Hebrews 1

Yaubada Natuna manuna

1Lowaenei 'eda yauna 'ediyega Yaubada 'ina ona palopitao 'i'ebwa'edi, ga taudi sisimanena tubudao 'ediya. 2Ta 'ebe losalowa 'abo'ada 'ida tutaya, 'ina onao 'isimanedi 'edaya, natuna 'enega. Yaubada natunana 'iesinuwena, be yage maibo'adi 'ediya 'ietoloina, ta lowaenei natunana ma'iyana yage maibo'ana simweluluidi. 3Ta Yaubada natunana tamana 'ina maedana 'imaemaedanae ta tauna Yaubada 'ilowa'eluna. Ta 'ina ona waiwaina 'enega yage maibo'ana galewaya ta bale'uya 'igiyagiyaidi. Ta 'ida to'umalinao 'ediyega 'igie 'esaseda, ga muliyega Yaubada Toloetana sana 'atainaya 'imiyatowa. 4Tauna aniloseyao 'iloetana sinedi, ta esana nina Yaubada 'i'ebwa'enaya anilose 'adi esanao 'isinabwa sinedi.

5Manuna nigeya 'ebweu tuta Yaubada 'ebweu anilose 'ena 'ida gwae, “'Oyo natugu, batuwa tuga ya'awa natunemu.” Nai wate 'ebweuna manuna 'igwae, “'Abo'agu 'eguya 'ida 'awatamana, ta tauna 'ena yada 'awanatuna.” Ona nidi getedi natuna namo manuna 'ionaedi.

6Ta tuta nina 'ina tomatuwa 'ietunenama bale'uya, 'igwae,

“Aniloseyao galewaya 'ilobwenedi be tauna 'ena sibwagobwago.”

7Ta esi aniloseyao manudi 'ina ona dumadumana, 'igwae,

“Yaubada 'ina aniloseyao 'imweluluidi, 'enega 'idi tauya 'atuwa yagila nadigega, ta 'ina toguinuwao nidi 'atuwa 'awe sabelulu.”

8Ta esi natunana manuna 'igwae,

“'Oyo Yaubada ma imu loina palupaluna 'uda loina ataya.
9Bubuna bobo'ana nuwayo 'i'ewena ta to'umalina 'amu gadilulu.

'Enega 'imu Yaubada ni'atu 'ieoloimu gwausowala 'ai'aila 'enega, ta 'imu gwausowala gosemwao 'idi gwausowala 'isinabwa sinena.”

10Ta 'ebweu wate 'ina ona natunana 'ena 'igwae,

“'Inapwana ye, tuta nugana 'ena bale'u 'umweluluina ta nimamuyega galewa 'uguinuwena.
11Yage nidi 'etamo sisasawala ta 'oyo 'umiyami, ta yage maibo'adi sikadekadeli 'oama 'atuwa, 12be 'ununumidi tala'apwala nadigega, be 'adi 'ita 'iesa'u gelasa, ta 'oyo geya'abo 'uesa'u gelasa ta esi 'umiya ataya.”

13Ona'ai'aila, Yaubada nigeya 'ebweu wate anilose 'enaya 'ida gwae,

“'Ataiguya 'umiyatowa be 'ana laba 'amu talauwalao yasa'u ebusiyedi 'aeyo 'ubuninaya.”

Ta gete yage nina natuna namo 'ena 'ionaena.

14Ta aniloseyao taudi yaluyaluwa tuga ta toepilialeale, taudi Yaubada 'isa'udi be 'aene silemeda 'abo'ada, yaisigedi 'abo 'etoseyana manuna 'iesinuweda.

Copyright information for `DOB