiyao 'ediyega, ga Yaubada 'inuwataudi, nate tauna 'ina oboboma sinabwa wawasae 'i'ebwaya 'edaya.Ta 'ana sinabwa nigeya 'ana 'etopwapwamo.

Ona'ai'aila, sinasinapu be mwalatoi 'i'ebwa'eda, ga tauna 'ina nuwanuwa kwaikwaiyidi tamwalatonidi, manuna gete 'igimi loinaena be Keliso 'enega 'ida losaloni, 10 ta 'ina loina nina gete 'aene tuta 'ana 'ebe losalowa 'enaya Keliso yage maibo'adi 'ida egogonedi be sida e'ebweu, nate yage galewaya be wate yage bale'uya yauyaudi 'isa'u egogonedi matanaya.

11 Ta Yaubada nina tauna 'ina nuwenuwega 'iloiloina, ga 'ina guinuwa maibo'ana 'iguiguinuwedi, 12 ta 'abo'ada 'iesinuweda ga 'iloineda be 'aene Keliso 'ana togimi emisao, be 'asiyata 'ebweuna 'ebweuna 'enaya, 'ida guinuwao manudi tomota sida tupui, be sida 'awa eseese.

13 Ta wate 'omi Keliso 'enega tetela 'ai'aila ta bobo'ana 'ami 'etoseyana manuna wanonona, ga tauna waemisena, ta wate Yaluyaluwa Tabuna nina 'iona upaupaenaya 'i'ebwa'emi, 14 'atuwa we'iwe'iyaya, be 'enega tamwalamwalatoni 'aene 'ada pali galewaya Yaubada 'enega ma'etamo ta'ewa, be manuna tatupui, be ta'awa eseese. Ep 4:30v14 2 Ko 1:22

Paulo 'ina sidasida

15 'Enega tuta maibo'ana 'ediya 'omi manumi yalokalokagutoki Yaubada 'enaya, ta yasidasida manumi, manuna tetelimi yanononaya 'aene 'Inapwana Yesu waemisena, ta wate 'ana toemisao maibo'adi 'atemiyega waobobomedi. 17 Ta 'igu sidasida manumi 'aene 'ida 'Inapwana Yesu Keliso 'ina Yaubada, tauna Tamada ta Toesaesa sinabwana, 'ida gienuwa sabwalenimi, be tauna wada mwalatoi 'ai'aili, 18 be wate 'atemiyega yage nidi bobo'adi manudi 'ibwauyemiya wada mwalatonidi, be wada emisa 'aene ma'etamo walobadi, be wada mwalamwalatoni wate 'ina eguyai sinabwana 'ina tomotaiyao 'edaya, nate tauna 'ina esaesa 'enega, 19 ta wate wada mwalatoni Yaubada 'ipaipaisewa waiwai 'abo'ada 'ana toemisao manuda. 20 'Ina waiwai nina 'ie'itaena Keliso 'enega, tuta nina mwawasega 'igietoolo limena, ga 'ina 'ebemiya galewaya 'i'ebwa'ena, Yaubada nina 'atainega, 21 'enega Keliso 'ina loina loinao maibo'adi 'iloetana sinedi, nai aniloseyao 'idi loina nai yaluyaluwao bi'iyao 'idi loina, nai taudi ma 'adi esana sinabwadi 'idi loinao, gete tuga be tuta simeemai 'ediya. 22 Manuna Yaubada Keliso 'ina 'ebeloina 'i'ebwa'ena yage maibo'adi manudi be 'ida loinedi, ta toekalesiyao wate maibo'ada 'iloiloina 'edaya, 23 manuna toekalesiyao 'abo'ada 'atuwa Keliso oona welawela'anao, manuna Keliso nina yage yauyauna sawesawenaya sena maibo'ana 'ediya.

Copyright information for `DOB