Hebrews 4

'Ina onaupaupa manuda 'etamo 'imiyami, 'aene 'ina eyawai'ata tauna 'enega tada loba, 'enega 'ilobweneda be tamatauta 'abona nai 'aimi wabebe'u be geya'abo walobaloba.

Ona'ai'aila, tetela nina 'i'ebwa'eda, taudi wate lowaenei 'i'ebwa'edi, ta tetela nina nigeya 'ilemelemedi, manuna sinononaya ta nigeya siemiemise. Ta 'abo'ada 'ana toemisao talobena, ta taudi lowaenei geya'abo silobaloba, manuna Yaubada 'iona upaupaedi, 'igwae,

“Yagamwasowaledi, 'enega yaba'edi be geya'abo 'ebe eyawai'ata 'eguyega silobaloba.”

Yaubada 'ina eyawai'ata nina 'imiyami, manuna tuta nina bale'u maibo'ana 'imweluluina ga 'igumwalaya, ta 'enega 'ieyawai'ata.
Ta 'asiyata nina 'ieyawai'ataya manuna ni'atu Buki Tabu 'ena 'isimanena, 'igwae,

“Yaubada 'asiyata esebenina 'ena 'ina paisewa maibo'ana 'enega 'ieyawai'ata.”

'Enega tanuwanuwa ona gete manuna, “Geya'abo 'ebe eyawai'ata 'eguyega silobaloba.”

Ona'ai'aila, 'ebe eyawai'ata nina 'imiyami be 'aidi namo siloba, ta taudi tetela sigimi nonona ta loina sisinalinaya geya'abo silobaloba. 'Enega Yaubada tuta auwauna 'isa'una be 'ena tomota 'ebe eyawai'ata siloba, ta 'enega mwalatoi Debida 'i'ebwa'ena ga Debida nina 'igwae,

“Batuwa, 'abo Yaubada 'enana wanono geya'abo sa'i wadebadeba pa'ala.”

Ta 'ebe eyawai'ata nina Yaubada 'ionaenaya nigeya Yosuwa ma 'ana bodao 'idi 'ebe eyawai'ata manuna, ta mali 'ebe eyawai'ata manuna, tuta 'ebweu auwauna 'isa'una be 'aene tomota 'ebe eyawai'ata nina sida loba. 'Enega Yaubada 'ina tomota 'abo'ada 'ida 'ebe eyawai'ata 'imiyami, ta 'ebe eyawai'ata nina Sabate 'ana eyawai'ata nadigega. 10 'Enega 'eguma talobai, tauda 'ida paisewega taeyawai'ata, nadigega Yaubada lowa 'ina paisewega 'ieyawai'ata'esa.

11 Ta 'ilobweneda be tatoo waiwai be 'ebe eyawai'ata nina taloba, ta geya'abo 'ebweu yaita 'ilooguitoyasa, 'abona nai 'ibebe'u, nadigega taudi lowaenei sibe'u'esa.

12 Ona'ai'aila, Yaubada 'ina ona mayawasina ta waiwaina 'atuwa sisisaiya 'ina mamatana sena luwaluwana, ta sawesawenaya 'ibadida be sola'ai'ailidaya nuwanuwa be bubuna kwaikwaiyidi simiyami. 13 Manuna Yaubada matanaya nigeya 'ebweu wate yage 'ida miya kwaiya, maibo'adi silo'atamanedi, ta tauna 'ena ma'etamo 'ida guinuwa maibo'ana tasimanedi. Nug 2:2v12 1 Pi 1:23; Ep 6:17; Et 2:12v13 Lo 14:12

'Ida totaliya sinabwana tauna Yesu

14 'Ida totaliya sinabwana ta bobo'ana 'imiyami, tauna Yesu, Yaubada Natuna, ni'atu manuda 'itu'e galewaya, 'enega 'ida emisa 'enaya tagiyai'i'isi. 15 'Aidi totaliyao nigeya si'ate'atenuwa 'ole'oleyeda 'ida nenetao manudi, ta Yesu esi 'ida miyamwau 'inuwa sabwalenidi ta 'i'atenuwa 'ole'oleyeda, manuna lowa bale'uya Seitani 'ina 'ebetoo maibo'ana 'ilobedi nadigega 'abo'ada talobaloba 'esedi, ta Yesu nigeya 'ebweu wate 'iloeloegesi. 16 'Enega ma ida 'atepatu talalaga be tasidasida 'ada Toloina nina 'ena, be 'enega 'ida miyamwau 'ediya 'ida 'atenuwa 'ole'oleyeda, be wate 'ilemeda.

Copyright information for `DOB